Yesaya 28 - Emakhuwa Bible

Othorihiwa wa anamalamula ni asaserdoti* oohapuwa

¹ Ii! Wa ecireemba eri wiixoona wa anamuhapaliwa a wEfrayimi! Ii! Wa wiiphwanelihawaya, mwa iwo onlikana ni ethutu yoonyaala. Ii! Wa yaale yaacorweenle eviinyu.

² Moone, Yave onimurumiha mukina ori ooweraxa ni a ikuruxa. Owo onoovatarulela vathi ecireemba ntoko epheyo yoophwata ni ettheku ya maralala, ntoko epula etokotoko ni mirupi.

³ Ecireemba eri wiixoona wa anamuhapaliwa a wEfrayimi enoonyikaleliwa.

⁴ Ophwaneliwawaya ori ophattuwelani wa nreyareya na ethaadyira vanonto ethutu ennyaala. Onookhala ntoko efiigu* yoowaakuva wiitthwa sikina sihinaaye. Anooneru, onoorukula aceeke.

⁵ Nihuku nenenenno Yave a ikuru sootheene onookhala ecireemba yoovuwa, ecireemba yooreeraxa wa mulokwaawe.

⁶ Owo onookhala Munepa wa ekhaikhai wa yoole onkilaathela othoriha; ikuru wa yaale anghokoleela owana ekhotto vamulako.

⁷ Vano yaale amveveleyaxa niwoko na eviinyu ni soowura ti ala: asaserdoti* ni maprofeeti amveveleya niwoko na soowura ni anrukureereya nyuru niwoko na eviinyu. Awosa khaangwera weemela niwoko na owura yoohapala, mmoonelonimwaya anoona soopupuruma ni khaangwera othoriha ekhaikhai.

⁸ Meesa ootheene ari marapheyoru; khaniwoworu Nipuro Nootteela*.

⁹ Awosa ankoha: Owo oneerera omuxuttiha taani? Onimuthalihera mutthengaawe taani? Apaale wa anamwane oohiya waamwa; yaale aneera ohiyaru waamwa?

¹⁰ Vano ti ha: ikano ni ikano; nlamulo ni nlamulo; yooruma ni yooruma; vakhaani va ni vakhaani iwe.

¹¹ Paahi, Muluku onimuuluma ni muloko owo avarelaka muteko nuulumo ni iyano sootikinsa.

¹² Owo aaheera: “Nna nipuro noowiitthuuwa – munghiye ookhulumuwa iitthuuweke”; ni “nna nipuro noomumulela,” vaheera awosa khayaatthunne wiiwa.

¹³ Tivawo Yave eenraawe: ikano ni ikano, nlamulo ni nlamulo; yooruma ni yooruma; vakhaani va ni vakhaani iwe, moota wooweera awosa emore ninttuli, evulale, epharihiwe ni evariwe.

¹⁴ Tivawo, mwiiwe masu a Yave, nyuwosa anamaveiha munlamula muloko ola oYerusaleemu.

¹⁵ Nyuwosa muniikuxerera mweeraka: “Hiyo noopaka wiiraana ni okhwa, nohiiwanana ni nihiye. Naarwaaka nthorihelo noowoopihaxa, khaniniphwanya niwoko ntthawelonahu nipanke wootha ni woowiipithawahu ti olokottha.”

¹⁶ Vano Yave onlamula sootheene oneera ha: “Moone, kiniikaathi nluku oSiyoni; nluku noowootiwa murima – nluku nooreeraxa noottittimiheyaxa ninkhaliha mathipelo oolipaxa; yoole onroromela nenno khattikinyeyaru.

¹⁷ Kinoopaka ekhaikhai efiiyu yooringelano ni ororomeleya efiiyu yoowookolela. Maralala anoophwata ntthawelonanyu na wootha ni maahi a mirupi anookumburula moowiipithamwanyu.

¹⁸ Wiiraanawanyu ni okhwa onoomalihiwa; wiiwananawanyu ni nihiye khoolekela. Naarwaaka nthorihelo noowoopiha, nyuwo munoophwanyiwa ni nno.

¹⁹ Khula emaara nneeraaya nirwe, nno nnimookuxani; khula oxeexelo, ohiyu ni othana.” Wiiwexexa wa mutthenga ola onooruuhela woovaxa.

²⁰ Ekaama yookhuveyaxa moota wooweera khamungwera okonawo. Yoowiikhuneela yootepa oyeva ni kheenkwana wiikhuneela.

²¹ Yave onoovenya ntoko aapankaawe vamwaako oPerazimi; onimoonihera isarasawe ntoko oonihenraawe vanreyareyani na oGibiyoni weera akwanihere mutekwaawe; muteko ohisuwelaxiwe; weera akwanihere mutekwaawe, aani mutekwaawe wootikhiniha.

²² Vano, mmaalihe otthebwawanyu weera onyoorowaanyu ohitepe; Yave a ikuru sootheene ookithalihera sa ophwata olakelingwe elapo yootheene.

²³ Mwiiwexexe nsunaka; mpwattheke ni mwiiwe yeeyo kinghimaaka.

²⁴ Vano namalima aalimaka weera aphatteye, owo onlima woohihiyerera? Owo ompwaherera olima ni ottipura mahuku ootheene?

²⁵ Owo athatawalihaleene, vekhaikhai onimwaala ervilyaka* ni ekominyu*. Owo omphatteya etrigu ni esevada* vanipuroni nno nitho esenteyo* mukhwipimwaya.

²⁶ Mulukwaawe onimuxuttiha amuleelaka mapakelo.

²⁷ Ervilyaka* kheeneepetthiwa ni mukhukulu hata ekominyu* ni nreko na ekaaro. Hoye, ervilyaka* enepetthiwa ni ekopo ni ekominyu* ni ephandi.

²⁸ Ontthuneya oxila etrigu weera epakiwe epaawu; tivawo ohintthuneyaaya opwaherera oxila wa mahuku ootheene. Naari namalima eettihaka nreko na ekaaro yoohoora etrigu, ikavalusawe* khasinimuxila yoowo.

²⁹ Sootheene iyo sinrweela wa Yave a ikuru sootheene, oohilikanxereya moolakanimwawe ni Muneene miruku.