Yesaya 45 - Emakhuwa Bible

Siru ekaruma ya Muluku

¹ “Vano Miyo kinkuxa ntata noolopwana na Siru weera kilamule miloko ohoolowawe kaarulaka mamwene mwa soowarasaya sa ekhotto ni weera kihule masele ohoolowawe weera Milako sihiwaliwe. Yeeyo kinimweerelaaka Siru ti ela:

² Miyo kinoorowa ohoolowanyu, kithatawaliheke nyaako; Miyo kinoophwata masele a ebronze* ni kinimwaakhulakasa anampattika a eyuuma.

³ Kinimoovahani mihakhu sa wiiphiini, mihakhu soothokororiwa mmapuroni a exiiri weera nyuwo musuwele weera Miyo ti Yave, Muluku a oYixrayeli kingwiitthanelani nsinananyu.

⁴ Kinoowiitthanelani nsinananyu mwaha wa murumeiyaaka Yakobe ni oothanliwaaka Yixrayeli ni kinimoovahani ekhalelo ya nttittimiho naari muhikaakhulelaka.

⁵ Miyo ti Yave ni khawowo mukina; khoowowo muluku kihikhanle Miyo. Miyo kinimoolipihani naari muhikaakhulelaka,

⁶ weera okhuma ninkhuma nsuwa mpaka ninkelaayawo ootheene esuwele weera khawoworu kihikhanle Miyo. Miyo ti Yave ni khawowo mukina.

⁷ Miyo kimpaka waara ni kinkhaliha epiphi. Miyo kinruuha onnene ni kimpakiha erisa. Miyo, Yave, kimpaka sootheene iyo.

⁸ Nyuwosa erimu osulusulu, murupihe ekhaikhai ni mahutte erupihele vathi ororomeleya. Ehuleye elapo weera ophuwe ovuluwa ni ehuhuweene yeeyo emele ekhaikhai. Miyo, Yave kimpattuxa sootheene iyo.

⁹ Ii wa yoole onnyakulihana ni Mpattuxaawe, yoole onlikana ni nivali variyari wa mavali vatthayani paahi. Weeraka oloko onoomweerela namoopa: ‘Mumpakani?’ Weeraka mutekwaanyu onimweera: ‘Ola khanono matata’?

¹⁰ Ii! Wa yoole ongweerela atithawe: ‘Muyanreni?’ Hoye hoye wa amayawe: ‘Muyanreni?’

¹¹ Yave, Ootteela a oYixrayeli ni Mpattuxaaya oneera ha: ‘Wa itthu sa muhoolo – nyuwo munkikohakoha mwaha wa anamwanaaka hoye hoye munkilamulela mwaha wa miteko sa matataaka?

¹² Ti Miyo kipanke elapo ya vathi, kinaapattuxamo atthu. Matataaka ti akunge erimu; Miyo koolamulela ithenyeerisaya.

¹³ Kinoomukhaliha Siru moororomeleyanimwaka; kinimookolela iphirosawe sootheene. Owo onoorasela esidadaaka ni onimwaatapuxa ootthukiwaaka mulaponi yoorakamelaxa, vaheera khanaanyesereriha nlivo naari ntthuvelo, onghima Yave a ikuru sootheene.”

¹⁴ Yave oneera ha: “Sooruwera sa wExipitu ni soothumiha sa oKuxe ni aSabeyani awo oorakamaxa – awosa animoowa wa nyuwo ni anookhala awinyu; awosa animoottharani ootthukiweene. Awosa anookokhorela ohoolowanyu yoodyoonttelelakani: ‘Vekhaikhai Muluku ori ni nyuwosa ni khawowo mukina, Khoowowo muluku mukina.’ ”

¹⁵ Ii! Muluku ni Mvuluxa a oYixrayeli, vekhaikhai Nyuwo ti Muluku onniipitha.

¹⁶ Ootheene ampaka miluku soowootha animuulihiheya muru ni anooyevihiwa; awosa anoomorela vamoha ngwuulihiheyani muru.

¹⁷ Vaheera Yave onoovuluxa oYixrayeli ni ovuluxiwa woohimala; khookhalatho wuulihiheya muru hata oyeviheya wa mahuku ootheene

¹⁸ Vano Yave opattunxe wiirimu – Owo ti Muluku; Owo oopattuxa elapo ya vathi; ti yoowo oompe etthaya. Khaanse opattuxa, mene weera ekhaliwe. Vano Mulukweene Yoowo oneera ha: “Miyo ti Yave ni khawoworu mukina.

¹⁹ Nkuulumme muxiirini, mweelaponi yoosareya epiphi; nkeerenle ekhapira ya Yakobe: ‘Mukaasaase wa siiyo.’ Miyo, Yave, kinuuluma ekhaikhai, Miyo kinghima yeeyo eri ya ekhaikhai.

²⁰ Muthukumane ni nkarwani, muthukumane nyuwosa anamatthawa a miloko. Yaale ankuxa miluku sa etthaabwa, yaale amvekela miluku sihingwera ovuluxa ti oohisuwela etthu.

²¹ Muhime yeeyo eneera yeereiye, moonihere yoowaakhuleleya. Awosa ethukumane elakane. Taani aahimale yeeyo khalayi? Taani aalaleiye mweehuhuni evinre? Kaari Miyo, Yave. Khoowowo muluku mukina kihikhanle Miyo, Muluku Oororomeleya ni Mvuluxa. Khoowowo muluku mukina kihikhanle Miyo.

²² Muhokoleele wa Miyo ni mvuluxiwe, nyuwosa a ekotenle elapo, niwoko Miyo ti Muluku ni Khoowowo muluku mukina kihikhanle Miyo.

²³ Kohiilipela muneenaaka, eyanowaaka yoohima mweekhaikhaiyini masu oohiceendyeya: Ohoolowaka atthu ootheene anookokhorela ni malumi ootheene anookilipela.

²⁴ Awosa eniyeere sa Miyo: ‘Ekhaikhai ni ikuru siri mwa Yave paahi.’” Ootheene animuthanya anoorowa wa Yoowo ni animuulihiheya muru.

²⁵ Vaheera ekhapira yootheene ya Yixrayeli enimwaakhuleliwa mwa Yave ni enoomvuwiha.