Yesaya 55 - Emakhuwa Bible

Olattuliwa wa oovoliwa ntthona

¹ “Ngweeke ootheene nyuwo mumvoliwa ntthona, nkarwani wa maahi; ni nyuwo muhinono musurukhu, ngweeke, muthume ni muceeke! Nkarwani, muthume eviinyu ni mukaka wa mahala woohiliva etthu.

² Munnanarihela heeni musurukhu ni etthu ehinciwa ni mwiikhulumulakano muteko woohiphureleya etthu? Mwiiwe, mukiiwe ni muce yeeyo eri yooreera ni okumaanyu onoohakalalela sooca sooreerelaxa.

³ Mwiiwe ni nkarwani wa Miyo; mukiiwe weera munepaanyu okhale ni okumi. Kinoopaka wiiraana woohimala ni nyuwo ntoko wiiraanawene weiwe kaapankaaka ni Davide.

⁴ Moone, koompaka namoona a miloko, muhooleli ni namalamula a miloko.

⁵ Vekhaikhai munimwiitthana miloko muhisuwenlaanyu ni miloko sihoosuwenleni sinoowaattamelani nyuwo niwoko na Yave Mulukwaanyu, Ootteela a oYixrayeli eenre Owo oovahakaani waara.”

⁶ Mmwaase Yave vaava ongwereyaaya, mmwiitthane Owo nlelo areene vakhiviru.

⁷ Mutakhali ahiyeke ephirowaawe ni mutthu oonanara soowuupuwelasawe. Owo ahokoleele wa Yave ni Owo onoommorela ikharari, arukunuwele wa Muluku ni Owo onoomulevelela ni murima wooreera.

⁸ “Vano soowuupuwelasaka soovirikanaxa ni yeeyo nyuwo munuupuwelaanyu ni iphirosaka soohiyanaxa ni sawinyu,” onghima Yave.

⁹ Hiiho ntoko erimu erakamelannaaya ni etthaya, hiihotho iphirosaka soorakamelana ni sawinyu ni soowuupuwelasaka ni sawinyu.

¹⁰ Epula ni etthabwe enrweela wiirimu ni kheenghokoleelawo ehinaanihale etthaya, emelihaka ni epombihaka weera etthaya eruwere mmiso ni yooca wa namalima.

¹¹ Hiihotho ni masu kinghimaaka: khaankihokoleela ehipanke etthu, mene anookwanihera yeeyo kintthunaaka ni anoomalihera yeeyo kirumihenlaaka.

¹² Munookhuma moohakalalani ni munoohooleliwa mmuretteleni; nyaako ni mattumuxa anoopacera wiipa ohoolowanyu ni nyiri sootheene sa ntuphini sinimwiipa makuphi.

¹³ Mwiri wa epinyeiru* onimunnuwa vanipuroni na nyiiwa ni vanipuroni na rupulula onimunnuwa murta*. Eyo enoomuttittimiha Yave ntoko eneneero yoohimala eneera ehiphwatiwe.