Yobi 3 - Emakhuwa BibleYobi onlapha nihuku na oyariwawawe 1 Vahoolowaya, Yobi aahula eyano, analapha nihuku na oyariwawawe, 2 eeraka: 3 “Nilakaseye nihuku na oyariwawaka ni ohiyu weeriwaaya: ‘Ooyariwa mwaana mulopwana!’ 4 Nihuku nne nithatuwe epiphi; Muluku wiirimu iwo ahipwatthele; nihimwaleeleye. 5 Epiphi yooriipihana esareele nenno; nihuruweleye ni nihutte nooriipihanaxa; epiphi yoopopihe nne. 6 Ohiyu ole, epiphi etokotoko evarexexe! Ohaalikeleliwe eriyari ya mahuku a eyaakha, hata ohikhaleleno mpatta wa mahuku a wakhalaru mweeri. 7 Ohiyu ole okhale weekupa, mwa yoole ohiiwanyeye okhuweliwa wa ohakalala. 8 Elaphe nihuku nne yaawo anlapha mahuku ni angwera omvenxa Levitiyani*. 9 Ithenyeerisaya sa oxeexelo sihaare, oweherere siiyo waara wa oxa ni ohiwere woona ekamaama ya oxa, 10 niwoko nne khanaawanle kaakhumelaakawo mmirimani mwa amaayi weera nikisembihe woona soonanara. 11 Kahaavirelaaka weiwo, kinayariwa ookhweene? 12 Yaakhalelani makutha weera ekaakhelele, ni mapele weera ekaamwihe? 13 Hiiho, kaangwera wiixaatalela mmuretteleni ni ophwanya wiitthuuwa 14 vamoha ni mamwene nitho anamalaka a mulaponi, yiitekenle mapuro oowiitthuuwa, vano eheleiyeene nthala, 15 vamoha ni alamuli yaarino eyuuma yoorikaxa, yaasaringhe mpaanimwaya iparatha. 16 Kahaariheliwani ntoko mwaana ooweera otatheya, aani ntoko mwaana ohoonneru nsuwa 17 Mmo, atakhali khaanramarama, ni ookhulumuwa ampwaherera ngwiitthuuwani. 18 Anamatthukiwatho ankhala ngwiitthuuwani, khaaniiwatho okhuwela wa anamakhaliha opottha. 19 Atthu piswa ni aweri ari weiwo, ni epottha eri yootapuxeyeene wa pwiiyaaya. 20 Onaareliheriwani mutthu oohaawa; okumi wa oothanana; 21 yaawosa anghaawela okhwa ehiphwanyaka, ni anaasaasaxa okhwa opwaha muhakhu woovitheya; 22 yaawosa anghakalala ni antthapa yaarowaka woovithiwani? 23 Omvaheriwani okumi yoole yiipithiheiye ephirowaawe, ni wa yoole Muluku ohimmooniheraawe makhumelo? 24 Vano, ohiya yooca, onkirweela ohihimera; wiipulelawaka onsareya ntoko maahi. 25 Yookirweela koovaaka; yaakoopopiha, yookeereela. 26 Nkinono murettele, hata mmaaleleyo, naari wiitthuuwa; kiri ootthukuruwa paahi.” |
Makhua Shirima Bible © Christelike Lektuurmaatskappy NPC, 2021.
CHRISTELIKE LEKTUURMAATSKAPPY NPC