Yesaya 9 - Emakhuwa Bible

Olamula woororomeleya wa mwene onrwa

¹ Wa soothesene, kheekhalatho epiphi wa yaale yaakacamiheiye. Khalayi Owo aayeviha elapo ya Zebuloni ni Nafitali, vaheera muhoolommo Owo onoottittimiha elapo ya oGalileya ya amalapo, musewe wa mphareiya, mukerekhere Yordanu.

² Muloko weetta mpiphini waahoona waara otokotoko; waara waahaamwaleela yaale yaakhala mweelaponi ya munttuusi wa okhwa.

³ Nyuwo mohunnuwiha muloko ni mohaandyeerera ohakalalawaya; awosa anghakalala vamaithoniwanyu ntoko atthu anghakalalelaaya ohepha ni ntoko atthu antteeliwaaya ekawanaka soohuhula mukhottoni.

⁴ Vano Nyuwo moopwexa yoolemela yaahasula, etthaabwa enlimano emombe yaari mmakhatanimwaya ekopo yaattaruxelaayano anamahasula, ntoko nihuku na owiniwa wa oMediya.

⁵ Iboota sootheene sa nakhotto singwareliwa mukhottoni ni soowara sootheene soosareya ephome sinoohisiwa ntoko ikhuuni vamooroni.

⁶ Wa hiyo nooyareliwa Mwaana; wa hiyo noovahiwa Mwaana Mulopwana ni olamula ori mmakhatanimwawe. Owo onimwiitthaniwa Namalaka Ooreeraxa, Muluku a ikuruxa, Tiithi Oohimala ni Mutokweene a murettele.

⁷ Olamulawawe ni murettelaawe khoommala. Owo onoolamula vahiceni ya Davide ni wa omwenaawe akhalihaka ni apwahererihaka yoowo ni ororomeleya ni ekhaikhai, okhuma ehuhuweene yeeyo mpaka khalayi. Nthiti na Yave a ikuru sootheene nnooweriha yeeyo.

Othorihiwa wa wiixoona ni ohasuliwa

⁸ Yave oorumihela mutthenga emusi ya Yakobe, mutthenga owo woophiya oYixrayeli.

⁹ Atthu ootheene anoosuwela yeeyo – awErayimi ni amaki a oSamariya, mwa yaawo aneera ni murima woowiixoona ni woowiikuxa:

¹⁰ “Indyerwa soomora, mene hiyo nnoorasela ni maluku ookheriwa; nyiri sa efiigu* sohuuhiwa, mene nnoottiyattiyera ni nyiri sa esedari*.”

¹¹ Vaheera Yave aahaalipiha amwiittana a Rezini weera yaawaneno anakhottwaawe ni aahaatannya amwiittanaaya.

¹² awArami a mpatta ninkhuma nsuwa ni aFilisti a mpatta ninkela nsuwa yaanyaanya woomalela oYixrayeli. Sirookhalaru sootheene iye, isara sa Muluku khasihapungwe ni ntatanawe nri etheteeliwo.

¹³ Vaheera muloko khawaamurukunuwenle Yoowo aavulalinghe, naari khawaamwaanse Yave a ikuru sootheene.

¹⁴ Tivawo Yave aneeraawe akwase oYixrayeli okhuma waamuru mpaka waametto; aani kancesa ni ettheere munihukuni nimoha.

¹⁵ Asitokweene ni asilopwana oottittimiheyaxa ti muru ni maprofeeti anxuttiha soowootha ti waametto.

¹⁶ Yaale anghooleliwa a muloko owo annalokottha yoowo ni yaale anghooleeliwa anoothweelelihiwa.

¹⁷ Tivawo Yave ohinaahakalalelaawe amiravo hata ohinaamorelaawe ikharari akwaasuni naari asinaamukhweli, niwoko ootheene aamurakamela Muluku ni a murima woonanara, anuuluma moota woohiloka. Sirookhalaru sootheene iye, isara sa Muluku khasihapungwe ni ntatanawe nri etheteeliwo.

¹⁸ Vekhaikhai sootakhala singhisa ntoko mooro; seiyo sinimuhisa rupulula ni nyiiwa. Simpattiha maphuwa a moothakoni sitthuwiheraka mwiixi wiirimu.

¹⁹ Elapo enoohisiwa niwoko isara sa Yave a ikuru sootheene ni atthu anoovareliwa muteko weera mooro owo opwaherere; khawowo anaamuurele munneiye.

²⁰ Awo anookhuura mpatta wa moono woolopwana, mene kheevona; anookhuura mpatta wa moono woothiyana, mene kheekwaneya. Khula mutthu onookhuura erutthu ya munneiye.

²¹ Manaxe onoomukhuura Efrayimi ni Efrayimi Manaxe. Eeli ale anoongwanano Yuda. Sirookhalaru sootheene iyo, isara sa Muluku khasihapungwe ni ntatanawe nri etheteeliwo.