Yesaya 63 - Emakhuwa Bible

Wiinleliwa ikuhu wEdomi

¹ Taani ole onrweela wEdomi, oBozera, soowarasawe sittikittheliweene yooxeera? Taani ole owanre mukaandyo woovuwaxa, aanulaka malipa mukurunimwawe sitokotoko? “Ti Yoomi kinuuluma mweekhaikhaiyini, oowera ovuluxa.”

² Sixeerenleni soowarasanyu ntoko sa yoole omvotta iwuuva* mmattankhini moowaama iwuuva*?

³ Koovotta iwuuva* mmattankhini moowaama iwuuva* meekhaaka; variyari wa miloko khawoworu aari ni Miyo. Koovotta seiyo kinyoonyiweene, kiwattaka musaranimwaka; ephomaaya yoottonyera mukaandyowaaka ni kooninga ikuwosaka sootheene.

⁴ Vano nihuku na ikuhu naari mmurimwanimwaka ni eyaakha ya woopola yoophiya.

⁵ Kaawehaweha, mene khaakhanleru ookikhavihera; kaatikhina kahaamoonaaka ookikhavihera, tivawo moonowaaka waawenraaya ovuluxa ni isarasaka saakikhavihenraaya.

⁶ Koovotta miloko moonyoonyiwanimwaka ni musarinimwaka koohapaliha kinayeehera ephomaaya vatthayani.

Wuupuweleliwa wa ikharari sa Yave

⁷ Kinimuuluma sa murima wooreera wa Yave, sa mitekosawe sootikhinihaxa – sootheene onipakenlaawe, aani itthu sooreera sincipale opakenlaawe ekhapira ya Yixrayeli niwoko na ikhararisawe ni murimaawe wooreera mutokotoko.

⁸ Owo eenre: “Vekhaikhai awosa ti mulokwaaka, anamwane asilopwana eneera ehikivarihe”; ni hiiho oothatuwa Mvuluxaaya.

⁹ Moothanananimwaya moothemwene Owo aathananatho ni ndyelo a okhalawawe aahaavuluxa. Owo aawoopola moosivelanimwawe ni mukhararinimwawe. Ti Yoowo aavenxa, aweettihaka mmahukuni a khalayi.

¹⁰ Waarookhalaru hiiho awosa yaamurukunuwela, enathananiha Munepaawe Wootteela. Tivawo Owo aathatungwaawe Mwiittanaaya ni Owo muneenaawe aahaawanano.

¹¹ Vano mulokwaawe waahuupuwelela mahuku a khalayi, mweehuhuni ya Moisesi ni ekhapiraawe: Ori woowi Yoole aavirihale mphareiya ni mukukhuli a muhuwaawe? Ori woowi Yoole aakhalinghe Munepaawe Wootteela variyariwaya

¹² ni ookonle moonowaawe woovuwaxa weera okhale moonowaawe mulopwana wa Moisesi, Yoole aakawanyinghe maahi ohoolowaya weera akwanihere epili yoohimala?

¹³ Ori woowi Yoole aahoolenle aavirihaka moowiixera? Awosa khayaakwakwathungwe ntoko ekavalu* mweelaponi yoothanuwa.

¹⁴ Ntoko imombe sinrowa omuhawalawani, awosa aavahiwa wiitthuuwa ni Munepa wa Yave. Ti hiiho Nyuwo mweettinghaanyu mulokwaanyu weera mwiipakele Nsina noovuwaxa.

¹⁵ Ngwehe wiirimu woorakamela ni moone mukilaathiyeene vahiceniwanyu ya osulu, yootteela ni yoovuwa. Nri woowi nthitinanyu ni ikurusanyu? Murimaanyu wooreera ni ikhararisanyu nohiimaniwa.

¹⁶ Wa soothesene, Nyuwo ti Atithihu. Abrahaamu khanisuwenle ni Yixrayeli khanaanoonne; Nyuwo, Yave, ti Atithihu ni okhuma khalayi muniitthaniwa Mvuluxaahu.

¹⁷ Yave munneettiherelani ottai wa iphirosanyu ni munnuumiha murimaahu weera nihoottittimiheni? Muhokolowe mwaha wa arumeiyaanyu, ipuumba siri yoohiyeraanyu.

¹⁸ Mulokwaanyu waakuxa Nipuronanyu Nootteela* wa ehuhu vakhaani, mene vano amwiittanaahu aanyikalela Empaanyu Yootteela.

¹⁹ Okhuma khalayi hiyo nri awinyu, mene Nyuwo khamunaalamulele yaawo; awosa khaaniitthaneliwe Nsinananyu.