Yesaya 49 - Emakhuwa Bible

Muteko wa murumeiyi a Yave

¹ Mukiiwe nyuwosa icirumba, mwiiwe yeeyo nyuwosa miloko sinkhala ottai: Miyo kihinaaye oyariwa, Yave aakiitthana; okhuma oyariwawaka Owo iitthana nsinanaka.

² Owo aapaka eyanowaaka ntoko ekatana yoowiitha; aakisunga mmunttuusini mwa ntatanawe; aakitatuxa muupa woowiitha anakihela mmurupanimwawe.

³ Owo aakeerenle: “Nyuwo ti murumeiyaaka Yixrayeli, kinimoonihera ovuwawaka mwa nyuwo.”

⁴ Mene keenre: “Koovara muteko wa siiyo; kimalihale ikurusene woohiphurela etthu. Wa soothesene, yeeyo miyo kimphwanelaaka eri mmatatani mwa Yave ni ntthuvelonaka nri ni Mulukwaaka.”

⁵ Vano Yave onuuluma ni miyo – Yoowo okipanke mmirimani weera kikhale murumeiyaawe ni weera kamuhokoloxe Yakobe ni kamuthukumanyihere aYixrayeli, niwoko koottittimihiwa vamaithoniwawe ni Mulukwaaka ori ikurusaka.

⁶ Yave oneera: “Wa nyuwo khoonkwana okhala murumeiyaaka paahi weera mureherere ipuumba sa Yakobe ni mwaahokoloxe yaale a aYixrayeli kaathokoronraaka. Kinimootatuxanitho waara wa amalapo weera ovuluxawaka okwanele ekotenle elapo.”

⁷ Vano Yave, Mvuluxa ni Ootteela a oYixrayeli onimweerela yoole ooramusiwa ni oothanyiwa ni miloko, murumeiyi a anamalamula: “Mamwene anoowoonani, eneemela; anamwane a mamwene anoowoonani, enakokhora niwoko na Yave ori oororomeleya, Ootteela a oYixrayeli othanlaleni.”

Anamwane a oSiyoni anghokoleela owaani

⁸ Yave oneera ha: “Mweehuhuni yoothanliwa Miyo kinoowaakhulani ni vanihukuni na ovuluxa kinimookhaviherani. Miyo kinimoothokororani ni kinoopakiha weera mukhale wiiraana wa muloko, weera mureherere elapo mukawaka soohiyeriwasaya soothaamiwa.

⁹ Vano nyuwo munooweerela anamatthukiwa: ‘Mukhume’ ni wa yaale ankhala mpiphini: ‘Ngwe ngwaarani.’ Awosa anookhala moocihamo mukerekhere musewe ni anoophwanya sooca mmattumuxani ootheene yahaamelamo etthu.

¹⁰ Awosa kheevoliwa etala naari ntthona, hata oviha wa nsuwa na munikareni khanaahisa. Owo ongwoonihera ikharari onimwaahoolela ni onimwaaphiiha omaahini.

¹¹ Kinootatuxa nyaakosaka sootheene misewe ni misewesaka sitokotoko sinoorehereriwa.

¹² Moone, awosa eniirweele ottaiwene – akina okhuma mpatta wa ottuttuwani, akinaawo ninkhuma nsuwa ni akinatho mweelaponi mwa wAsewani.”

¹³ Ii! Erimu, mukhuweleke ni ohakalala; Ii! Elapo, muhakalale; Ii! Nyaako mwiipe ni ohakalala! Niwoko Yave ompepesa mulokwaawe ni onaamorela ikharari oohooxiwaawe.

¹⁴ Vaheera Siyoni eenre: “Yave ookihiya, Yave ookittiwala.

¹⁵ Weeraka ookhala maayi onimuttiwala mwaniye nlelo onaamwa ni ohinimmorela ikharari mwaana omuyanraawe? Naari amuttiwalaka, Miyo nkoottiwalani!

¹⁶ Moone, Miyo kohoolepani mmatatanimwaka; ixirisanyu siri ohoolowaka mahuku ootheene.

¹⁷ Anamwaniinyu asilopwana waakuva orukunuwa ni yaale yoohuhunleni aasusa wa nyuwo.

¹⁸ Muttukhule maitho ni ngwehe mukhwipi; anamwaniinyu asilopwana ootheene anthukumana erwaaka wa nyuwo.” Yave onghima: “Kinlipela mwa okumaaka weera awosa anookhala ntoko yoowaraanyu yooreerela, aani ntoko soowarela sa ootthomeriwa.

¹⁹ Naari muheleiyeene nthala ni muthaamiweene, naari elapwaanyu ereene ittuxoru, vano elapwaanyu enooyevaxa wa mulokwaanyu wootheene ni yaale yookhuuraleni anookhala ottaiwene.

²⁰ Anamwane ayariwe mweehuhuni mwa olalamikawanyu anooweerelani vamaithoniwanyu: ‘Nipuro nna nooniyevela, munivahe elapo yoowunnuwa weera nikhalemo.’

²¹ Vano munimwiixeerela: ‘Taani okiyarenle anamwane ala? Kaamwiinanela ni kaari mwali eekupa, kaari wootthukiwani ni ookhoottiwa. Taani aapattunxe? Kaahiiwa ttewu, mene yaala anrweela woowi?’”

²² Vano Yave onlamula sootheene oneera ha: “Moone, kingwuuvela ntata amalapo; kinimweemexera eneneerowaaka miloko; iyo simmooruuhelani anamwaniinyu asilopwana siwaakandeene ni anamwaniinyu asithiyana veetthuuri.

²³ Mamwene anookhala anamakosoopaanyu ni mapwiyamwenaaya oowaamwihaanyu. Awosa animookokhorelani ephiihaka muruwaaya vathi; anoolata ntthupi na inaawosanyu. Vano, munoosuwela weera Miyo ti Yave; yaale ankiroromela Miyo annapwaneya.”

²⁴ Khoongwereya waakha soohuhula wa anakhotto ooweraxa hata waatapuxa anamatthukiwa wa anakhotto a ikuruxa.

²⁵ Vaheera Yave oneera ha: “Aani, anamatthukiwa anootapuxiwa mwa anakhotto ooweraxa ni soohuhula animwaakhiwa mwa atthu oolipaxa; Miyo kinimwaawanano yaale anoowananani ni kinimwaavuluxa anamwaniinyu.

²⁶ Kinoopakiha weera anamahasulaanyu yiikhuure; anoohapaliwa ni ephomaaya ntoko ereene eviinyu. Vanonto atthu ootheene anoosuwela weera Miyo, Yave, ti Mvuluxaanyu, Namoopolaanyu, Ooweraxa a Yakobe.”