Yeremiya 44 - Emakhuwa Bible

Wuuliheya muru niwoko na olapa miluku sikina

¹ Masu a Yave, aarumiheliwaawe Yeremiya, mwaha wa aYuda ootheene yaakhala wExipitu ni yaamanke oMigedoli, oTapanyesi, oMemfesi ni mulaponi mwa oPatrosi ti ala:

² “Yave a ikuru sootheene, Muluku a oYixrayeli, oneera ha: Nyuwosa munimoona irisa sootheene Miyo kiruuhenlaaka oYerusaleemu wootheene ni wa isidade sootheene sa oYuda. Olelo iyo sooheleya nthala ni khasimakiwe,

³ niwoko na yoonanara apankaaya. Amakaaya aatannya isarasaka, ehisaka erubani* ni elapaka miluku sikina, mwa seiyo hata awosa, naari nyuwo hata makholowaanyu ahisuwenlaaya.

⁴ Emaara ti emaara Miyo kannoorumihelani arumeiyaaka, maprofeeti, yeera: ‘Muhipake etthu ela ya mwiikho yoothanyeya!’

⁵ Vaheera awosa khayiiwale naari khayaakipwantthe; khaahingye sootakhalasaya hata khaahiyerenre ohisera erubani* miluku sikina.

⁶ Tivawo, onyoonyiwawaka oyeehereiyaaya ni ohinsaaya isidade sa oYuda ni misewe sa oYerusaleemu, othatuwaka mathala ttewu mpaka olelo.

⁷ Yave, Muluku a ikuru sootheene, Muluku a oYixrayeli, oneera ha: ‘Wiiruuhelela heeni erisa etokotoko, mwaamalamalihaka oYuda alopwana ni athiyana, anamwane mpaka ooyariwa vaanaano, muhiihiyerakaru oohalahala?

⁸ Mutannyerenleni isarasaka ni yeeyo mumpakaanyu, muhiseraka erubani* miluku sikina sa wExipitu, wenno murwiiyaanyu okhala? Nyuwosa munimwiiphwata ni munimwiitatuxa etthu yoonyoosiwa ni yootthebwiwa variyari wa miloko sootheene sa mulaponi.

⁹ Weeraka nyuwosa moottiwala sootakhala yaapankaaya makholowaayu ni mamwene a oYuda ni axaaraya, ni sootakhalasanyu mumpakaanyu vamoha ni axaarinyu mulaponi mwa oYuda ni mmiseweni sa oYerusaleemu?

¹⁰ Mpaka olelo khamwiiyevinghe hata khamwiittittimihale, naari khamutthanre malamulowaaka ni ikano kiiyaathiyaaka ohoolowanyu ni wa makholowaanyu.

¹¹ Vanonto Yave a ikuru sootheene, Muluku a oYixrayeli, oneera ha: Koolakela wooruuhelani erisa ni omphwata Yuda ootheene.

¹² Kinoomvenxa oohalahala a oYuda, aalakenle orowa okhala wExipitu. Ootheene awosa anookhwela wExipitu; animwiiviwa ni ekatana hoye hoye etala. Okhuma mukhaani mpaka mutokweene, animwiiviwa ni ekatana hoye hoye etala. Awosa anoothatuwa eneneero ya nlapho ni moopopihero, onyoosiwa ni otthebwiwa.

¹³ Yaale ankhala wExipitu kinimwaattaruxa ni ekhotto, etala ni nihooxo, ntoko kaamuttaruxalaaka Yerusaleemu.

¹⁴ Khawoworu a ahalahanle a oYuda orongwe okhala wExipitu anoopowe hoye hoye anookhowe weera ahokoleele mulaponi ya oYuda, mwa weiwo anghaawelaaya ohokoleela ni okhalawo; khawoworu anaahokolowe, ehikhanle paahi vakhaani a anamatthawa.”

¹⁵ Vano, asilopwana ootheene yaasuwela weera axaaraya yannahisera erubani* miluku sikina, ni asithiyana ootheene yaari vaavaale, muthukumano mutokotoko, ni muloko wootheene waakhala wExipitu, ni oPatrosi, yaamweerela Yeremiya:

¹⁶ “Hiyo khanipwatthelaru munnivahaanyu mwa Nsina na Yave!

