Yobi 15 - Emakhuwa Bible

Yoowaakhula yanaaveeli ya Elifazi

¹ Vano Elifazi muTemani, aahaakhula:

² “Musuweli aamwaakhula ni miruku soohimuteko, hoye hoye aamvona epheyo?

³ Aangwera ni masu oohimuteko, ni soowuuluma soohooneleyamo?

⁴ Nyuwo khamummoova Muluku ni munnyoosa omurumeela Yoowo.

⁵ Yootthekaanyu entannya eyanowaanyu; munthanla masu a atthu oocendyera.

⁶ Ti eyanowaanyu enoothorihani, ehikhanle yawaka; iyanosanyu sinookhalelani onamoona.

⁷ Weeraka ti nyuwo mpacenre oyariwa? Weeraka muyariwe ehinaaye mattumuxa?

⁸ Nyuwo mungwiriyanela olaka wa Muluku? Weeraka miruku ti sawinyu paahi?

⁹ Musuwenleni hiyo nihisuwenlaahu? Mwiiwexexo heeni murinaanyu hiyo nihikhalannaahu?

¹⁰ Anayipwi ni oowuuluvalaxa waapwaha atithinyu ari mpattaahu.

¹¹ Khawookwanneni opembesa wa Muluku ni maswaahu oosiveleya?

¹² Muniihiyerani mukuxiwaka ni murima, ni onaarela heeni mmaithonimwanyu?

¹³ Vano nyuwo muningyeehera isarasanyu Yave, mukhumihaka masu ala mmwaanomwanyu.

¹⁴ Ongwereya hai mutthu okhala ootteela? Ongwereya hai mutthu onkhwa wuupuwela weera kookwanela?

¹⁵ Vano waari weera Muluku mpaka khanaaroromela andyelowaawe, ni mpaka irimutho khasimutteenle woomalela,

¹⁶ wootepaxa mutthu oothanyeya ni ootakhala; mutthu ongwura sootakhala ntoko angwureliwaaya maahi.

¹⁷ Mukiwiriyane ni miyo kinimoothaliherani; kinimooleelani yeeyo koonnaaka,

¹⁸ yeeyo asuweli ahimalaaya ehikhuwakaru seiyo aleeliwaaya wa asitithaya,

¹⁹ wa yoowo paahi ovahiwe elapo ni ahinaaye akhalaru namarwa ovinremo:

²⁰ Mutakhali onghaawa makacamiho mookuminimwawe wootheene, hiihotho mutthu oowuuma murima onghaawa mmahukuni ootheene ooniheriwaawe.

²¹ Oniiwa paahi sooruma soowoopiha, iixoonaka okhala mmuretteleni, anamwiiya anoongwanano.

²² Khanoona matthawelo epiphi; olakeleliwe ekatana.

²³ Onkhala oovalaveleene; ti yooca ya marepo; oosuwela nnenesene weera mahuku a epiphi aakhuveela.

²⁴ Makacamiho ni othanana anoomutondolowiha, enamukhulumula ntoko mwene oolikaneene owana,

²⁵ niwoko aampakela mpikisano Muluku, amuramusaka Muluku a ikuru sootheene,

²⁶ angwananaka moota woowuuma murima ni exikudu* ya mwiitti ni yoolipa.

²⁷ Ekhovaawe eroosareyaru makhura ni eyuunu yoowaatta yooneneva,

²⁸ onoomaka musidadeni soophwatiwa, mpaani moohimakeya, siphottomowaka.

²⁹ Khapuhatho; mihakhusawe khasilekela ni sooreelasawe khasimwareela mulaponi.

³⁰ Khawera woopowa mpiphini; mooro onoorusula iphuwelasawe, ni iphumu sa mmwaano mwa Muluku sinoommaliha.

³¹ Owo ahiilokotthe ororomela yeeyo ehimuteko, niwoko khaakhelaru etthu ntoko ntthuvelo.

³² Ehiphiyenre ehuhuwaawe, eyo enookwaniheriwa ni khaphuwelatho.

³³ Onuukhale ntoko evideira* emmora soowiimasaya sireene ikithi, aani ntoko mwiri wa sooliveira* ommala omora ithutusaya,

³⁴ niwoko mukhwaayaxa atakhali khaaruuhelaru etthu, ni mooro onoolaliha iheema sa yaawo ansivela makhwankwa.

³⁵ Awosa anrupala yoonanara, enayara sootakhala; aani angyara soolokottha.”