Yesaya 7 - Emakhuwa Bible

Eneneero ya Emanuweli

¹ Vano Ahazi, mwaana mulopwana a Yotami, mwaana mulopwana a Uziya, aaraawe mwene a oYuda, mwene Rezini a awArami ni Peka, mwaana mulopwana a Remaliya, mwene a oYixrayeli yaarowa weera ewaneno oYerusaleemu, mene khayaawenre owina.

² Vano mwene aaleeliwa: “awArami aawiiraanano awEfrayimi.” Hiiho murima wa Ahazi ni mulokwaawe waathukumela, ntoko nyiri sa moothakoni siniinihiwaaya ni epheyo.

³ Vano Yave aamweerela Yesaya: “Murowe nyuwo ni mwaninyu mulopwana, Xeyari-Yaxubi, ni mwamukumaneno Ahazi vayiikalaandeni a vanrattani na osulu, mmuseweni onkela wa Ematta ya Namakattha.

⁴ Mwamuleele: ‘Mwiipasoope, mwiimaalihe ni muhoove. Muhiporore niwoko na ikhuuni piili iya sintthuwa mwiixi – niwoko na isara sa Rezini ni Arami ni sa mwaana mulopwana a Remaliya.

⁵ Vano Arami, Efrayimi ni mwaana mulopwana a Remaliya aavaanelela ophwatiwawanyu, yeeraka:

⁶ “Nivoloweke oYuda, niphwateke ni nikawaneke variyariwahu ni nimukhaliheke mwaana mulopwana a Tabeheli mwene a elapo eyo.” Yave onlamula soothesene oneera ha: “Khookhala hiiho.”

⁷ Wa soothesene, eyo khayeereya,

⁸ niwoko muru wa awArami ti oDamasku ni muru wa oDamasku ti Rezini paahi. Sihivinreene iyaakha miloko mithannamosa ni iyaakha ithanu, awEfrayimi anoophwatiwa moota wooweera khoongwereya opwahereratho ntoko muloko.

⁹ Muru wa Efrayimi ti oSamariya ni muru wa oSamariya ti mwaana mulopwana a Remaliya. Nyuwo mwaahilipa munroromeloni, woohihovela khamulekela.’ ”

¹⁰ Yave aamweerelatho Ahazi:

¹¹ “Mumvekele Yave Mulukwaanyu eneneero yootikhiniha, ekhaleke yoowiixeraxa naari yoorakamelaxa osulu.”

¹² Vaheera Ahazi aamwaakhula: “Nkimvekela; nkirwa kimoota murima Yave.”

¹³ Vanonto, Yesaya aaheera: “Hear Mwiiwe, nyuwo emusi ya Davide. Khawookwanneni waakhulumula atthu? Munimootatho opixa murima wa Mulukwaaka?

¹⁴ Tivawo Yave muneene aneeraawe oovaheeni, eneneero: mwaamwali oowiikosoopa onoorupala, amuyareke Mwaana Mulopwana ni onoomutteha Emanuweli.

¹⁵ Owo onimooca manteeka ni oravo mpaka aneeraawe unnuwe, aweraka othanla yooreera ni yoonanara.

¹⁶ Vano mwaana owo ahinaaye osuwela othanla yooreera ni yoonanara, ilapo sa mamwene meeli awo munoovaanyu sinooheleya nthala.

¹⁷ Yave onimooruuhelasani mwene a wAsiriya, wa mulokwaanyu ni emusi ya atithinyu. Eniikhale ehuhu ehitonke okhala mmahukuni a khalayi okhuma wEfrayimi waamwalannaaya ni oYuda.”

¹⁸ Vanihukuni nenenenno Yave onimoopa muturi weera awiitthane amukaanga a ottai wa nyooloko sa wExipitu ni oravo wa wAsiriya.

¹⁹ Sootheene iyo sinimowa seemeleke mphattuwelani moowiixera ni mmakhukuni a vamwala, esareyaka nyiri sa nyiiwa ni mmattankhini moothemwene.

²⁰ Vanihukuni nenenenno Yave onoovarela muteko nimettho aneeraawe oolihe okhopela Efratesi – mwene a wAsiriya – weera ametthe mayihaanyu, mapururu a mmettonimwanyu ni irerusanyu.

²¹ Vanihukuni nenenenno mulopwana anaakhaleno emombe ethiyana ni ipuri piili,

²² onookhalano manteeka weera ace niwoko na waatta wa mukaka sineeraaya sivahe. Ootheene eniihale mweelaponi animooca manteeka ni oravo.

²³ Vanihukuni nenenenno mmapuroni moothemwene saaraayamo imatta sa iwuuva* macira miloko a ixekeli* macira muloko a eparatha* onookhala rupulula ni nyiiwa paahi.

²⁴ Asilopwana anoovolowano nyuura ni nyuupa niwoko elapo enoosareya rupulula ni nyiiwa.

²⁵ Mmattumuxani khalayi waalimmwamo ni ehipa, nyuwo khamunrowatho niwoko na woopiha wa rupulula ni nyiiwa. Mmapuroni mmo imombe sinootaphuwa ni ikhondoolo sinootthimakamo nnenesene.