Yesaya 56 - Emakhuwa Bible

Wiiraana wa ootheene aniiwelela

¹ Yave oneera ha: “Muthokorore ekhaikhai ni mpake yeeyo eri yookwanela, niwoko ovuluxawaka ori vakhiviru ni ororomeleyawaka onimoonihereya woowaakuveya.

² Ooreelihiwa ti mulopwana ompaka yeeyo, yoole ompwaherera mwa yeeyo oolipeene, onttittimihera eSaabadu, ahiveihaka yeeyo ni ahitthuniheraka matataawe opaka yoonanara.”

³ Ahikhale namarwa aniiwanane ni Yave aneere: “Vekhaikhai Yave onookimwalamwaxa mwa mulokwaawe.” Ni ahikhaleru enoko* anaattaandawule: “Miyo mwiri woowuumeene paahi.”

⁴ Vano Yave oneera ha: “Wa inoko* anttittimihera iSaabadusaka ni anthanla yeeyo enkisiveliha ni aniiwelela wiiraanawaka –

⁵ wa yaawo kinimwaavaha Mpaanimwaka ni ixirisaya eyuupuxero ni nsina nooreerela waapwaha anamwane asilopwana ni asithiyana. Kinimwaavaha nsina noohimala nneera nihicipihiwe.

⁶ Mwaha wa anamarwa aniiwananano Yave weera emurumeele, esivele Nsina na Yave ni emulape, ootheene anthokorora eSaabadu ehiveihaka ni aniiwelela wiiraanawaka –

⁷ vano yaawo kinimwaaruuha vamwaakoniwaka wootteela ni kinimwaavaha ohakalala Mpaanimwaka wa mavekelo. Sooveleelasaya soohisa ni sikina sinimwaakhuleliwa valtaariniwaka; vanonto Empaaka eniitthaniwa Empa ya mavekelo wa miloko sootheene.”

⁸ Yave onlamula sootheene, Yoowo onaathukumanyiha anamatthukiwa a oYixrayeli onghima: “Kinimwaathukumanyihatho akina yaathukumanyihiwe.”

Muluku onaahimahima atakhali

⁹ Ngweeke, nyuwosa axinama a ntuphini ootheene, ngweeke ni mukhuure, nyuwosa axinama a moothakoni!

¹⁰ Anamalipelela a oYixrayeli ari oohoona, awosa ootheene khaaniiwexexa etthu; ootheene ari ntoko alapwa oomaala, ahingweraru owuwa; aniixaatalela elohaka, ansivela okona paahi.

¹¹ Awosa ari ntoko alapwa oonyaanya; khaamvona. Awosa ari akukhuli oohiiwexexa; ootheene yaawo antthara iphirosaya asineenaaya, khula mutthu a yaawo onaasaasa enimusiveliha.

¹² Khula mutthu a yaawo onkhuwela: “Murwe, mukiruuhele eviinyu! Niwureke mpattaahu wa soowura soohapala! Omaalo onookhala ntoko olelo hoye hoye mpaka wootepaxa.”