Yeremiya 34 - Emakhuwa Bible

Zedekiya onimookhwa ootthukiwa

¹ Nebukadenezari, mwene a oBabiloniya, anakhottwaawe ootheene a imwene sootheene ni miloko sa omwene owo aalamulaawe yaawananaaya oYerusaleemu ni isidade sootheene saarukureenrewo, Yave aamurumihela masu ala Yeremiya:

² “Yave oneera ha Muluku a oYixrayeli: Murowe wa mwene Zedekiya a oYuda ni mwamuleele: ‘Yave oneera ha: Kininnyerera esidade ela mmatatani mwa mwene a oBabiloniya, ni owo onoohisa.

³ Nyuwo khamoopowa, mene munoovariwa mwinnyereriweke mmatatanimwawe. Nyuwo munoomoona mwene a oBabiloniya, ni owo onimuuluma ni nyuwo ttundattunda. Ni nyuwo munoorowa oBabiloniya.

⁴ Wa soothesene, mwiiwe yoororomeliha ya Yave, ii Zedekiya mwene a oYuda. Yave Oneera ha mwaha wa nyuwo: Nyuwo khamwiiviwa ni ekatana,

⁵ mene mmwikhwe mmuretteleni. Ni hiiho ntoko muloko ohinsaaya erubani* ottittimiherelaka makholowaaya, mamwene yaaradenlaaya, eniihise erubani* yoottittimiherelakani, ni animookhupanyerani yeeraka: “Ii, Apwiya!” Aani ti yoomeene kinroromeliha, onghima Yave.’ ”

⁶ Mprofeeti Yeremiya aamuleela masu ootheene ala mwene Zedekiya a oYuda oYerusaleemu,

⁷ anakhotto a mwene a oBabiloniya yaawananaaya oYerusaleemu ni isidade sikina sa oYuda nlelo saawanano – oLakixi ni wAzeka. Vano paahi isidadesene seiya ti soolipihiwa saahanle oYuda.

Otapuxeya wa ipottha

⁸ Yave aamurumihela masu Yeremiya vahoolo wa wiiwanana Zedekiya aapankaawe ni muloko wootheene wa oYerusaleemu, alaleiyaka otapuxiwa wa ipottha.

⁹ Ootheene waatthuneya otapuxa ipotthasaya ilopwana ni ithiyana aHeberi; khaawo eera ampake opottha muYuda mukhwaawe.

¹⁰ Hiiho, ahooleli ootheene ni muloko yaakhalinghe mwiiwanano ola wa otapuxa ipottha, yaahaakhulela otapuxa ehaakhalihakatho ipottha; muloko waahiiwelela, onaatapuxa opottha.

¹¹ Vaheera, vahoolowaya, waaceendya soowuupuwela onaahokoloxa asilopwana ni asithiyana waatapunxaaya, onahokoleelatho waapaka opottha.

¹² Vano Yave aamweerela Yeremiya:

¹³ Yave, Muluku a oYixrayeli, oneera ha: “Kaapaka wiiraana ni makholowaanyu kaakhumihaleene wExipitu, mulaponi ya opottha. Miyo kaaheera:

¹⁴ ‘Simanleene iyaakha ithannapiili, khula mutthu a nyuwo amutapuxeke muHeberi mukhwaawe iithuminghe wa nyuwosa. Oorumeenleeneni iyaakha ithannamosa, nyuwo munoomutapuxa.’ Vaheera makholowaanyu khayaakiiwelenle hata khayaakipwantthe.

¹⁵ Nnaanaanoni nyuwosa moorukunxa murima, munapaka yeeyo kinaakhulela: Khula mutthu a nyuwo oolaleiya otapuxiwa wa asikhwaawe. Nyuwosa moopaka wiiwanana ohoolowaka mpaani enkuxa Nsinanaka.

¹⁶ Vaheera, vano, nyuwosa moohokoleela ottuli ni moohiiriha Nsinanaka, niwoko khula mutthu a nyuwo ohaahokoloxa asilopwana ni asithiyana mwaatapunxaanyu. Nyuwosa moohokoleela waapaka opottha.

¹⁷ Vanonto, Yave oneera ha: Nyuwosa khamukiiwelenle; khamulaleiye otapuxa wa mukhwiinyu ni wa mwaattamanaanyu. Tivawo, Miyo kinlaleiyaaka otapuxeyawanyu, onghima Yave, aani, moota wa otapuxeya oneera owiiveeni mwa ekatana, mwa nihooxo ni mwa etala. Kinoopakiha weera nyuwosa mukhale etthu yoowoopiha wa omwene wootheene wa mulaponi.

¹⁸ Kinoowinnyerera atthu ananarihale wiiraanawaka ni ahikwanihenre wiiraana yaapankaaya vamaithoniwaka. Kinimookawanyihani ntoko nyuwosa mwaamukawanyinghaanyu mwaamombe ikapatthi piili, munavira eriyari ya ikapatthi sa mwaamunama ole,

¹⁹ eyo tiiyo, ahooleli a oYuda ni a oYerusaleemu, asitokweene a empa ya emwene, asaserdoti* ni muloko wootheene wa mulaponi waavinre eriyari ya mwaamombe.

²⁰ Aani, Miyo kinoowinnyerera yaawo mmatatani mwa amwiittanaaya anghaawela owiiva. Mittembosaya sinookhala yooca ya ipalame ni axinama.

²¹ Miyo kinoomwinnyerera Zedekiya, mwene a oYuda, ni ahoolelaawe, mmatatani mwa amwiittana anghaawela owiiva ni mwa anakhotto a mwene a oBabiloniya, omalihale oriciwa.

²² Kinoolamulela, onghima Yave, ni kinimwaahokoloxera esidadeene yeela. Awosa anoowanano yeela, ni anoowina, ehiseke. Kinoopakiha weera isidade sa oYuda siheleye nthala ni sihimakiwe.”