Yeremiya 48 - Emakhuwa Bible

Othorihiwa wa oMowabe

¹ Yave a ikuru sootheene, Muluku a oYixrayeli, oneera ha mwaha wa oMowabe: “Ii! Wa Nebo, niwoko wooheleya mathala. oKiriyatayimi wohuulihiheya muru, onakuxiwa; woolipawo woohuulihiheya muru, onapwexiwa

² oMowabe Khoomvuwihiwatho; oHexeboni omvaanelela oheleyawaya nthala oMowabe: ‘Nrowe! Nimalamalihe muloko ole.’ Ii! oMadimeni nyuwotho, munookhala emaalelo; ekatana enimoottharattharani.

³ Mwiiwe okhuwela wa oHoronayimi: ‘Onanarihiwa! Ophwataxiwa!’

⁴ oMowabe woophwatiwa! Asikhaanaaya anookhuwela.

⁵ Awosa ankuxera ephiro ya oLuhiti, yiinlaxaka erowoka; mmuseweni onkela oHoronayimi, oniiwanyeya okhuweliwa wa othanana mwaha wa ophwatiwa.

⁶ Mutthawe! Mutthimake weera moopole okumaanyu; muthatuwe niphuwa na munikareni.

⁷ Mweenre muroromelaka soopakasanyu ni mihakhusanyu, nyuwosa munoovarasiwatho, ni Kemoxi onoorowa wootthukiwani, vamoha ni asaserdotaawe ni ahoolelaawe.

⁸ Namaphwata onoorweela isidade sootheene, kheewo eniyoopowe. Nreyareya nnoothatuwa nthala, ni muttuttuwani onoophwatiwamo, ntoko Yave uulummaawe.

⁹ Mweeleele oMowabe, niwoko iwo onoohiiwa mathalaru; isidadesaya sinoomalamalihiwa, woohihalarumo mutthu.

¹⁰ “Oolaphiwa yoowo omvara mooreesini muteko wa Yave! Oolaphiwa yoowo onooceeliha ekatanaawe oyeeha ephome!

¹¹ oMowabe onkhala woomaaleleya okhuma emiravowaaya, ntoko eviinyu ehiiwale ni nttaarikhanaya; kheeceendyiwe nipoottoro nipoottoro. oMowabe Khoonarowe wootthukiwani; tivawo, osivawaya oraaya omohamoharu ni wunkhelawaya khooceendyeiye.

¹² Tivawo, vekhaikhai anoophiyera mahuku,” oneera Yave, “kineeraaka kaarumihe anamahela a mmapoottoroni; eniihele mmapoottoroni, yiitthaxaka, epwexaka woomalela.

¹³ Vano Mowabe onimuulihiheya muru ni Kemoxi, ntoko aYixrayeli yuulihihengyaaya muru ni oBeteli, mwa weiwo yaaroromelaayawo.

¹⁴ Ongwereya hai nyuwo weera: ‘Hiyo anakhotto ooweraxa, nri anamawana’?

¹⁵ oMowabe woophwatiwa ni isidadesaya sinoovoloiwa; amiravowaaya ooreerela anoorowa owiiviwani,” onghima Mwene, mwa Yoowo Nsinanawe ti Yave a ikuru sootheene.

¹⁶ “Owiniwa wa oMowabe wookhuveela; erisaaya enrwa woowaakuveya.

¹⁷ Amwiittanaaya ootheene ni ootheene asuwenle epilaaya elalamikele. Awosa yeereke: ‘Moota yintakiwaaya ekopo yoowera, ekopo ya emwene yoovuwaxa!’

¹⁸ Mukhuruwe moovuwanimwanyu ni mukilaathi vathi puruvuru, ii! Amaki a esidade ya oDiboni, niwoko namaphwata a oMowabe ohoorwa woowananani ni ophwata isidadesanyu soolipihiwa.

¹⁹ Mukhale munseweni ni ngwehawehe, nyuwosa munkhala wAroweri. Munkohe mulopwana ontthawa ni muthiyana onoopowa, mwaakohase: ‘Ekhumelenleni?’

²⁰ oMowabe wohuulihiheya muru, niwoko woopwexiwa. Mukhuwele ni muhihimere! Mulaleiye wArenoni weera Mowabe oophwatiwa.

²¹ Nthorihelo noophiya ottuttuwani: oHoloni, oYahazi ni oMefaati,

²² oDiboni, oNebo ni oBeti-Diblatayimi,

²³ oKiriyatayimi, oBeti-Gamuli ni oBeti-Meyoni,

²⁴ oKertiyoti ni oBozera – wa isidade sootheene sa oMowabe sa ottai ni sa vakhiviru.

