Yobi 21 - Emakhuwa Bible

Yoowaakhula ya Yobi

¹ Vano Yobi aahaakhula:

² “Ngwiriyane nnenesene maswaaka; wu okhale opepesa muneeraanyu mukivahe.

³ Mukivilele kuulumaka; vano kuulumaleene mpwaherereke okitthebwa.

⁴ Waakhulanawaka khoohiyono ni mutthu piswa. Miyo koophwanela ohipixa murima.

⁵ Mukiwehe miyo ni muumiweke owanoni; mphute iyano.

⁶ Kuupuwelelaka yeeyo, kinnoova; erutthwaaka yootheene enoothukumela.

⁷ Oonanara murima ampwahererela heeni okhala ni okumi, saandyeerereyaka ikurusaya mpaka wuuluvalawaya?

⁸ Awosa angwoona amusaaya oolipeene mukhwipimwaya ni ikhapirasaya vamaithoniwaya.

⁹ Itthokosaya siri soolipasene ni khasinoova; ekopo ya Muluku kheenrwa waavulaliha.

¹⁰ Anapunci a imombesaya kheehiya orelanyiha; imombesaya ithiyana singyara ni khasintatha.

¹¹ Sinaahiya axaanaaya etthimakaka ntoko ipuri, aani antupha ootaphuweene.

¹² Aniipa ettharihaka oruma wa ikoma ni makita; anghakalalela oruma wa mpetta.

¹³ Awosa ongweetteleya nnenesene okumaaya, enavithiwa mmuretteleni.

¹⁴ Hata hiiho, awosa ammweerela Muluku: ‘Munihiye! Khanintthuna iphirosanyu.’

¹⁵ Muluku a ikuru sootheene taani weera nimurumeele? Nimphwanyani namulapa Muluku?

¹⁶ Vaheera saaweettelaka nnene, khoohiyono ni owerawaya; tivawo kihimpwatthaaka ikano sa atakhali.

¹⁷ Vano, imaara ihai yoomwaleela ya atakhali enciphaaya? Imaara ihai sinaamorelaaya irisa, emalihero Muluku onaavahaawe musaranimwawe?

¹⁸ Imaara ihai amvavihiwaaya ni epheyo ntoko malaxi, hiihaale makamba ankuxakuxiwaaya ni eyuupuru?

¹⁹ Eneeriwa weera Muluku onsunga nttaruxo na mutthu wa anamwanaawe. Tiithi muneene attaruxiwe weera asuwele!

²⁰ Maithwaawe muneenaawe yoone oheleyawawe nthala. Owo muneenaawe awure isara sa Muluku a ikuru sootheene.

²¹ Vano yoopwattheleya heeni wa emusi aneeraawe ahiye ottuliwawe saamalaka nyeeri aavaheriwaawe?

²² Taani ongwera omuxuttiha Muluku, eenre Owo aathorihaka mpaka oottittimiheyaxa?

²³ Mutthu mmoha onkhwa ahitekeleiye, oolipeene ni oomaaleleyeene,

²⁴ acaaka nnene ni oolipa makhuva.

²⁵ Vanonto, mutthu mukina onkhwa oothananaxeene, ahitonkoru ohakalala.

²⁶ Mukina ni mukhwaawe aniixaatalela vantthupini, ooweeli esareiyeene nyuungu.

²⁷ Koosuwela nnenesene yeeyo munuupuwelaanyu, okivaanelelawanyu.

²⁸ Koosuwela weera munookoha: “Eri woowi empa ya neethi ni iheema ankhalaayamo atakhali?

²⁹ Khamutonke waakoha atthu aneetteetta? Khamuniiwa yeeyo awosa anthalihaaya?

³⁰ Vano awosa aneera weera oonanara murima anuureliwa muhasarani, ni weera vanihukuni na isara animoopoliwa.

³¹ Taani ommoothera, amooniheraka yoonanara ompakaawe? Taani onimuhokoloxera yoonanara ompakaawe?

³² Vano onroihiwa munihiyeni, nihiyenawe noolipeleliwa.

³³ Makottomola a nihiye khaanimuxupa; ootheene anoomutthara, ni mukuttula woohaalikeleya waarowa ohoolowawe.

³⁴ Nlelo muntthuna okilipihera ni maswaanyu oololo! Seiyo sihanle sa soowaakhulasanyu siri soolokottha paahi!”