Yesaya 43 - Emakhuwa Bible

Mvuluxa mmoharu a oYixrayeli

¹ Vano Yave mwa Yoowo oopattunxeni nyuwo Yakobe ni oopankeni nyuwo Yixrayeli, oneera ha: “Muhoove, niwoko koowoopolani; koowiitthanani ni nsinananyu; nyuwo ti awaka.

² Mwaalapuwaka, kinookhala ni nyuwo; mwaalapuwaka yooloko, seiyo khasoomireihani; mwaaviraka mmooroni, khamunza; malumi a mooro khaanoohisani.

³ Niwoko Miyo ti Yave Mulukwaanyu, Ootteela a oYixrayeli, Mvuluxaanyu. Miyo kininnyerera wExipitu ntoko nlivo weera moopoliwe ni oKuxe ni oSeba vanipuroniwanyu.

⁴ Nyuwo ti ootthuneyaxa ni oottittimiheya vamaithoniwaka, ni keenre koosivelani, kinoowinnyerera asilopwana vanipuroniwanyu ni atthu ntoko yoowaakakhanyihera okumaanyu.

⁵ Muhoove niwoko kiri ni nyuwo; kinimwaaruuha anamwaniinyu okhuma ninkhuma nsuwa ni kinimoothukumanyiherani ninkela nsuwa.

⁶ Kinimweerela mpatta wa ottuttuwani: ‘Ngwinnyerere yaawo!’ Ni wa ohitto: ‘Muhiwooceelihe ohokolowa.’ Ottai ottai mwaaruuhe anamwanaaka asilopwana ni ekotenle elapo anamwanaaka asithiyana –

⁷ ootheene aniitthaneliwa Nsinanaka, mwa yaawo kaapattuxenraaka ovuwawaka, yaawo kiwoopalaaka, kinaapaka.”

⁸ Muruuhe muloko orino maitho, mene ohoonaka; maaru, mene ohiiwaka.

⁹ Miloko sootheene sa elapo ya vathi sinthukumana. Taani a seiyo yaahimme, elaleiyaka itthusene seiye sivinre? Awosa yaaruuheke anamoonaaya, yooniheraka weera khayootha, ni akina yiiwa, yeere: “Ettiitthu.”

¹⁰ Yave onghima: “Nyuwosa ti anamoonaaka; nyuwo ti murumeiyaaka kimuthanlalaaka weera musuwele ni mukiroromele ni weera mwiiwexexe: Miyo ti Yoowo. Khoowowo muluku kihinaaye Miyo, naari khookhala vahoolowaka.

¹¹ Miyo muneenaaka ti Yave ni khawoworu mvuluxa kihikhanle Miyo.

¹² Miyo kohoonihera, koovuluxa ni koolaleiya – Miyo, ahikhanle muluku mukina variyariwanyu. Nyuwosa ti anamoonaaka weera Miyo Muluku,” onghima Yave.

¹³ “Aani, okhuma khalayixa Miyo ti Yoowo. Khawoworu ongwera omoopola mukina mmatatanimwaka. Miyo kaapakaka etthu, khawoworu ongwera oceendya yeeyo.”

Ikharari sa Muluku ni ohiroromela wa oYixrayeli

¹⁴ Vano Yave, Mvuluxaanyu, Ootteela a oYixrayeli oneera ha: “Ngwoosivelanimwaka kinimwaarumihela anakhotto oBabiloniya kaapakihaka aBabiloniya ootheene okhala ootthukiweene mmakulani matokotoko mwa yaawo yiixoonelaayano.

¹⁵ Miyo ti Yave, Ootteelaanyu, Mpattuxa a aYixrayeli, Mwenaanyu.”

¹⁶ Yave ti Yoowo opanke musewe mphareiyani, ephiro mmaahini oowuupaxa,

¹⁷ eettinghe ikaaro sa ikavalu* vamoha ni ikavalusaya*, anakhotto ni anamakhaviheraaya ni awosa yaattakaneelamo ehivenyakatho – emalihiweene, aani aacipihiwa ntoko mutthambo. Vanonto Yave ola oneera ha:

¹⁸ “Muttiwale itthu sa khalayi; muhuupuwelele seiye sa ihuhu sivinre.

¹⁹ Moone, kimpaka etthu enyowani. Eyo eneera ekhumelelaka. Khamoonne yeeyo? Kimpaka musewe munikareni ni nyooloko mulaponi yoowuumaxa.

²⁰ Axinama a ntuphini ankittittimiha – akhwatte ni isiisi, niwoko kohaavaha maahi munikareni ni nyooloko mulaponi yoowuumaxa weera owure mulokwaaka, woothanliwaaka –

²¹ muloko kiipakenlaaka weera owo olaleiye ottottopeleyawaka.

²² Hata hiiho nyuwo Yakobe khamukiitthanne mwaarookikhulumuwelaru nyuwo Yixrayeli.

²³ Khamwaakiruuhenle ikhondoolo sa sooveleela soohisa naari khamwaakittittiminghe ni sooveleelasanyu. Nkoonyesereringheni opaka sooveleela sa etrigu naari nkaatthunne erubani*.

²⁴ Khamukithumenle etthu yoowunkhelaxa hata khamukivanghe makhura a sooveleelasanyu. Vaheera mukilemelihenre sootthekasanyu ni mukikhulumunle ni sootakhalasanyu.

²⁵ Miyo, aani Miyo ti Yoole ommaliha soonanarasanyu moosivelani ni nkuupuwelatho sootthekasanyu.

²⁶ Muupuwelele seiye sivinre wa Miyo, nuulumasere vamoha mulattwaanyu; mukithalihere ohinthowawanyu.

²⁷ Tiithiinyu oopacera oottheka; mamwaakhulaanyu aakivaanya.

²⁸ Tivawo kineeraaka kiwuulihihe muru asitokweene a Empa ya Yave ni kimmwinnyerera Yakobe moophwatiwani ni oYixrayeli mootheiwani.”