Yesaya 57 - Emakhuwa Bible

aYixrayeli ampaka miluku sikina soohimuteko

¹ Oororomeleya onkhwa ni khawowo ontthokelela yeeyo mmurimanimwawe. Atthu ootteeliheriwa amvenxiwa ni khawowo oniiwexexa weera oororomeleya amvenxiwa weera yuurereliwe soonanara.

² Yaawosa aneetta moota wookwanela amvolowa mmuretteleni; amphwanya wiitthuuwa woomaaleleya mookhwaani.

³ “Vaheera nyuwosa, ngweeke va nyuwosa anamwane asilopwana a akhwiri, ekhapira ya anamararuwa ni mapuuta!

⁴ Nyuwosa munaatthebwa taani? Munaanyemula taani? Mungwoonihera taani nlumi? Nyuwosa muri nakupa a anamapuhera, ekhapira ya anamootha.

⁵ Moosareya soohaawela variyari wa ikaravalyu* ni vathi wa khula mwiri woopombaxa; nyuwosa munaapaka sooveleela anamwaniinyu mmaxaapwani ni munyattani.

⁶ Miluku variyari wa maluku oovilikeya a maxaapwa ti mpattaanyu; muniithukumanyiha ni seiyo. Aani, munlapa seiyo ni sooveleela soowura ni sa etrigu. Vano, Miyo kinoowera ohakalalela yeeyo?

⁷ Mwaahiipakela wookonawo vanttumuxani noorakamaxa; moowelawo weera mwapakewo sooveleelasanyu.

⁸ Mohiikaathera eneneerowaanyu ya miluku sikina musereemuni. Mukihiyaka Miyo, mohoonelela wookonawanyu, munawelawo, muhulaka yeeyo nnenesene. Mohiiwanana ni yaawo munkonaanyuno, yaale moonnaanyu etiriyaaya.

⁹ Mwaarowa mpaka wa Moleki ni makhura a sooliveira* ni mohaandyeereriha makhuraanyu oowunkhelaxa; mwaahaarumihela anamitthengaanyu wa ilapo sa ottai; mwaakhuruwela moowiixera.

¹⁰ Mwaathatuwa ookhulumuweene ni iphirosanyu sootheene, mene khamutthunne weera: ‘Seiyo siri soohimuteko!’ sohoorweelani ikuru sinyowani, tivawo muhitteengungwaanyu.

¹¹ Yaawoopopihani ni yoothukumelihani taani weera nyuwo mukilokotthe, muhikuupuwelelaka hata muhitthokelelaka yeeyo mmurimanimwanyu? Weeraka mwahaakoovela niwoko kiroomaalaxa?

¹² Kinimoonihera yeeyo munuupuwelaanyu eri ekhaikhai nitho mitekosanyu ni seiyo khasooreerelani.

¹³ Nyuwosa mwaakhuweleleka ekhavihero, vano milukusanyu sookhavihereni! Epheyo enookuxakuxa seiyo sootheene, iphumu paahi sinimoopela ottai! Vaheera yoole ontthawela mwa Miyo onimwaakhela elapo ntoko yoohiyeriwa ni onookuxa mwaakowaaka wootteela.”

Opepesiwa wa oothananihiwa

¹⁴ Ni enimweeriwa: “Muthatawalihe, muthatawalihe, mureherere musewe, mvenxeke ikuttelelo mphironi mwa mulokwaaka.”

¹⁵ Vano Oosulusuluxa, Yoowo onkhala ni okumi wa mahuku ootheene, Nsinanawe Ootteela, oneera ha: “Miyo kinkhala vanipuroni noosuluxa ni nootteela, menetho ni yoowo orino murima woothananaxa ni wooyevihiwa mmunepani weera kikakamuxe munepa wa oowiiyeviha ni opepesa murima wa oothanana.

¹⁶ Nkinoothera wa mahuku ootheene naari nkimpwaherera onyoonyiwa. Ovirikanawaya, munepa wa omutthu saano okhulumungweene ohoolowaka nitho ngwiya wa mutthu kimpattunxaaka.

¹⁷ Koosareya isara niwoko na soohaawelasaya sootthekeya; koonyoonyiwa, kinaahuluwa, mene awo ampwaherera ephiro athanlalaaya.

¹⁸ Kohoona iphirosaya, mene kinimwaalamiha; kinimwaahoolela ni kinimwaapepesa,

¹⁹ kiwerihaka ottottopela vayanoni wa anamalalamika a oYixrayeli.” Yave oneera: “Murettele, murettele wa yaale ari ottai ni vakhiviru. Vano wa yaawo ni Miyo kinimwaalamiha.”

²⁰ Vaheera atakhali ari ntoko ephareiya yoowali, ehiweraka omaaleleya, ni mitekutekusaya sinkhumiha nipheru na ittoko.

²¹ “Wa atakhali khoowowo murettele,” oneera Mulukwaaka.