Yesaya 24 - Emakhuwa Bible

Nthorihelo na elapo ya vathi nookhuveela

¹ Moone, Yave onoophwata elapo ya vathi, ahononaka. Onoonanariha ekhalelowaaya, awoomolaka amakaaya.

² Ommaleloni wa asaserdoti* onoolikana wa muloko; pwiiya wa murumeiyi, pwiiya muthiyana wa murumeiyi muthiyana, namathumiha wa namathuma, namakopa ni namakopiha, namakoongora wa namakoongoriha.

³ Elapo ya vathi enoophwatiwaxa ni enoohuhuliwa woomalela. Yoole ohimme masu ala ti Yave.

⁴ Elapo ennuuma, enanyaala; elapo ya vathi ennayavayava, enanyaala. Asitokweene a elapo ya vathi amporora.

⁵ Elapo yoovaliheya ni amakaaya; awosa aarambura malamulo, aaramusa ikano ehipwatthaka wiiraana woohimala.

⁶ Tivawo nlapho ninlalihaaya elapo ya vathi, amakaaya aakhalano nthowa. Tivawo amaki a elapo ya vathi anlalihiwaaya ni yaale anghala ari vakhaani.

⁷ Eviinyu enyowani yoomala ni ematta ya iwuuva* yoonyaala; ni yaale yeetta ehakalalaka anniipulela.

⁸ Oruma wa ikoma sa moohakalalani woomaalihiwa ni onyakula wa anamacocopolana woomala, makita oosareya ohakakala khanrumatho.

⁹ Awosa khangwuratho eviinyu yiipaka; soowura sohaawaawela anamawura.

¹⁰ Esidade yoonanarihiwa eri yoothaamiwa. Mulako wa khula empa woowaliwa.

¹¹ Mmiseweni awosa ankhuwelela eviinyu; ohakalala wootheene onthatuwa wooripa murima; otteela murima wootheene wohoomoliwa mweelaponi ya vathi.

¹² Esidade yoothatuwa milepe; maselaaya aapwexakasiwa.

¹³ Onuukhale hiiho mweelaponi eriyari miloko ntoko emvareliwaaya muteko ekopo omaniwaka mwiri wa sooliveira*, hoye hoye sinaasiwaaya soohalahala sa iwuuva* vahoolo wa ohepha.

¹⁴ Awosa animwiipa ni ohakalala; okhuma ninkela nsuwa anlaleiya ovuwa wa Yave.

¹⁵ Tivawo amaki a ninkhuma nsuwa ni icirumba sa mphareiya, munttottopele Yave; mvuwihe Nsina na Yave, Muluku a aYixrayeli.

¹⁶ Okhuma ekotenle elapo ningwiiwa atthu yiipaka: “Ovuwa okhale wa Muluku a Ekhaikhai.” Vaheera kineera: “Maayi miyo, maayi miyo! Ii! Wa miyo! Anamavariha amvariha; awosa aneetta moovarihani!”

¹⁷ Woopiha, nlitti ni muraakho sinimoowehererani nyuwosa amaki a elapo ya vathi!

¹⁸ Ootheene antthawa okhuweliwa wa woopiha, anoomorela mulittini; ootheene ankhuma munlittini, anoopharihiwa. Milako sa wiirimu soohuleya; mathipelo a elapo ya vathi anootetereya.

¹⁹ Elapo yoonyaanyiwa; etthaya yoophwatiwa, aani elapo yoottikinyiwa woomalela.

²⁰ Etthaya emveveleya ntoko namuhapaliwa; enttikinyeya ntoko mukottha ni epheyo. Emmora ni olemelaxiwa niwoko na nthowanaya na ovaanya ni kheevenyatho.

²¹ Nihuku nenenenno Yave onoottaruxa ikuru siri osulu erimu ni mamwene a elapo ya vathi.

²² Awosa anoothukumanyihiwa mukaliposo ntoko anamatthukiwa. Anoowaleliwa mukaliposo ni eviraleene mahuku mancipale anoottaruxiwa.

²³ Mweeri onooyeviheya ni nsuwa nnimuulihiheya muru niwoko Yave a ikuru sootheene onoolamula vamwaako Siyoni ni oYerusaleemu – oovuwihiweene vamaithoni wa asitokweenaawe.