Yesaya 8 - Emakhuwa BibleMwaana mulopwana a Yesaya ti eneneero ya ovolowa mulaponi 1 Yave aakeerela: “Mukuxe nivali nooreerela ni mwalepemo moota woowiiweya: ‘Maher-Xabali-Haxi-Baze.’ 2 Miyo kinoomwiitthana musaserdoti* Uriya ni Zakariya, mwaana mulopwana a Yeberekiya ntoko anamoonaaka oororomeleyaxa.” 3 Vano kaarowa wa mprofeeti muthiyana ni owo aarupala, anamuyara mwaana mulopwana. Vanonto Yave aakeerela: “Munttehe ‘Maher-Xabali-Haxi-Baze.’ 4 Mwaana ola ahinaaye osuwela weera ‘tiithi naari’ maayi, mwene a wAsiriya onookuxa mihakhu sa oDamasku ni soohuhula sa oSamariya.” 5 Yave aakeerelatho: 6 “Weenre muloko ola okhootta maahi a oXilowa ampiluwaxa ni omuhakalalelaka Rezini ni mwaana mulopwana a Remaliya, 7 Yave onimwaaruuhela maahi oowuupaxa a Efratesi – mwene a wAsiriya ni ikurusawe sootheene. Mooloko owo onoosareya mmiroranimwaya moothemwene okhopela ni okhopela 8 ni anoomwareela oYuda, emireihaka mpaka muxiko. Mapuphaaya ookungeyeene anookhuneela elapwaanyu yootheene, Emanuweli!” 9 Ii! Nyuwosa miloko, mukhuweleleke ekhotto ni munoophwatasiwa! Mwiiwe nyuwosa ilapo sa ottai. Hata mwiirehererelaka okhottoni munoophwatiwa! Aani, naari mwiirehererelaka owana munoophwatiwa! 10 Naari nyuwosa mpakaka miruku, iyo sinoopupurumiheya; naari mvaanelaka, khasiweettelani nnene, niwoko Muluku ori ni hiyo. Mmoove Muluku 11 Yave aahuuluma ni miyo, akilipiheraka ni okooperera weera kihitthare ephiro ya muloko ola. Owo aakeerela: 12 “Muhiitthanele ‘yoovaanelela’ sootheene seiyo muloko ola oniitthanaaya ‘yoovaanelela’; muhoove seiyo owo onoovaaya hata muhithukumele. 13 Yave a ikuru sootheene ti Yoowo ontthuneya omoonela Ootteela; ti Yoowo ontthuneya omoova ni omuthukumela. 14 Wa omwene miili wa oYixrayeli Owo onookhala Nipuro Nootteela*, mene onookhalatho Nluku Nookwattula ni Mwala oowuuwiha. Ni onookhala Ntapha ni Muraakho wa amaki a oYerusaleemu. 15 Ancipale a yaale anookwakwathuwa; anoomora ni anookakatthanyiwa; anoopharihiwa munraakhoni evariweke.” 16 Muthokorore nnenesene Nlamulo ni mulipihe soolamulasaka eriyari ya oohuseraaka. 17 Kinooweherera mwa Yave, mwa Yoowo oniipithihera ekhovaawe ekhapira ya Yakobe. Mwa Yoowo kinoomuroromela. 18 Miyo kiri va vamoha ni anamwane Yave okivanghaawe. Hiyo nri ineneero ni icaambulo oYixrayeli sinrweela mpatta wa Yave a ikuru sootheene, mwa Yoowo ommaka vamwaako Siyoni. 19 Akhala mukina ongweerelani: “Mwaakohakohe yaale anaahera ihako ni anuuluma ni anamakhwa, yaapaapaka ni yuulumaka muxiirini,” vano khoontthuneya weera muloko omukoherere Mulukwaaya? Munaakohererela heeni anamakhwa ngweerelaka akumi? 20 Vano moone Nlamulo ni ikano sa Yave! Atthu yaahuuluma ntoko masu ala awosa khaanoonatho waara. 21 Awosa oothananeene ni oovoliweene anooxoraxora mweelaponi. Yaavoliwaka etala, anoonyoonyiwa ni, yaawehaka osulu, anoomulapha mwenaaya ni Mulukwaaya. 22 Vahoolowaya anooweha vathi, yooneke othanana ni epiphi yoowoopiha paahi ni anoovonyeriwa mpiphini moohoonaniwa. |
Makhua Shirima Bible © Christelike Lektuurmaatskappy NPC, 2021.
CHRISTELIKE LEKTUURMAATSKAPPY NPC