Yesaya 38 - Emakhuwa Bible

Eretta ya Hizekiya

¹ Ehuhuweene yeele Hizekiya aavoreiwa mpaka ohaleela vakhaani okhwa. Mprofeeti Yesaya, mwaana mulopwana a Amozi, aarowa omuxekura, anamweerela: “Yave oneera ha: ‘Mureherere itthusanyu niwoko munimookhwa; vekhaikhai khamulama.’”

² Hizekiya aahuluwela oxirini, anamvekela Yave:

³ “Ii! Yave, muupuwelele moota koorumeenlaakani ni ororomeleya ni murima wootheene. Koopaka yeeyo eri yooreera vamaithoniwanyu.” Ni Hizekiya aahiinla vancipalexa.

⁴ Vano Yave aamulamulela Yesaya:

⁵ “Muhokolowe ni mwamuleele Hizekiya: ‘Yave, Muluku a atithinyu Davide oneera ha: Kohiiwa mavekelowaanyu ni kohoona maithoraanyu. Kinimwaandyeerera iyaakha muloko niithanu sa okumaanyu.

⁶ Kinoowoopolani nyuwo ni esidade ela mmatatani mwa mwene a wAsiriya. Kinimwaakiha esidade ela.

⁷ Eneneero eneera ewoonihereni weera Yave onookwanihera ohimalaawe ti ela:

⁸ Kinoopakiha weera munttuusi wa nsuwa otuphele ohokoleelaka ottuli malipa muloko, ottharaka mwaakheriwe mmakweeleloni a Ahazi.’ ” Vano nsuwa naahokoleela malipa muloko.

⁹ Ekaratta ya Hizekiya vahoolo wa erettaawe ni olamihiwawawe:

¹⁰ Keenre: “Miyo nlelo kihuuluvanleene, vano onootthuneya orowa vamulako wa okhwa ni ovukuleliwa iyaakhasaka sihanle?”

¹¹ Keenre: ‘“Miyo nkimmoonatho Yave, aani Yave mweelaponi mwa akumi; nkingwehatho omutthu hata nkinkhalatho ni yaawo ammaka mweelaponi ya vathi.

¹² Empaaka yoophwatiwa kinaakhiwa ntoko yaari eheema ya mukukhuli. Okumaaka woovitikiwa ntoko nttaaka omvitikaawe namatthava ni Owo ookithikila ntoko nleembe. Ohiyu ni othana koomalamalihiwa.

¹³ Kaaweherera ni ovilela mpaka oxeexelo, mene ntoko mwatto Owo aapwexa makhuvaaka ootheene. Ohiyu ni othana koomalamalihiwa.

¹⁴ Kaahiinla ntoko meenkesa hoye hoye naankhwaare, kaattaandawula ntoko ekhunda elalamikaka; maithwaaka aakhaliwa evaasi miyo kiwehexexaka wiirimu. Ii! Yave, Koovalavela – mukikhavihere!”

¹⁵ Vano, keereke hai? Owo ohuuluma ni miyo ni Owo muneenaawe ti opanke yeeyo.

¹⁶ Yave, atthu ankhala mwa itthusene seiyo ni munepaaka onkhalatho mwa seiyo. Mookilamiha, munakikhalihatho ni okumi.

¹⁷ Vekhaikhai kaahaawela onnenaaka paahi. Moosivelanimwanyu mookokhorela mwa nlitti na ophwata. Moovonyera ottaiwanyu sootthekasaka sootheene.

¹⁸ Vano nihiye khaningwera woottottopelani hata okhwa khooniipa icipo soowoottottopelani. Yaawo ankhuruwela mulittini khaangwera oweherera ororomeleyawanyu.

¹⁹ Akumi, paahi aani, akumi anoottottopelani Nyuwo, ntoko miyo kimpakaaka olelo. Asitiithi anaathalihera anamwanaaya sa ororomeleyawanyu.

²⁰ Yave ookoopola ni hiyo nnimwiipa ni ikaruma sa mikhoyi mahuku ootheene a okumaahu Mpaani mwa Yave.

²¹ Vano Yesaya eenre: “Muttikitthe efiigu* mmarele vanikhwattani ni owo onoolama.”

²² Hizekiya aamukoha: “Eneneero heeni eneera ekoonihere weera kinoovolowa Mpaani mwa Yave?”