Yeremiya 5 - Emakhuwa Bible

Murima woohiroromeleyaxa wa muloko wa Muluku

¹ “Muviravire mmiseweni sa oYerusaleemu, ngwehawehe ni moone; mwaasaase mmapuwanimwaya. Mwamphanya hata mutthu mmoha ni mweettelowaawe woororomeleya, aasaasaka ekhaikhai, kinoolevelela esidade ela.

² Naari yeeraka: ‘Kinlipela mwa Nsina na Yave,’ vekhaikhai anlipela moota woowootha.”

³ ii! Yave, maithwaanyu anaasaasa ekhaikhai. Nyuwo mwaahaavulaliha, mene awosa khayoonne ovoreya; mwaahaattaruxa, mene yaakhoottha olakiwa. Yaahuumihaxa mirimasaya, ekhoottaka orukunxa murima.

⁴ Kaahuupuwela: “Awo ti oohaawa paahi; ti alolo, niwoko khaansuwela ephiro ya Yave hata soonyesereriha sa Mulukwaaya.

⁵ Tivawo kineeraaka kirowe wa ahooleelaaya weera kuulumeno – woohihovela awosa aasuwela ephiro ya Yave, soonyesereriha sa Mulukwaaya!” Vaheera ootheene awo aaphwata yoolemela eyo enapasa onyooro.

⁶ Tivawo mwatto a moothakoni aneeraawe aakarawele, mwiici wa munikareni onimwaaluma, havara onoowiipithela mukhwipi mwa mittetthesaya weera amunyaanye akhalaru mutthu aneera akhumemo, niwoko ovaanyawaya ti otokotoko ni soohapuwasaya ti sincipale.

⁷ “Kaahooleveleleleni heeni? Anamwaniinyu aakihiya ni anlipela mwa miluku sihikhanle miluku. Kohaavaha sootheene yaatthunaaya, hata hiiho aararuwa ni annarowa wa impa sa mapuuta.

⁸ Awosa anlikana ni ekavalu* elopwana enca nnene ni yoosareya soohaawela; khula mutthu a yaawo onimuhaawelaxa mwaara a mukhwaawe.

⁹ Vekhaikhai ontthuneya waattaruxela yeeyo!,” onghima Yave. “Vekhaikhai ontthuneya wiinlela ikukuttula muloko ntoko ola!

¹⁰ Muviravire eriyari ya imattasaya sa iwuuva* ni mwananarihe, mene muhiphwate woomalela. Mwakwasere iphandi niwoko muloko owo khoohiyono wa Yave.

¹¹ Vano ipuumba sa oYixrayeli ni sa oYuda khasiroromeleiye moota woomalela,” onghima Yave.

¹² Awosa yaahootha mwaha wa Yave; awosa yaaheera: “Owo kharwa apaka etthu. Kheewowo eneera enikhumelele. Khanirwa noonatho ekatana hata etala.

¹³ Maprofeeti ti epheyo paahi ni maswaaka khaakhanle mwa yaawo; tivawo, yaakhumelele yeeyo anghimaaya.”

¹⁴ Tivawo, Yave, Muluku a ikuru sootheene, oneeraawe ha: “Weenre muloko wuulumaka masu ala, kinoopakiha weera maswaaka ekhale mooro mmwaanomwanyu ni muloko owo okhale ikhuuni sinlalihiwa ni mooro owo.

¹⁵ Ii! Ipuumba sa oYixrayeli,” onghima Yave, “kinooruuhelani muloko wa ottai weera woowananeni – muloko wa khalayi ni woohiwineya, mwa yoowo muhisuwenlaanyu nuulumonaya hata muhiniiwexexaanyu onghimaaya.

¹⁶ Nluwonaya nri ntoko nihiye noohuleya; ootheene a yaawo ari anakhotto ooweraxa.

¹⁷ Awosa anoomira soohephasanyu ni soocasanyu; animwaamira anamwaniinyu asilopwana ni asithiyana; anoomira imombesanyu ni ikhondoolosanyu, imattasanyu sa iwuuva* ni nyiri sa efiigu*. Awosa anoophwata ni ekatana isidade soolipihiwa mwa seiyo munroromelaanyu.

¹⁸ Hata hiiho, mpaka mmahukuni awo nkirwa koophwataani woomalela,” onghima Yave.

¹⁹ “Vano awosa yaakohaka: ‘Yave Mulukwaahu onipakenleni itthu sootheene iya?’ vano ngweerelaseke: ‘Mooteene yoowo mukihingyaanyu murumeelaka miluku sikina mweelaponimwanyu, hiihotho munimwaarumeela anamarwa mweelaponimwaya.’

²⁰ Vano mulaleere yeeyo ikhapira sa Yakobe ni Yuda:

²¹ Mwiiwe yeeyo muloko wa ololo ni woohimiruku orino maitho, ohoonaka ni maaru, ohiiwaka:

²² Nyuwo khoontthuneya okoova?” onghima Yave, “koontthuneya othukumela ohoolowaka? Ti Miyo kikhalihale muhaava ntoko mwiinano wa ephareiya – mwiinano woohimala ephareiya ehingweraaya ovinuwa. Mitekuteku sinoophweeya, mene khasingwera opwaherera; seiyo sinoowera oruma, mene khasingwera ovinuwa mwiinaanoweene yoowo.

²³ Vaheera muloko owo ti woowuuma murima ni wa ettiyamaaru; owo woosusa, onapwaha.

²⁴ Awosa khaaniixeerela: ‘Nrowe, nimooveke Yave Mulukwaahu, mwa Yoowo onrupiha epula mutthulo ni ya mulaala mweehuhunimwaya ni onnivaha isimana sa ohepha mweehuhunimwaya.’

²⁵ Wa soothesene soopakasanyu soonanara soosusiha itthusene seiyo; sootthekasanyu soowiiyerani sooreerela iyo.

²⁶ Aakhala atakhali variyari wa mulokwaaka mwa yaawo aniipitha ntoko aniipithaayamo anamalupattha a ipalame; anreya miraakho weera yaapharihe atthu.

²⁷ Impasaya soosareya olokottha ntoko ikeelo soosareya ipalame; awosa aathatuwa anamapuha ni ooweraxa;

²⁸ enenevaka ni ecaaka nnene. Mitekosaya soonanara khasinono nyiinano; awosa khaanimpwattha mukwaasuni naari khaanaakiha soophwanela sa namahaawa.

²⁹ Vekhaikhai ontthuneya waattaruxela yeeyo!” onghima Yave. “Vekhaikhai ontthuneya wiinlela ikukuttula muloko ntoko ola!”

³⁰ Etthu yoonanaraxa ni yoowuumiha owanoni enkhumelela mweelaponi ela:

³¹ Maprofeeti anuuluma soowootha, asaserdoti* anlamula sa mmurumwaya ni mulokwaaka onsiveliwa ni seiyo. Mene mmwipakeni ommaleloni?