Yesaya 25 - Emakhuwa Bible

Munttottopele Yave

¹ Ii! Yave, Nyuwo ti Mulukwaaka. Kinimoovuhiwani ni kinoottottopela Nsinananyu, niwoko moopaka itthu sootikhiniha moororomeleyanimwanyu wookwanela – itthu saavaaneliwe khalayi.

² Moohela esidade nthala; esidade yoolipihiwaxa yoothatuwa ittuxoru; munoopakiha weera esidade ya anamarwa ehikhaletho; eyo kheeraseliwaru.

³ Tivawo muloko woolipa oneeraaya woottittimiheni; isidade sa anamapuhera sinoowoovani.

⁴ Muri Nipuro nootthawelamo oohaawa ni oothoiwa; Wootthawelela epheyo ni Munttuusi wa oviha. Vano iphumu sa anamapuhera siri ntoko ettheku, emanaka exiri

⁵ ni ntoko oviha wa nikare. Nyuwo mummaaliha onyakula wa anamarwa; ecipo ya anamapuhera emmaalihiwa ntoko munttuusi wa nihutte omvukulaaya oviha.

⁶ Vamwaako ola Yave a ikuru sootheene onooreherera efesta yookwana oca miloko sootheene; efesta ya iwuuva* ya khalayi – enama yoosiva ni eviinyu yooreerelaxa.

⁷ Vamwaako ola onimwaahula ekuwo enkhuneela miloko sootheene; eluttu enkhuneela ilapo sootheene.

⁸ Owo onoophwata khuluwi okhwa. Yave onlamula sootheene onimuukuttha maithori a ikhove sootheene; onoovenxa wuuliheya muru wa mulokwaawe mweelaponi yootheene. Ti Yave eenre.

⁹ Nihuku nenenenno awosa eniyeere: “Vekhaikhai Owo ti Mulukwaahu; hiyo nnimuroromela ni Owo oonivuluxa. Owo ti Yave, nnimuroromelaahu. Nihakalalelaxe ovuluxawawe.”

¹⁰ Ntata na Yave nniitthuuwa vamwaako ola; vaheera oMowabe onoovottiwa vanipuroniwawe ntoko malaxi amvottiwaaya osalani.

¹¹ oMowabe onimweemexerawo matata ntoko ompakaawe namayavela ayavelaka, mene Yave onoonyoka wiikuxererawawe, naari ereene ooweraxa.

¹² Owo onookurumula ixirisaya soorakamelaxa soolipihiwa; onoomoroxela vathi vantthupini.