Yesaya 61 - Emakhuwa Bible

Mutthenga wooreera wa woopoiwa

¹ Munepa wa Yave ori mwa miyo, niwoko Yave ookittikitthela weera kaalaleere oohaawa mutthenga wooreera. Owo ookirumiha weera kaakosoope yaale arino murima woothananaxa, weera kaalaleere otaphuwa anamatthukiwa ni kaatapuxe mpiphini yaawo ari mukaliposo.

² Ookirumiha weera kilaleiye eyaakha ya murima wooreera wa Yave ni nihuku na ikuhu sa Mulukwaahu, weera kaapepese ootheene anlalamika ni

³ kaakosoope yaale aniinla oSiyoni kaavahaka ecireemba yooreera vanipuroni na ettuura, makhura a ohakalala vanipuroni na olalamika ni mukaandyo wa ottottopela vanipuroni na munepa wooriipiwa. Awosa animwiitthaniwa ikaravalyu* sa ororomeleya soophatteiwa ni Yave ntoko eyoonihero ya ovuwawawe.

⁴ Awosa anoorasela milepe sa khalayi ni anooreherera mapuro oophwatiwa mweehuhuni sivinre. Awosa anooreherera isidade sooheliwa nthala saahuhuliwe ni ikhapira ti ikhapira.

⁵ Anamarwa anookosoopa mihuwosanyu, aani anoovara muteko mmattamwanyu ni mwa iwuuva*.

⁶ Nyuwosa munimwiitthaniwa asaserdoti* a Yave, munoottehiwa anamarumeela a Mulukwaahu. Munimooca sa mihakhu sa miloko, mwiivuwiheraka seiyo yiivuwiheraayano.

⁷ Mulokwaaka onimwaakhela iphura sa ettima vanipuroni na oyevihiwa ni onoohakalalela yoohiyeriwaaya vanipuroni na wuulihiheya muru. Hiiho onimwaakhela iphura sa mweelaponimwaya ni ohakalala woohimala onookhala wawaya.

⁸ Vano Miyo, Yave, kinsivela ekhaikhai; kinthanya wiiya ni sootakhala sootheene. Moororomeleyanimwaka kinimwaavaha ntthuvelo ni kinoopaka wiiraana woohimala ni yaawo.

⁹ Ikhapirasaya sinoosuweliwa eriyari ya miloko ni anamwanaaya eriyari ya amalapo. Ootheene eniiwoone animwaakhulela weera awosa ti atthu ooreelihiwa ni Yave.

¹⁰ Kinimuhakalalelaxa Yave, munepaaka onimuhakalalela Mulukwaaka. Niwoko Owo ookiwariha ni soowara sa ovuluxiwa ni ookikuttelelano mukaandyo wa ekhaikhai, ntoko namatthomera omphwaneliha murwaawe alikanaka musaserdoti* ni ntoko ootthomeriwa oniiphwaneliha ni axiveeve.

¹¹ Vano hiiho ntoko etthaya emmelihaaya maphuwa ni nttimbe nimmelihaaya inuku, hiihotho Yave onlamula sootheene onookhaliha ororomeleya ni ottottopela ohoolo wa miloko sootheene.