Yobi 11 - Emakhuwa Bible

Onuuluma ti Zofari

¹ Vano Zofari muNaamati, aahaakhula:

² “Ontthuneya waakhula maswaawe ala mancipale. Khaningwera omwaakhulela nayano ola.

³ Otthekulawanyu wa osikini onimwaamaaliha atthu? Khaawo anaahiihe mootthebwanimwanyu?

⁴ Mummweerela Muluku: ‘Kinghima ettiitthu ni kiri ootteela ohoolowanyu.’

⁵ Ii! Kaatthunaxa weera Muluku ooleenleni, weera ahime woolakelelaniwanyu.

⁶ Owo awoonihereni exiiri ya mirukusawe! Vano miruku sa ekhaikhai simpwaha seiyo muniiwexexaanyu. Musuwele weera Muluku oottiwala sootthekasanyu sikina sikina. Muluku khanoottaruxani attharihaka sootthekasanyu.

⁷ Nyuwo munoowera ophima mitikhinelo sa Muluku? Munoowera oringa nyiinano sa Muluku a ikuru sootheene?

⁸ Ti soorakamaxa opwaha erimu! Mmwipakeni? Ti soowiixeraxa opwaha moowiixera! Mmwisuweleni?

⁹ Mweerakamelonimwaya ti otokotoko opwaha etthaya, ni mweekhuveelonimwaya ti otokotoko opwaha ephareiya.

¹⁰ Owo alamulela otthukiwa, anatthunihera oronghiwa onuulummwa milattu, taani anaamukhoottele?

¹¹ Owo ohaasuwela anamootha ni weiwo eraayawo yoonanara, Owo onnoonaxa.

¹² Vaheera hiiho ntoko ohingwereyaaya buuru a mutuphini omuyara mwaaxaana mulopwana, hiihotho khoongwereya weera mulolo athatuwe musuweli.

¹³ Wa soothesene, mwamutteelihera murima Yoowo, munamutheteela matata;

¹⁴ mwasusiha soottheka siri mmatatanimwanyu, muhinatthunihera weera yoonanara emake mpaanimwanyu,

¹⁵ vano nyuwo munoottukhula ekhove muhuulihiheyaka muru; munookhala oolipeene ni oohoova.

¹⁶ Nyuwo munoottiwala irisasanyu, muupuwelelaka paahi ntoko maahi avinre.

¹⁷ Okumaanyu onimwaara opwaha nsuwa nri vamuru, ni mpaka epiphi eniithatuwe ntoko ekamaama ya oxa.

¹⁸ Nyuwo munookhala oolipeene niwoko wookhala oweherera; munooweha mukhwipi, ni munimwiitthuuwa oolipeene.

¹⁹ Nyuwo munimwiixaatalela, ni khaawo anootannyereni woova, ni ancipale animwaasaasa murimaanyu wooreera.

²⁰ Vaheera oonanara murima anoothatuwa oohoona, yaasaka wootthawelawo woohiphwanya; owehererawaya onuukhale ohihimera wa okhwa paahi.”