Yesaya 60 - Emakhuwa Bible

Othukumanyihiwa wa oomwaraxiwa

¹ “Mvenye, mwaare, niwoko waarawanyu wohoorwa ni ovuwa wa Yave onoomwaleelani.

² Moone, epiphi enkhuneela elapo ya vathi, ewiriphi eri vasulu wa miloko, mene mwa nyuwo onoomwaleelani Yave ni ovuwa wa Yave onooneya mwa nyuwo.

³ Miloko sinimoowa ngwaaraniwanyu ni mamwene ngwaarani wa oxeexelowaanyu.

⁴ Muttukhule maitho ni ngwehe mukhwipimwanyu: ootheene anthukumana, yoowehakani; anamwaniinyu asilopwana anrweela ottai ni anamwaniinyu asithiyana anrwa ekuxiweene veetthuuri.

⁵ Vano munimoona ni munoosareya waara; murimaanyu onookhalano ikuru ni onoosareya ohakalala; mihakhu sa ephareiya munooruuheliwa ni wa nyuwo mihakhu sa miloko sinimoorweelani.

⁶ Mukuttula wa ikamelu* onoosareya elapwaanyu, ikamelu* inyowani a oMidiyani ni wEfa. Ootheene a oXeba animoowa ekunxeene eyuuma yoorikaxa ni erubani* elaleiyaka ottottopeleya wa Yave.

⁷ Mihuwo sootheene sa oKedari sinoothukhumanyihiwa wa nyuwo; anapunci a oNebayoti animoorumeelani ni awosa animwaakhuleliwa ntoko sooveleela valtaariniwaka* ni kinoophwaneliha Empaaka yoovuwaxa.

⁸ Awosa taani amvava ntoko mahutte, ntoko ikhunda sivavelaka mpuurunimwaya?

⁹ Vekhaikhai, icirumba sinkiweherera Miyo; oopacera ti makula matokotoko a oTaresesi yaaruuhaka anamwaniinyu okhuma ottaiwene, ekunxeene eparatha* ni eyuuma yoorikaxa wa nttittimiho na Yave Mulukwaanyu, Ootteela a oYixrayeli niwoko Owo ohiiwariha waara.

¹⁰ Anamarwa anoorasela ixirisanyu ni mamwenaaya animoorumeelani. Naari koomanakani kinyoonyiweene, ni murima wooreera kinoowooniherani ikharari.

¹¹ Milakosanyu sinoopwaherera ohuleya mahuku ootheene ni seiyo khasirwaru siwaliwa – ohiyu naari othana – weera atthu yooruuheleni mihakhu sa miloko, mamwenaaya ereene oopacera oruuha.

¹² Vano muloko hoye hoye omwene ohintthuna woorumeelani onooriheya; owo onoohononaxiwa.

¹³ Ovuwa wa oLibanu onimoorwa wa nyuwo – nyiri sa epinyeiru* vamoha ni abetu* ni goferi*, weera ephwanelihe Nipuronaka Nootteela*, ni Miyo kinoovuwiha nipuro na inaawosaka.

¹⁴ Anamwane asilopwana a anamahasulaanyu animoowa ekokhorelaka vanaawoniwanyu; ootheene anoothanyani anookokhorela inaawosanyu ni anoowiitthanani Esidade ya Yave; oSiyoni wa Ootteela wa oYixrayeli.

¹⁵ Naari muhiiwaka ni muthanyiwaka ahikhalaka ontthuna oviraviramo, kinimookhalihani ovuwa woohimala ni ohakalala wa ikhapira sootheene.

¹⁶ Munoowura mukaka wa miloko ni munimwaamwihiwa ni asithiyana a maneethi. Vano nyuwo munoosuwela weera Miyo, Yave, ti Mvuluxaanyu ni Namoopolaanyu, Namaweraxa a Yakobe.

¹⁷ Kinimooruuhelani eyuuma yoorikaxa vanipuroni na ebronze* ni eparatha* vanipuroni na eyuuma. Ehikhanle etthaabwa kinimooruuhelani ebronze* ni eyuuma vanipuroni na maluku. Kinoopaka murettele mwa guvernadooraanyu ni ekhaikhai namalamulaanyu.

¹⁸ Mulaponimwanyu khawiiwanyeyatho wuulummwa sa mapuhero naari sa mathala a ophwatiwa mmwiinanonimwanyu, mene munimwiitthana ixirisanyu Ovuluxa ni milakosanyu Ottottopela.

¹⁹ Nsuwa khanikhalatho waarawanyu wa othana naari mweeri moohiyuni, niwoko Yave onookhala waarawanyu woohimala ni Mulukwaanyu onookhala ovuwawanyu.

²⁰ Nsuwananyu khanneela naari mweeraanyu khoolakaseya; Yave onookhala waarawanyu woohimala ni mahukwaanyu a othananaxa anoomala.

²¹ Vanonto mulokwaanyu wootheene onookhala woororomeleya ni onookuxa elapo wa mahuku ootheene. Awosa ti niphuwa kiphatteiyaaka, muteko wa matataaka ntoko eyoonihero ya ovuwawaka.

²² Emusi eri vakhaani enoothatuwa macira muloko ni ooyevaxa a nyuwo muloko wooweraxa. Miyo ti Yave, mweehuhuni yootthuneyaxa kinoopaka yeeyo woowaakuveya.”