Yesaya 36 - Emakhuwa Bible

Senakeribi onoopopiha oYerusaleemu

¹ Vayaakhani yanaamuloko niixexe ya olamula wa Hizekiya, Senakeribi, mwene a wAsiriya, aawanano isidade soolipihiwa sootheene sa oYuda, anakuxa.

² Vano mwene a wAsiriya aamurumihela mutokweene a anakhottwaawe vamoha ni anakhotto ancipalexa okhuma oLakixi wa mwene Hizekiya oYerusaleemu. Vanonto mutokweene ole eemelaka vayiikalaandeni a vanrattani na osulu, mmuseweni onkela wa Ematta ya Namakattha,

³ Eliyakimi, mwaana mulopwana a Hilikiya, namareherera empa ya emwene, Xebena, namalepa, ni Yowa, mwaana mulopwana a Asafi, mutokweene a ilivuru sa nyaha sa mwene, yaarowa omukumanano.

⁴ Vano mutokweene a anamalakaawe mwene aaweerela: “Mwamuleele Hizekiya: ‘Mwene mutokweene, mwene a wAsiriya onkoha: Munroromelani?

⁵ Nyuwo muneera weera mookhalano miruku ni owera owana, mene ti masu a siiyo paahi. Munimuroromela taani wookivaanya hiiho?

⁶ Moone, munroromela wExipitu ori ntoko ettheere yoowintakiwa enghoma ni emvulaliha ntata na mutthu onlipano yeeyo. Ti hiiho Farawu*, mwene a wExipitu, ongwerihelaawe animuroromela.

⁷ Mwaakeerela: “Hiyo nnimuroromela Yave Mulukwaahu” – Hizekiya aavenxa mmanttumuxanimwawe ni altaaraawe aanyesererihaka ootheene olapa valtaarini* oYerusaleemu!

⁸ ‘Vano mwiiwanane ni pwiiyaaka, mwene a wAsiriya. Miyo kinimoovahani ikavalu* macira miloko miili nyuwo mwakhalano anamweettihaaya!

⁹ Nyuwo munroromela wExipitu weera yoovaheeni ikaaro ni anamweettihaaya. Vaheera khamungwera ongwina naari mutokweene mmoha a asikhaani a apwiyaaka.

¹⁰ Ohiya toko yeeyo, kirweenle owanano ni ophwata elapo ela niwoko na olamula wa Yave. Ti Yave mwaneenaawe okeerenle weera kiwanane ni kiphwate nipuro nna.’”

¹¹ Vano Eliyakimi, Xebena, ni Yowa, yaamweerela mutokweene a anamalakaawe mwene: “Dyoontte muulumeke ni arumeiyaanyu munuulumoni na Eramewu, niwoko nnimwiiwexexa. Muhuulume vaHeberi yeenre atthu ari vasulu vaxirini eniiwa.”

¹² Wa soothesene, mutokweene a anamalakaawe mwene aawaakhula: “Apwiyaaka aarumiha mutthenga ola wa ootheene – khoohiyono wa pwiiyaanyu ni nyuwosa paahi. Atthu ale vaxirini animooca mahilokaaya ni anoowura minyososaya, hiiho ntoko nyuwosa.”

¹³ Vano mutokweene a anamalakaawe aaheemela, anakhuwela vaHeberi: “Mwiiwe masu a mwene mutokweene, mwene a wAsiriya!

¹⁴ Mwene oneera ha: Muhilokotthiwe ni Hizekiya! Owo khangwera owoopolani mmatatanimwaka.

¹⁵ Muhimuhiye Hizekiya ooviriyelakani weera munroromele Yave, owo aweerelakani: ‘Vekhaikhai Yave onoonopola hiyo; esidade ela kheerwa evahereriwa mmatatani mwa mwene a wAsiriya.’

¹⁶ Muhimwiiwelele Hizekiya! Mwene a wAsiriya oneera ha: Mwiiraane ni miyo ni mwiixinnyerere wa miyo. Hiiho khula mutthu a nyuwo onimooca sa emattaawe ya iwuuva* ni nyirisawe sa efiigu* ni onoowura maahi a muhimenimwawe

¹⁷ mpaka kineeraaka kookuxeeni kooroihakani mulaponi enlikana elapwaanyu. Elapo eyo erino etrigu ni eviinyu enyowani; sooca ni imatta sa iwuuva*.

¹⁸ Muhimwiiwelele Hizekiya, niwoko onimoolokotthani aweerelakani: ‘Yave onoonitapuxa.’ Khawoworu muluku mukina wa wakhalaru muloko mukina owenre woopola elapwaaya mwa ntata na mwene a wAsiriya.

¹⁹ Miluku sa oHamati ni wArepadi siri woowi? Miluku sa oSefarevayimi, siri woowi? Iye khasaawenre ovuluxa oSamariya mmatatanimwaka.

²⁰ Khawoworu muluku mukina wa ilapo sootheene seiye owenre woopola elapwaaya mmatatanimwaka. Ongwereya hai Yave woopola oYerusaleemu mmatatanimwaka?”

²¹ Vaheera atthu yaari emaalelo ehimwaakhulaka etthu, niwoko mwene aahaalamulela: “Muhimwaakhule.”

²² Vano Eliyakimi, mwaana mulopwana a Hilikiya, namareherera empa ya emwene, Xebena, namalepa, ni Yowa, mwaana mulopwana a Asafi, mutokweene a ilivuru sa nyaha sa mwene, yaarowa wa Hizekiya ni ikuwo soowaahuwa, enamuthalihera yeeyo mutokweene a anamalakaawe mwene a wAsiriya aahimmaawe.