¹⁷ Ettiitthu nnoopaka sootheene nihimmaahu weera nnoopaka: nnoomuhisera erubani* pwiyamwene a wiirimu ni nnoomuyeehera soovaha sa soowura, ntoko nipankaahu hiyo, makholowaahu, mamwenaahu ni ahoolelaahu mmasidadeni sa oYuda ni mmiseweni sa oYerusaleemu. Ehuhuweene yeele naaruwera, naari ooweetteleya nnene nihihaawelaka etthu.

¹⁸ Vaheera, nihiyererakaru omuhisera erubani* pwiyamwene a wiirimu ni omuyeehera soovaha soowura, khannakhalane etthu ni naariheya mwa ekatana ni mwa etala.”

¹⁹ Asithiyana yaahaandyeerera: “Naamuhiseraahu erubani* pwiyamwene a wiirimu ni naamuyeeheraahu soovaha sa soowura, weeraka asiiyihu khayaasuwenle weera naampaka iboolu nimulikanxaka yoowo ni naamuyeeha soovaha sa soowura?”

²⁰ Vano Yeremiya aaheerela muloko wootheene, okhuma alopwana mpaka asithiyana yaamwaakhula yoowo:

²¹ “Ankha Yave? Owo khanuupuwelela erubani* ehisiwe ni nyuwo musidadeni ya oYuda ni mmiseweni sa oYerusaleemu ni makholowaanyu, ni muloko wa mulaponi? Weeraka Owo khanuupuwela yeeyo?

²² Yave ahiweraka ovilelatho sootakhalasanyu ni ipakelo soohiirasanyu, elapwaanyu yoophwateya ni yoohiiwa ttewu, yoothatuwa nlapho ni kheemakiwe, ntoko onooneyaaya olelo.

²³ Yeereenle yeeyo niwoko moohisa erubani* ni moontthekela Yave, ni khamwiiwelenle maswaawe hata khamutthanre nlamulonawe, ikanosawe ni soolamulasawe. Tivawo yoomorenlaayani erisa ela, ntoko onooneyaaya olelo.”

²⁴ Vano Yeremiya aaheerela muloko wootheene vamoha ni asithiyana: “Mwiiwe masu a Yave aYuda ootheene nyuwo muri wExipitu.

²⁵ Yave a ikuru sootheene, Muluku a oYixrayeli, oneera ha: Nyuwosa ni axaarinyu mukwanihere mwaaroromelinghaanyu mweeraka: ‘Ettiitthu nnookwanihera soororomelihasahu soomuhisera erubani* ni soovaha sa soowura pwiyamwene a wiirimu.’ “Mpwaherere! Mpake muroromelinghaanyu! Mukwanihere soororomelihasanyu!

²⁶ Mene mwiiwe masu a Yave, ootheene nyuwo, aYuda munkhala wExipitu: Miyo kinlipela mwa Nsinanaka ntokweene,’ oneera Yave, ‘wExipitu wootheene khawoworu a oYuda aniitthanetho Nsinanaka hoye hoye anaalipele mwa okumi wa Yave onlamula sootheene.

²⁷ Kinimwaawehaweha weera kaaruuhele erisa ohikhanle mpuha; aYuda a wExipitu anooriheya mwa ekatana ni mwa etala mpaka eneeraaya ephwateye ootheene.

²⁸ Eniyoopowe ni ekatana ni eniihokolowe wExipitu erowaka elapo ya oYuda khayaatta. Vano ahalahanle ootheene a oYuda arwiiye okhala wExipitu anoosuwela masu a yoole ompwaherera – awaka hoye hoye awayasa.

²⁹ Eyo eniikhale eneneerowaanyu weera kinimoottaruxelani nipuro nenenenna,’ onghima Yave, ‘vano nyuwosa munoosuwela weera woopopiherelawaka wooruuhelani erisa onimweereya vekhaikhai.’

³⁰ Yave oneera ha: ‘Kinoomwinnyerera Farawu* Hofera, mwene a wExipitu, mmatatani mwa amwiittanaawe anghaawela omwiiva, ntoko kaamwinnyerenraaka Zedekiya mwene a oYuda, mmatatani mwa Nebukadenezari, mwene a oBabiloniya, mwiittana aahaawela omwiiva.’ ”