Yesaya 3 - Emakhuwa Bible

Nthorihelo na oYuda ni oYerusaleemu

¹ Moone, Namalamula, Yave a ikuru sootheene onoovenxa woowaakuveya mwa oYerusaleemu ni oYuda sooreelasaya ni ekhaviherowaaya yootheene, mpaka waatta wa yooca ni maahi.

² Aani, onoomvenxa nakhotto oottittimiheyaxa ni namawanaxa; mphuki ni mprofeeti, nahako ni mutokweene,

³ namalamula a anakhotto miloko mithanu ni neethi, namalaka ni muratti vamoha ni namadyiini.

⁴ Kinimwaakhaliha amiravo ntoko asitokoweenaaya; aani anamwane animwaalamula yaawosa.

⁵ Muloko onoohooxana – asilopwana asilopwanaru, khula mutthu ni mwaattamanaawe. Amiravo animwaahasula anamuuluvala, ooveihereya ni maneethi.

⁶ Mulopwana mmooha onoomvara munneiye, mmusi a atithawe, amweerelaka: “Naari nyuwo mookhalano mukaandyo – mukhaleke muhooleelaahu; mulamulele ittuxo iya!”

⁷ Vaheera vanihukuni nenenenno owo onookhuwela: “Nkinonoru mirette! Owannyaka kheewowo yooca hata yoowara; muhikikhalihe muhooleli a muloko.”

⁸ oYerusaleemu onooveveleya; oYuda ohanle vakhaani omora; maswaaya ni mitekosaya nsiniiwanana ni Yave, siramusaka okhalawawe woovuwa.

⁹ Maweherowaaya ammwiixoothera; awosa anoonihera yootthekaaya mwaatthuni ntoko oSodoma; ootakhaliwa yaale! Niwoko aahiiruuhela erisa asineenaaya.

¹⁰ Mwaaleele oororomeleya weera sootheene sinooweettela nnene, niwoko animooca soowiima sa mitekosaya soororomeleya.

¹¹ Ii! Wa atakhali! Nttaruxo nohaaphiyera! Awosa animwaakhela ntthuvelo na seiye matataaya apankaaya.

¹² Amiravo anghasula mulokwaaka; asithiyana anlamula yoowo. Ii! Mulokwaaka yaale anoohoolelani annoolokotthani ni anoohapuxani mphironi.

¹³ Yave onkilaathi vanipuroniwawe na nthorihelo; Owo oovenyera weera athorihe miloko.

¹⁴ Yave oopacera waathoriha asitokweene ni ahooleli a mulokwaawe: “Ti nyuwosa munanaringhe emattaaka ya iwuuva*; soohuhula sa oohaawa siri mpaanimwanyu.

¹⁵ Enoohaaxihani eheeni mulokwaaka, muupuruxelaka vathi ikhove sa oothoiwa?” onkoha Yave, Yave a ikuru sootheene.

¹⁶ Yave oneera: “Ngwoone asithiyana a oSiyoni moota aniivuwihaaya! Ankottola nyuru, angweha ehuuliwaka muru, yeettaka murima murima, mmettonimwaya orumaka ngilingili.

¹⁷ Tivawo Yave aneeraawe aametthe asithiyana a oSiyoni; awosa anookhala miputuru oowuulihiheyeene muru.”

¹⁸ Vanihukuni nenenenno Yave onoowaakha soowiiphwaneliherasaya sootheene: ipangiiri, sootthukela muru ni mikuhu,

¹⁹ axiveeve, ipangiiri ni ikuwo soowooneela soowiikhuneela owiitho,

²⁰ soowara sa mmuru, soophwaneliha munaawoni, alaamba, axikaaxa sa makhura oowunkhela ni mapaatiri,

²¹ annela ni icipini;

²² soowara sooreeraxa, mikaandyo, misako ni mahottha,

²³ iloola ni soowara sa eliinyu*, icireemba ni sootthukela muxiko.

²⁴ Ohiya wunkhela onuukhale wunkha; omuhiya laamba onuukhale, mukhoyi; ohiya otthaveliwa mayihi oophwaneliwa, onuukhale mputu; ohiya ikuwo soowaaraxa, nsikhale isaakho; ohiya ophwaneliwa, eniikhale mapharima oowoopiha.

²⁵ Asilopwanaanyu animwiiviwa ni ekatana ni anakhottwaanyu anookhwela mukhottoni.

²⁶ Milako sa oSiyoni sinoolalamika sithananelaka seiyo; esidade enookilaathi woohikhalano etthu.