Yeremiya 35 - Emakhuwa Bible

aRekabi

¹ Ala ti masu Yeremiya aakhenlaawe wa Yave mweehuhuni ya olamula wa Yehoyakimi mwaana mulopwana a Yosiya, mwene a oYuda:

² “Murowe wa emusi ya aRekabi, mwaalattule weera erwe musaalani emoha ya Empa ya Yave ni mwaavahe eviinyu weera ewure.”

³ Vano kaamwaasaasa Yaazaniya, mwaana mulopwana a Yeremiya, mwaana mulopwana a Habazaniya vamoha ni axunneiye ni anamwanaawe ootheene ni emusi yootheene ya aRekabi.

⁴ Miyo kaahaarongha Mpaani mwa Yave, vasaala ya anamwane asilopwana a Hanani, mwaana mulopwana a Higedaliya, mulopwana a Muluku. Esaala yaari mukerekhere esaala ya ahooleli ni vathivaya yaari esaala ya Maaseya, mwaana mulopwana a Xalumi, namalipelela a mulako.

⁵ Vano kaahiikaathi nyaapu soosareya eviinyu ni ikoomixi ohoolo wa asilopwana a emusi ya aRekabi, kinaavekelasa weera ewurase.

⁶ Wa soothesene awosa yaaheera: “Khaningwura eviinyu niwoko nikholonahu Yonadabi, mwaana mulopwana a Rekabi, aanilamulela ha: ‘Hata nyuwo naari ekhapiraanyu, muhiwureru eviinyu.

⁷ Nyuwosa muhiteketho impa hata muhaale; muhiphatteye iwuuva* hata mmiso; muhikhalane itthusene seiyo, mene nyuwosa mmwimakase muheemani. Hiiho nyuwosa munookhala ehuhu yincipale mulaponi mmo nyuwo muraanyu anamathaamathaama.’

⁸ Ninniiwelela sootheene nilamuleliwaahu ni nikholonahu Yonadabi, mwaana mulopwana a Rekabi. Hiyo, axaarihu, anamwaniihu asilopwana ni asithiyana khaningwuraru eviinyu mookuminimwahu wootheene,

⁹ khaninteka impa weera nikhalemo, hata khaninono imatta sa iwuuva*, imatta hata soophatteya.

¹⁰ Ninkhala muheemani niiwelelaka oororomeleyeene sootheene nilamuleliwaahu ni nikholonahu Yonadabi.

¹¹ Vaheera, Nebukadenezari, mwene a oBabiloniya, avolowakaru mulaponimu, naaheera: ‘Niroweke oYerusaleemu weera noopowe mwa anakhotto a aBabiloniya ni a awaSiriya.’ Hiiho nimpwaherera okhala oYerusaleemu.”

¹² Vano Yave aamweerela Yeremiya:

¹³ “Yave a ikuru sootheene, Muluku a oYixrayeli, oneera ha: Mwaaleele atthu a oYuda ni amaki a oYerusaleemu: ‘Weeraka nyuwo khamuxuttera etthu ni khamuniiwelela maswaaka?’ onkoha Yave.

¹⁴ ‘Yonadabi, mwaana mulopwana a Rekabi, aahaalamulela anamwanaawe weera ehiwure eviinyu, ni malamulo awo anneettela mpaka olelo. Awosa khaangwura eviinyu mpaka olelo niwoko aneettela malamulo a nikholonaya. Vaheera Miyo kannuuluma ni nyuwosa imaara sincipale – wasoothesene nyuwosa khamunkiiwelela.

¹⁵ Kaahoorumihelasani imaara sincipale arumeiyaaka ootheene, maprofeeti. Awosa yeera khula mutthu a nyuwo waatthuneya ohiya mweettelowaawe woonanara, okhaliha nnene soopakasawe ni ohiya otthara miluku sikina weera alape. Hiiho, nyuwosa mwaammaka mulaponi koovanghaakani nyuwo ni makholowaanyu. Vaheera nyuwosa khamwaakipwantthe hata khamwaakiiwelenle.

¹⁶ Ekhapira ya Yonadabi, mwaana mulopwana a Rekabi, yookwanihera nlamulo evahiwaaya ni nikholonaya, vaheera muloko ola khoonkiiwelela.’

¹⁷ Vanonto Yave a ikuru sootheene, Muluku a oYixrayeli oneera ha: ‘Mwiiwe, kinooruuhela oYuda ni amaki ootheene a oYerusaleemu erisa yootheene mwa yeeyo kaawoopererenlaaka; niwoko kaahaaleela, mene khayaakiiwale, kaawiitthana, mene khayaakaakhunle.’ ”

¹⁸ Yeremiya aaheerela emusi ya aRekabi: “Yave a ikuru sootheene, Muluku a oYixrayeli oneera ha: ‘Nyuwo mohiiwelela yeeyo nikholonanyu Yonadabi oolamulenlaaweni; mookwanihera mahusihowaawe ootheene ni moopaka sootheene owo oolamulenlaaweni.

¹⁹ Tivawo, Yave a ikuru sootheene, Muluku a oYixrayeli oneeraawe ha: ‘Kheemuhaleelaru Yonadabi, mwaana mulopwana a Rekabi, ekhapira eniikirumeele.’ ”