Yesaya 40 - Emakhuwa Bible

Opepesiwa wa muloko wa Muluku

¹ Muluku oneera: “Mupepese, mupepese mulokwaaka.”

² Mwalipihe murima oYerusaleemu ni mwalaleiye weera ehuhuwaaya yoovihaxa yoomala, weera sootthekasaya sooliviwa ni weera wohaakhela mmatatani mwa Yave ottaruxiwa iphura niwoko na sootthekasaya.

³ Nsu na mukina oniitthana: “Murehererele munikareni ephiro wa Yave; mmookolelele Mulukwaahu musewe munikareni.”

⁴ Khula nreyareya nnoowelihiwa ni khula mwaako ni nttumuxa nnoothatawalihiwa; etthaya yoothipeya enoothatuwa yoowaataleya ni ilapo sa nyaako sinoothatuwa ilapo sa musaatala.

⁵ Vano ovuwa wa Yave onimooniheriwa ni omutthu wootheene onimoona. Vanonto, ohimale ti Yave.”

⁶ Nsu ninlamula: “Mukhuwele.” Ni miyo kaakhunle: “Kikhuwelekeni?” Atthu ootheene ari ntoko malaxi ni ovuwawaya wootheene ori ntoko ithutu sa ntuphini.

⁷ Malaxi anuuma ni ithutu simmora niwoko sinoopelamo iphumu sa Yave. Vekhaikhai atthu ari malaxi.

⁸ Anuuma malaxi ni simmora ithutu, mene masu a Mulukwaahu ampwaherera wa mahuku ootheene.

⁹ Nyuwo munruuhela oSiyoni ihaali sooreera, ngwele vamwaako woorakamelaxa; nyuwo munruuhela oYerusaleemu ihaali sooreera, mukhuwelaxe, muhoovaka. Muleele isidade sa oYuda: “Mulukwaanyu ori va!”

¹⁰ Moone, Yave onlamula sootheene onrwa ni ikuru, Owo onlamula ni moonowaawe wa ikuruxa. Moone, ntthuvelonawe nri ni Yoowo, aani nri ni Yoowo.

¹¹ Owo onkosoopa muhuwaawe ntoko Mukukhuli; Owo onthukumanyiha iputtiputthi ni moonowaawe anaakanda. Owo onghoolela nnenesene ikhondoolo sinaamwiwa.

¹² Taani omphima maahi a mphareiya ni ntata? Taani omphima waanuwa wa wiirimu ni nikuphi? Taani onringa elapo ya vathi olemelawaya hoye hoye omphima nyaako ni mattumuxa olemelawaya?

¹³ Taani onsuwela soowuupuwela sa Munepa wa Yave hata onimulaka ntoko namalakaawe?

¹⁴ Wa taani Yave omukoherenraawe omuthalihera ni omuxuttiha othoriha ni ekhaikhai? Taani omuxuttihale esuwelo naari omuthoonyenre ephiro ya miruku?

¹⁵ Vekhaikhai miloko siri ntoko nttonyo mbasiyani; saalikeliwa ntoko ntthupi ninghala vamiringoni; wa Yoowo icirumba siri ntoko muhaava paahi.

¹⁶ Othako wa oLibanu khoonkwana okukhela mooro vaaltaariniwawe*, naari axinamaaya khaankwana ntoko sooveleela soohisa.

¹⁷ Ohoolowawe miloko sootheene khaveetthwaawewo; vamaithoniwawe siri ntoko sa siiyo ni soohimuteko.

¹⁸ Muninlikanxera eheeni Muluku? Mummoona hai?

¹⁹ Vano, mwaha wa muluku oopatthiwa – namaratta ti ompaka ni namahana a eyuuma yoorikaxa ti onghuruwela ni eyuuma yoorikaxa, ampakelaka onyooro wa eparatha*.

²⁰ Mulopwana oohaawa ohingwera yeeyo, onthanla nimparumparu. Owo onimwaasa namaratta ooweraxa weera ampake muluku oowootha ohimmora.

²¹ Khamusuwenle? Khamwiiwale? Khamuthaliheringwe okhuma ompacereroni? Khamwiiwexenxe okhuma ephattuwelo ya elapo ya vathi?

²² Owo onkilaathi vahiceniwawe ya emwene wiirimu wa yookhuneelano elapo ya vathi ni amakaaya ari ntoko misoope. Owo ontapuruxa erimu ntoko eluttu, ntoko eheema weera ekhalemo.

²³ Owo onaamaliha woomalela anamwane a mamwene ni onaavukula anamalamula a elapo ya vathi.

²⁴ Ephatteiwakaru, yaaliwakaru hoye hoye yaaphuwakaru mikwankhwaari, Owo ongwoopihera iphumusawe enanyaala; vano eyuupuru enaavaviha ntoko makamba.

²⁵ “Munkilikanxera taani? Taani onlikana ni Miyo?” onkoha Ootteela.

²⁶ Ngwehe osulu, moone: taani opattunxe itthu sootheene iya? Yoole onkhaliha ni ontteha khula ethenyeeri. Kheendyuwaru niwoko na ikurusawe ni owerawawe otokotoko.

²⁷ Ii! Yakobe, muntaandawulelani, Ii! Yixrayeli munkhupanyerani: “Yave khampwattha enkeereela; Mulukwaaka khanuupuwela sa mulattwaaka?”

²⁸ Weeraka khamusuwenle? Khamwiiwale? Yave ti Muluku Oohimala, Mpattuxa a elapo yootheene. Owo khankhulumuwa naari khantomba, ni khawowo ongwera oringa mirukusawe.

²⁹ Owo onimvaha ikuru ookhulumuwa ni ommwaandyeerera ikuru oohilipa.

³⁰ Mpaka amiravo ankhulumuwa enatomba, aani mpaka awosa ankwakwathuwa, enamora,

³¹ vaheera yaale animuroromela Yave anoophwanyatho ikurusaya; anoovavela osuluxa ntoko axaaka; anootthimaka woohikhulumuwaru, animweetta woohitomba.