Yeremiya 6 - Emakhuwa Bible

Oriciwa wa oYerusaleemu

¹ “Ii! Ekhapira ya Benyamini, mutthawele nipuro noolipaxa! Mutthawe oYerusaleemu! Mwiipe nipalapatta oTekowa! Mweemexe eneneero oBeti-Hakeremi! Niwoko ennooneya erisa enrweela ottuttuwani – ophwata woowoopihaxa.

² Kinoomphwata mwaana muthiyana a oSiyoni ooreeraxa ni oophwanelaxiwa.

³ Akukhuli ni mihuwosaya animoowa emuriceke; anookunga iheemasaya sa mukhwipimwaya, khula mukukhuli akosoopaka nipuronawe.”

⁴ “Mwiirehererele ongwanano! Mvenye, niwananeke nsuwa vamuru! Mene ii! Nsuwa noothetemana ni munttuusi wa oxekuwa woorakama.

⁵ Vano muvenye, niwananeke esidade ni ohiyu, niphwataka mapurowaaya oolipaxa!”

⁶ Yave a ikuru sootheene oneera ha: “Muuhe nyiri ni niteke ikaaro sookurumulelano exiri ya oYerusaleemu. Esidade ela ettaruxiwe, ti yoosareya nihasu.

⁷ Eyo empaka soonanara ntoko ehime enkhumihaaya maahi. Nipuhero ni ophwata oniiwanyeya mpuwamwaya. Iretta ni makhwattaaya ari ohoolowaka wa mahuku ootheene.

⁸ Ii! oYerusaleemu, mwiiwe woopererawaka! Mwaahiiwa, kinoosusa woomalela ohoolowanyu koohiyakani ttewu mulaponi yoohimakiwa.”

⁹ Yave a ikuru sootheene oneera ha: “Mwaattottattotte oohalahala a oYixrayeli nnenesene ntoko sinttottattottiwaaya iwuuva* sa evideira*, ni ntoko ompakaawe yoole onrukula iwuuva*: nyuwo mviravire mphandini khula ekhuce.

¹⁰ Kimuulumeno ni kimooperere taani? Taani aneera akiiwe? Maaruwaaya aattiyana moota wooweera khaaniiwaru. Awosa anthanya masu a Yave, ehisivelakaru yaawo.

¹¹ Mene miyo koosareya isara sa Yave ni nkingweraru okhalano.” Mwaayeehere seiyo anamwane mmiseweni ni amiravo anthukumana mikuttula mikuttula; asiiya ni axaaraaya anoophwanyiwa ni seiyo ni hiihotho anamuuluvala – yaawosa arino iyaakha sincipale.

¹² Impasaya animwinnyereriwa akina vamoha ni imattasaya ni axaaraya Miyo kaawookolelaka moonowaaka yaawo amanke elapo ela,” onghima Yave.

¹³ “Okhuma asikhaani mpaka asitokweene – ootheene aasareya ohaawelaxa mihakhu; maprofeeti nitho asaserdoti* ootheene aneetta moota woolokottha.

¹⁴ Awosa anreherera makhwatta a mulokwaaka ehoonelakamo. Awosa aneera: ‘Murettele, murettele’ ohikhanleru murettele.

¹⁵ Awosa khaanuuliwa muru niwoko na mweettelowaaya wa mwiikho. Awo khaanoonaru wuuliha muru – mpaka kheenaamoraru ekhove. Tivawo eneeraaya emorele variyari wa yaale ammora. Anooyevihiwa Miyo kaattaruxaka,” onghima Yave.

¹⁶ Yave oneera ha: “Mweemele vamathakalaano ni moone; mwaasaasere iphiro sa khalayi, mukohe eri woowi ephiro yooreera ni mukuxere, ni vano munoophwanya wiitthuuwa wa okumaanyu. Vaheera mweenre: ‘Hiyo khaninkuxera yeeyo.’

¹⁷ Kohaakhaliha anamalipelela variyariwanyu kiweerelaka: ‘Mwiiwe nnenesene oruma wa nipalapatta.’ Vaheera mweenre: ‘Khanimpwattha.’

¹⁸ Tivawo, mwiiwe miloko ni moone anamoona, yeeyo eneera yaakhumelele yaawo.

¹⁹ Ii! Elapo ya vathi, mwiiwe: Kinooruuhela muloko ola erisa, soowiima sa soovaanelasaya, niwoko khoopwantthe maswaaka, okhoottaka Nlamulonaka.

²⁰ Nkimpwattharu erubani* ya oXeba hoye hoye etthu yoowunkhelaxa enruuhiwa ilapo sa ottai. Sooveleelasanyu soohisa khasinaakhuleleya; sooveleelasanyu khasinkisiveliha.”

²¹ Tivawo Yave oneeraawe ha: “Kinimwiikittha muloko ola. Asitiithi ni anamwanaayatho anookwakwathuliwa; aximwaattamana ni asinthamwene anooriheya.”

²² Yave oneera ha: “Moone, anakhotto ancipale anrweela elapo ya mpatta wa ottuttuwani; muloko mutokotoko onrehereriwa okhuma ekotenle elapo.

²³ Awosa avarenle nyuupa ni mavaka; ti a murima woowuumaxa ni khaammorelaru ikharari. Yeettihaka ikavalusaya*, orumawaya onlikana oruma otokotoko wa ephareiya; awosa anrwa ethataanenleene owana ni nyuwo, mwaana muthiyana a oSiyoni.”

²⁴ Nohiiwa ihaali sa yaawosa ni matataahu aanilosowa. Woova woonivara, ovoreya ntoko wa muthiyana ongyara.

²⁵ Muhirowe mmatta naari muheette mmiseweni, niwoko amwiittana anrwaano ekatana ni wookhala woopiha mipatta sootheene.

²⁶ Ii! Mulokwaaka, muwarele isaakho ni mwiihele ettuura. Mwiinle moota woolalamikaxa ntoko mutthu ommwiinlela mwaniye mmoharu, niwoko wootutuxereya namaphwata onooniphwanya.

²⁷ Miyo kohookhalihani namawehaweha a iyuuma, mulokwaaka okhalaka eyuuma weera ngwehe ni moote murima iphirosaya.

²⁸ Ootheene awosa ti anamavaanya a murima woowuuma, epwahereraka owuuluma akina. Awosa ti ebronze* ni eyuuma; ootheene aneetta moota wookhoromana.

²⁹ Vano mvekhu oniiselela ni ikuru weera omwalamwaxe murawa ni eyuuma yootteelaxa, mene eyo enimwaasa osama hapo atakhali khaammwalamwaxeya.

³⁰ Awosa aniitthaniwa eparatha* yookhoottiwa niwoko Yave ohaakhootta.”