Yobi 1 - Emakhuwa Bible

Yobi ni emusaawe

¹ Mulaponi ya wUzi aakhala mulopwana iitthaniwa Yobi. Aari mulopwana ookwanela ni oororomeleya; annamoova Muluku, asembaka opaka sootakhala.

² Owo aakhalano anamwane asilopwana athanneeli ni anamwane asithiyana araru,

³ ni aakhalano ikhondoolo macira miloko mithannamiili, ikamelu* macira miloko miraru, imombe seettaka piili piili macira mathanu ni abuuru macira mathanu, mpakatho arumeiyi ancipale. Aari mulopwana oopuhaxa a mpatta ninkhuma nsuwa.

⁴ Anamwane asilopwana yannakhovelela opaka ifesta owaani, khula mutthu emaaraawe, ni yannaalattula axirokoraya araru weera ece ni ewureno.

⁵ Yaamalaaya ehuhu ya ifesta, Yobi aalamulela wiitthanasiwa ni aapakiha weera etteelihiwe. Annapeherera opaka sooveleela soohisa aweerelaka yaawosa, niwoko uupuwela: “Apaale anamwanaaka aampahula Muluku mpuwamwaya, emutthekelaka ni emulaphaka Yoowo.” Eyo yaari epakelo ya Yobi.

Satana ontthuna omoota murima Yobi

⁶ Nihuku nimoha, andyelo yaahoorwa wa Yave, ni Satanatho aahoorwa ni yaawosa.

⁷ Yave aamukoha Satana: “Munrweela woowi?” Satana aamwaakhula Yave: “Orukureera mulaponi kiviraviraka mwemmo.”

⁸ Vano Yave aamukoha Satana: “Moomoona murumeiyaaka Yobi? Khawoworu mukina mulaponimu ntoko yoowo, oohihuluxeya, ookwanela ni mulopwana ommoova Muluku, asembaka opaka yootakhala.”

⁹ Satana aamwaakhula: “Owo ongwoovani Nyuwo niwoko na omooniherawanyu murima wooreera.

¹⁰ Moomurukureerihela exiri yoomwaakiha yoowo, emusaawe ni sootheene oraaweno. Nyeenyuweene mooreeliha sootheene ompakaawe, moota wooweera mihuwosawe sootheene soomwareela mulaponi yootheene.

¹¹ Mene mutheteye ntatananyu ni mvulalihe sootheene owo oraaweno, ni woohihovela, owo onimoolaphani ohoolowanyu.”

¹² Yave aamweerela Satana: Paahi, sootheene owo orinaawe siri mmatatanimwanyu; mene muhimutaveru yoowo.” Vano Satana aavenya vamaithoni wa Yave.

Yobi ongyeleela sootheene

¹³ Nihuku nimoha, anamwane asilopwana ni asithiyana a Yobi yaaraaya wafestani, ecaaka ni ewuraka eviinyu vaate wa munnaya mutokweene,

¹⁴ namutthenga mmoha aahoorwa omuleela Yobi: “Imombe seera sittipuraka ni abuuru yeera ecihiwaka mukhiviru,

¹⁵ yaawananaaya aSabeyani enaakuxasa. Yaawiivakasa ni ekatana arumeiyi ootheene. Ti miyo paahi koopongwe weera koothalihereni!”

¹⁶ Nlelo owo uulumaka, aaphiya namutthenga mukina aneera: “Mooro wa Muluku woomora wiirimu, onahisa woomalela ikhondoolo ni arumeiyi. Ti miyo paahi koopongwe weera koothalihereni.”

¹⁷ Nlelo owo uulumaka, aaphiya namutthenga mukina aneera: “Yaahoorwa aKaldeya mikuttula miraru, yaavoleela ikamelu*, enarowano. Yaawiivakasa ni ekatana arumeiyi. Ti miyo paahi koopongwe weera koothalihereni!”

¹⁸ Nlelo owo uulumaka, aaphiya namutthenga mukina, aneera: “Anamwaniinyu asilopwana ni asithiyana, yaari wafestani, ecaaka ni ewuraka eviinyu vaate wa munnaya mutokweene,

¹⁹ wootutuxereya yaaphiya epheyo etokotoko yaarweela onikareni, enamana malootho maxexe a empa, enaakurumuwela. Awosa ahookhwa ni ti miyo paahi koopongwe weera koothalihereni!”

²⁰ Yobi iiwaka yeeyo, aaheemela, anaahula mukaandyo ni anamettha. Vano aahuuramihela ekhove vathi moolapani,

²¹ aneera: “Kikhumale woohiwara mmirimani mwa amayaka, ni nkittimuletho woohiwara. Yave aakivaha, ni Owo ookuxa; Nsina na Yave nittottopeliwe.”

²² Waarookhalaru hiiho, Yobi khaatthenke ni khaamoothenreru Yave.