Yesaya 22 - Emakhuwa Bible

Wooperera wa ophwatiwa wa oYerusaleemu

¹ Masu mwaha wa Nreyareya na Eyoonihero: Enookacamihani eheeni ophiyera mungwelaanyu mmapathoni,

² esidade nyuwo yoosareya onyakuleleya, yoosareya ococopolana. Anamakhwaanyu khaakhwiiye ni ekatana naari mukhottoni.

³ Ahoolelaanyu ootheene aatthawa vamoha. Awosa aavariwa ehivarelaka muteko muupa. Ootheene nyuwo moophwanyiwa, munatthukiwa, mwaarootthawelaru ottaiwenexa.

⁴ Tivawo keenraaka: “Mususe wa miyo, mukihiye kiixiinlele. Muheerere okipepesa niwoko na ophwatiwa wa mulokwaaka.”

⁵ Namalamula, Yave a ikuru sootheene oothanla nihuku na munyakunyaku, onyikalasiwa ni woovaxa vaNreyareyani na Moonelo; nihuku na omoroxa ixiri ni okhuwelela ekhavihero nyaako.

⁶ awElami ankuxa nyuupa, enarwa ni anamweettihaaya a ikavalu* ni ikavalusaya*. aKiri anoonihera exikudu*.

⁷ Mareyareyaanyu a ethaadyira aasareya ikaaro sa ikavalu* ni anamweettiha a ikavalu* ahiirehererela owana vamilako sa esidade.

⁸ Soowaakiha sa oYuda soovenxiwa. Nihuku nenenenne nyuwosa mwaweha ikapwitthi siri mpaani mwa emwene Moothakoni,

⁹ munoona weera esidade ya Davide yaakhalano ikhato muxirinimwaya woohikhalano yoowaakiha. Moothokorora maahi vanrattani na vathi.

¹⁰ Mohaalikela impa siri oYerusaleemu ni moophottomola impa sikina weera mulipihe exiri.

¹¹ Mooteka nipuro ninthokororiwa maahi variyari wa ixiri piili wa maahi a nratta na khalayi, vaheera khammoonne Yoole opanke itthu seiyo, hata khamumpwantthe Yoowo aavaanelenle yeeyo khalayi.

¹² Nihuku nenenenne Namalamula, Yave a ikuru sootheene oowiitthanani weera mwiinle ni mulalamike, murosole mayihaanyu ni ngware isaakho.

¹³ Mene ovirikanawaya, waakhala ohakalala ni ococopolana; wiiviwa wa imombe ni ikhondoolo; okhuura wa enama ni owura wa soowura! Nyuwosa mweera: “Niceeke ni niwureke niwoko omaalo nnimookhwa!”

¹⁴ Yave a ikuru sootheene ookoonihera ha: “Yoottheka ela kheenleveleliwa mpaka okhwawanyu,” onghima Namalamula, Yave a ikuru sootheene.

Masu mwaha wa Xebena

¹⁵ Yave, Yave a ikuru sootheene oneera ha: “Murowe ni mwamuleele Xebena owo, namareherera sootheene mpaani ya emwene:

¹⁶ Mumpakani va ni taani ootthunihenreni othipa nihiyenanyu, mwaakaka vanttumuxani, muttuulaka nipuronanyu noowiitthuuwa vamwalani?

¹⁷ Mwiipasoope, Yave ohanle vakhaani woovarani weera oovonyereni ottaiwene, nyuwo mulopwana oowera.

¹⁸ Owo onimookhunyanyani ntoko boola oovonyerekeni mweelaponi etokotoko. Iwo munimookhwa ni ikaarosanyu sa ikavalu* sooreeraxa sinookhalawo ntoko wuulihiwa muru wa vaate wa pwiiyaanyu!

¹⁹ Miyo kinoowoomolani mmitekonimwanyu ni munoosusihiwa wa okhalihiwawanyu.

²⁰ Vanihukuni nenenenno kinoomwiitthana murumeiyaaka Eliyakimi, mwaana mulopwana a Hilikiya.

²¹ Kinoongwariha mukaandyo mwaawaraanyu, kimutthukaka laambaanyu muyuununi, kimvahaka ikurusanyu sa muteko. Owo onookhala tiithi wa yaale ankhala oYerusaleemu ni wa ekhapira ya Yuda.

²² Kinoomuthateliha exaavi ya omwene wa Davide; yeeyo aneeraawe ahule, khaawo anaawere owala, ni yeeyo aneeraawe awale, khaawo anaawere ohula.

²³ Kinoomukhomela ntoko ekhomo vanipuroni noolipaxa; owo onookhala omwene wa ovuwa wa vaate wa atithawe.

²⁴ Ovuwa wootheene wa emusaawe eniimuweheke yoowo – anamwanaawe ni osuuluwaawe; ikarumasawe sikhaani sootheene okhuma ibasiya mpaka nyaapu sootheene.

²⁵ Vanihukuni nenenenno,” onghima Yave a ikuru sootheene, “ekhomo ekhomelingwe vanipuroni noolipaxa enoozoowa, enookwasuwa, enoomora, ni yoolemelaaya enoomoratho.” Yoole eenre yeeyo ti Yave.