²⁵ Owera wa Mowabe woomalihiwa; moonowaawe wohintakiwa,” onghima Yave.

²⁶ “Munghapalihe, niwoko owo oomveiha Yave. oMowabe wiivottokolele marapheyowaaya ni okhale munyemu.

²⁷ Yixrayeli aari eneneero ya otthebwiwawanyu. Weeraka owo aaphwanyiwa vamoha ni anamwiiya nyuwo mumpukunyeraanyu muru suulummwaka sa yaale?

²⁸ Muhiye isidadesanyu! Mmake mmakhukuni, nyuwosa munkhala oMowabe! Mukhale ntoko ekhunda empaka epuurwaaya mmilakoni mwa inyatta.

²⁹ Nohiiwa sa wiixoona wa oMowabe – wiikuxawaya otokotoko, wiivuwihawaya wootheene, ni murimaaya woowiikuxerera.

³⁰ Koosuwela nnenesene wiixoonawaya,” onghima Yave, “mene ti woohimuteko, ni mitekosaya soohivareleya muteko.

³¹ Tivawo kinlalamikelaaka oMowabe, kinookhuwelela elapo yootheene ya oMowabe, kinimwaathananela amaki ootheene a oKiri-Hareseti.

³² Ii! Ivideira* sa oSibema, kinoowiinlelaxani ntoko kiinlenlaaka oYazeri. Iphandisaya saarambela mphareiya siphiyaka mpaka mphareiya ya oYazeri. Namaphwata oomorela soowiimasaya ni iwuuvasaya.

³³ Ohakalala ni mpuha woolakaseya wa ilapo sooruwereya sa Mowabe. Kohooceeliha waatta wa iwuuva* sinaamiwaayamo. Khawoworu omvotta iwuuva* ni okhuwela wa ohakalala; naari okhuweliwaka – khoohiyono wa ohakalala.

³⁴ Okhuweliwa wa oHexiboni oniiwanyeya wEleyaleni ni oYahazi, okhuma oZowari mpaka oHoronayimi ni wEglati-Xelisiya, niwoko mpaka maahi a oNimerimi aawelela.

³⁵ oMowabe kinimwaamalamaliha yaale ampakela sooveleela mwaaltaarini a miluku sikina ni anghisera erubani* milukusaya,” onghima Yave.

³⁶ “Tivawo murimaaka onlalamikelaaya oMowabe, ntoko mpetta; aani ntoko mpetta mwa amaki a oKiri-Hareseti. Mihakhu yaathukumanyaaya soolakaseya.

³⁷ Khula muru woometthiwa ni irerusene; matata ootheene ari makhwattaru ni eyuunu yootheene yookutteleliwa ni ikuwo soolalamikano.

³⁸ Mutaratoni moothemwene mwa oMowabe ni mmapuwani kheewo eriwo ohikhanle wiikhupanyera, niwoko koopwexakasa oMowabe ntoko nipoottoro nihinghaaweliwaru,” onghima Yave.

³⁹ “Moota ophwatiwaaya! Moota anlalamikaaya amakaaya! Moota oMowabe onreraaya ettuli, woowuulihiheyeene muru! oMowabe woothatuwa eneneero ya otthebwiwa ni moopopihero wa amwaattamanaaya ootheene.”

⁴⁰ Yave oneera ha: “Moone! Xaaka onkungela mapupha oMowabe.

⁴¹ oKeriyoti onoovariwa, ni isidadesaya soolipihiwa sinookuxiwa. Nihuku nno ominya murima wa anakhotto a oMowabe onuukhale ntoko wa muthiyana ayaraka.

⁴² oMowabe onoophwatiwa ntoko muloko niwoko owo woomvaanya Yave.

⁴³ Ii! Muloko wa oMowabe woopiha, nlitti ni muraakho onimoowehererani,” onghima Yave.

⁴⁴ “Yoowo anaatthawe woopiha, onoomorela mulittini, ni yoowo anaakhume mulittini, onoopharihiwa munraakhoni. Kinooruuhela oMowabe ehuhu ya nttaruxonaya,” onghima Yave.

⁴⁵ “Vamunttuusini wa oHexiboni, anamatthawa anoophwanyiwa ttewu, niwoko mooro onrweela oHexiboni, ekamaama ya oSihoni; ni onghisa iyuuci sa aMowabe ni makarakasa a atthu oonyakula.

⁴⁶ Ii! Wa nyuwo oMowabe! Muloko wa Kemoxi woophwatiwa; anamwaniinyu asilopwana anronghiwa wootthukiwani, ni anamwaniinyu asithiyana wuuwutho.

⁴⁷ Wa soothesene, kinooreherera oreereliwa wa Mowabe muhoolommo,” onghima Yave. Nthorihelo na oMowabe ninkotela va.