Yesaya 17 - Emakhuwa Bible

Masu mwaha wa oDamasku

¹ Masu oowooperera oDamasku ti ala: “Moone oDamasku kheenkhalatho esidade, mene ittuxoru paahi.

² Isidade sa wAroweri sinoothaamiwa; sinoovahiwa mihuwo, mwa seiyo sineera siixaatalelewo sihoovaka etthu.

³ Esidade yoolipihiwaxa enkoongora wEfrayimi ni hiihotho ikuru sa emwene oDamasku. Anamahalahala a awArami anookhala ntoko ovuwa wa aYixrayeli,” onghima Yave a ikuru sootheene.

⁴ “Vanihukuni nenenenno ovuwa wa Yakobe onooyavayava; oneneva wa erutthwaawe onimoonda.

⁵ Onuukhale ntoko namahepha athukumanyaka, ahelaka makala vamoononi; ntoko mulopwana onttottattottaawe ihupu sa etrigu vanreyareyani na Refayimi.

⁶ Wa soothesene, anoohala makala mamoha mamoha ntoko simpukunyiwaaya ifiigu, sinoohala soowiima piili hoye hoye tthaaru osuluxa wa mwiiri, ni soowiima ixexe naari ithanu mphandini moowiimaxa,” onghima Yave Muluku a oYixrayeli.

⁷ Vanihukuni nenenenno asilopwana anoongweha Mpattuxaaya, emurukunuwelaka ongweha Ootteela a oYixrayeli.

⁸ Khayaaweha altaari* ari miteko sa matataaya naari kheeroromelatho nyiri soothipeleliwa Axera ni altaari* a erubani* yaapankaaya.

⁹ Vanihukuni nenenenno isidadesaya soolipaxa saathaamiwe niwoko na aYixrayeli sinookhala ntoko mapuro oowinnyereriwa ntuphi ni othako. Vano sinookhala ittuxoru.

¹⁰ Moomuttiwala Muluku Mvuluxaanyu; khamummuupuwelela Mwala ori Nipuronanyu Noolipaxa. Tivawo, naari mphatteyaka nyiri sooreerela ni imatta sa iwuuva* sa ilapo sikina,

¹¹ aani, naari nihuku muneeraanyu mwaale, mununnuwiha ni oxeexelo sinattuva, khoorwa okhala ohepha vanihukuni na othanana ni ovoreya woohilamiheya.

¹² Ii! Oruma wa miloko sincipale onlikana ni oruma wa ephareiya yoowali! Ii! Onyakula wa miloko; seiyo sinruma ntoko oruma wa maahi oowuupa!

¹³ Naari miloko sirumaka ntoko maahi oowuupa, Owo aahiihaka, iyo sinootthawela ottai, sivavihiwaka ni epheyo ntoko makamba mmattumuxani, ntoko ntthupi ninkuxiwa ni eyuupuru.

¹⁴ Ohiyu – woova wootutuxereya! Ohinaaye oxa awosa anoopwaha! Wu ti ommaleloni wa yaale annihuhula, wa yaale aniiya.