Yesaya 59 - Emakhuwa Bible

Ohiroromeleya ni ohasula onoothorihiwa

¹ Vekhaikhai moono wa Yave khookhuveiye woohiwera woovuluxani hata maaruwaawe khaattiyeiye woohiwera wiiwa.

² Mene sootthekasanyu sinoomwalamwaxani ni Mulukwaanyu; ti niwoko na sootakhalasanyu Owo oohulungwaaweni moota wooweera Owo khawiiwani.

³ Vano matataanyu aasareya ephome ni ikathasanyu soosareya mathowa. Iyanosanyu sinuuluma soowootha ni malumaanyu anlokolola itthu soonanara.

⁴ Khawoworu oniitthana onuuluma mulattwaawe ni ekhaikhai; khawoworu onaakiha nthowanawe ni murima wa ekhaikhai. Awosa anroromela soowuuluma sa siiyo ni masu oowootha; awosa anrupala sookacamiha ni angyara soonanara.

⁵ Awosa anrela mooce a enowa ni animutthava ttandaasi. Yoowo onca moocaaya onimookhwa, ni nooce nimoha noopwexiwa, enkhuma evili.

⁶ Ttandaasaaya khangwareya; awosa khaangwera wiikuttelelano yeeyo ampakaaya. Mitekosaya ti soonanara ni soopaka sa nipuhero siri mmatatanimwaya.

⁷ Inaawosaya sintthimakela yoonanara; awosa khaampisa oyeeha ephome yoohinthowa. Soowuupuwelasaya ti soonanara; ophwata ni ohonona ti ineneero sa iphirosaya.

⁸ Awosa khaansuwela ephiro ya murettele; kheewowo ekhaikhai mphironimwaya. Aatatuxa seiyo iphiro sookhoromana ni yoowo anaaviremo khasuwela murettele.

⁹ Vano ekhaikhai eri ottaiwahu ni ororomeleya khoonniphwanya. Hiyo ninaasa waara, mene sootheene siri epiphi; ninaasa waara, mene nineetta mmunttuusini woowiilihana.

¹⁰ Hiyo ninaapapela exiri ntoko oohoona naasaasaka ntoko atthu oohikhalano maitho. Ninkwakwathuwa othana ntoko oreene ohiyu. Variyari wa oolipa hiyo nri ntoko anamakhwa.

¹¹ Ootheene hiyo nnoopa murika ntoko ursu*; nniipulela ntoko ikhunda. Hiyo nnimwaasa ekhaikhai, mene khanimphwanya; nnimwaasa ovuluxiwa, mene ori ottaiwene.

¹² Aani, sootakhalasahu sohaattaxa vamaithoniwanyu ni sinnoothera sootthekasahu. Soopakasahu soonanara siri ni hiyo mahuku ootheene ni nohaakhulela sootakhalasahu:

¹³ Noomurukunuwela ni noomulokottha Yave; noomuhiya omutthara Mulukwaahu, wuulumawahu ti wa nihasu ni ovaanya ni noolokolola soowootha mirimasahu siyanraaya.

¹⁴ Hiiho ekhaikhai enghokoleela ottuli ni ororomeleya onkhala ottaiwene; ekhaikhai enkwakwathuwa mmiseweni ni murima wa ekhaikhai khoongwereya ovolowa.

¹⁵ Khoowowo emphwanyaneyaayaru ekhaikhai ni yoowo onsemba yoonanara onthatuwa oolupatthiwa. Yave ohoona, ahinahakalalela ohikhala ekhaikhai.

¹⁶ Yave ohoona weera khaariworu mutthu mmoha; aatikhina niwoko khawowo hata mmoha aapwatthenle; tivawo moonowaawe muneenaaya omuruuhenlaaya ovuluxa ni ororomeleyawawe waamukhavihera.

¹⁷ Oowarela ororomeleya ntoko malaya a eyuuma vakakasani ni ekapasete ya ovuluxa mmuru; oowarela ikukuttula ni ohiikuttelelano nthiti ntoko nireene mukaandyo.

¹⁸ Owo onimwaatthuvela attharihaka mitekosaya; wa awananaawe isara; wa amwiittanaawe ntthuvelo nootthuneya ni wa icirumba seiyo simphwanela.

¹⁹ Okhuma ninkela nsuwa atthu animoova Nsina na Yave ni okhuma ninkhuma nsuwa onoottittimiha ovuwawawe. Vano Owo onimoowa ntoko mirupi soowoopihaxa seettihiwaka ni iphumu sa Yave.

²⁰ “Mvuluxa onimoowa wa oSiyoni, wa yaale a Yakobe anrukunxa murima mwa sootthekasaya,” onghima Yave.

²¹ Vano Yave oneera: “Wa Miyo, owiiraananawaka yaawo ti wu: Munepaaka ori mwa nyuwo ni maswaaka kihenlaaka vayanoniwanyu khayoohiyani eyanowaanyu hata iyano sa anamwaniinyu naari iyano sa ikhapirasaya okhuma vaanaanova mpaka ommaleloni,” onghima Yave.