Yeremiya 32 - Emakhuwa Bible

Yeremiya onthuma ematta

¹ Ala ti masu Yeremiya aakhenlaawe wa Yave muyaakhani yanaamuloko ya olamula wa Zedekiya, mwene a oYuda, yaari eyaakha yanaamuloko niithannatthaaru ya olamula wa Nebukadenezari.

² Ehuhu ele, anakhotto a mwene a oBabiloniya yaamurica Yerusaleemu ni mprofeeti Yeremiya aari etthukeliwo vanipuwani na anamalipelela, vaate wa emwene ya oYuda.

³ Vano, Zedekiya, mwene a oYuda, aamutthukawo Yeremiya, “Amootheraka othalihera moota ola: ‘Yave onimwinnyerera esidade mmatatani mwa mwene a oBabiloniya, ni owo onoowina.

⁴ Zedekiya, mwene a oYuda, khoopowa mmatatani mwa aBabiloniya, mene woohihovela onimwinnyereriwa mmatatani mwa mwene a oBabiloniya, onoomuulumano ttundattunda, ni onoomoona ni maithwaawe.

⁵ Owo onoomurongha Zedekiya oBabiloniya, weiwo aneeraawe akhalewo mpaka Yave aneeraawe amalihe mulattwaawe ni, nyuwosa mwaawanano aBabiloniya, khasiweettelani nnene.’”

⁶ Vano Yeremiya aaheera: “Yave aakirumihela maswaawe, eeraka ha:

⁷ Hanameeli, mwaana mulopwana a atatinyu, Xalumi, onimoorwa okumana ni nyuwo aweerelakani: ‘Muthume emattaaka eri wAnatote, niwoko, mureene mmusi xaxaxa, nyuwo moophwanela ni ontthuneya othuma.’

⁸ Ntoko Yave aahimalaawe, munnaka Hanameeli aahoorwa okikumanano vaate wa emwene vanipuroni na anamalipelela, aneera: ‘Muthume ettimaaka eri wAnatote, mulaponi mwa Benyamini, niwoko emphwanela okuxa nyuwo ni woopola. Muthumeke.’ Vano kaasuwela weera ale yaari masu a Yave.

⁹ Hiiho kaathuma wa munnaka Hanameeli ematta yaari yawawe wAnatote. Kaaringa ixekeli* sa eparatha* muloko niithannapiili, kinamuliva.

¹⁰ Kaattitta, kinalipiha yoolempwa, kinaringa eparatha* vamuringoni, ohoolo wa anamoona kaawiitthannaaka.

¹¹ Kaakuxa yoolempwa ya othumihiwa yoowaliwa yaarino soonyesererihiwa ni ikano sa othuma, vamoha ni yoolempwa yoohiwaliwa.

¹² Vano yoolempwa ya othuma eyo kaamwinnyerera Baruki, mwaana mulopwana a Neriha, mwaana mulopwana a Makheseya vamaithoni wa munnaka Hanameeli, wa anamoona yaattintte yoolempwa ni wa aYuda ootheene yaakilaathiye vanipuwani na anamalipelela.

¹³ Vamaithoniwaya kaamulamula ha Baruki:

¹⁴ ‘Yave a ikuru sootheene, Muluku a aYixrayeli oneera ha: Mukuxe icipaaso iya – yoottittiwa ni yoohittittiwa ya yoolempwa ya mathumeliwo, ni mwiikaathi mmwaapuni weera sithokororeye wa iyaakha sincipale.

¹⁵ Niwoko Yave a ikuru sootheene, Muluku a aYixrayeli oneera ha: ‘Impa, imatta ni imatta sa iwuuva* sinoohokoleela othumihiwa elapweene yeela.’”

Yeremiya omvekelela wiiwexexa

¹⁶ “Kimwinnyerenreene Baruki mwaana mulopwana a Neriha, yoolempwa ya othuma, kaamvekela Yave:

¹⁷ Ii! Yave onlamula sootheene, Nyuwo moopaka erimu ni vathi mooweranimwanyu otokotoko ni mwa moonowaanyu woowookowa. Kheewo enoorikani.

¹⁸ Munoonihera onnene mpaka ikhapira ikhapirasene, vaheera munaavonyera anamwane soottheka sa asitithaya. Ii! Muluku Mutokweene ni Ooweraxa, mwa Yoowo Nsinanawe ti Yave a ikuru sootheene,

¹⁹ sootthunasanyu ti sitokotoko ni soopakasanyu ti sa ikuru. Maithwaanyu angwehexexa ipakelo sa atthu; Nyuwo munimutthuvela khula mutthu muttharaka mweettelowaawe, ntoko ipakelo sa mutekwaawe simphwanelaaya.

²⁰ Mwaapaka ineneero ni sootikhiniha wExipitu ni mumpwaherera opaka mpaka olelo okhuma oYixrayeli mpaka eriyari ya omutthu wootheene, ni moophwanela epili eri yawinyu mpaka olelo.

²¹ Mwaakhumiha mulokwaanyu wExipitu ni ineneero ni sootikhiniha, ni ntata noowera ni moono woowookowa, mutannyeraka woova otokotoko.

²² Mohaavaha elapo ela, mwa yeeyo mwaaroromelinghaanyu makholowaaya ni nlipelo; elapo yoosareya mukaka ni oravo.

²³ Awosa yaahoorwa okuxa elapo ela, mene khaawiiwelenleni hata khayeettenle Nlamulonanyu. Khaapankeru etthu ya seiye mwaalamulenlaanyu. Tivawo yiiruhenlaaya erisa yootheene ela.

²⁴ Ikaaro sookurumulela exiri sintekiwa ni amwiittana weera ekuxe esidade. Eyo enimwinnyereriwa mmatatani mwa aBabiloniya angwanano niwoko na ekhotto, etala ni nihooxo. Yookwanihereya yeele mwaahimmaanyu, ntoko munoonaanyu vano.

²⁵ Ii Yave onlamula sootheene, eyo eri hiiho, ‘Nyuwo mookiruma othuma ematta ni waalattula anamoona wa othuma wu, naari esidade yinnyereriweene mmatatani mwa aBabiloniya!’ ”

Yave onroromeliha ohokolowa wa muloko

²⁶ Vano Yave aamweerela Yeremiya:

²⁷ “Miyo ti Yave, Muluku a omutthu wootheene. Kheewo enkirikela.

²⁸ Vanonto Yave oneera ha: Kininnyerera esidade ela mmatatani mwa aBabiloniya ni mwa Nebukadenezari, mwene a oBabiloniya, anaawine.

²⁹ aBabiloniya angwanano esidade ela, anoovolowamo, ehiseke. Awosa anoohisa vamoha ni impasene mwa seiyo muloko otannyenraaya isarasaka emuhiseraka erubani* Bahali* mmapathonimwaya, eyeehaka sooveleela soowura ettittimiherelaka miluku sikina.

³⁰ Okhuma emiravowaaya muloko wa aYixrayeli ni wa oYuda, khoompakaru ekina ehikhanle yeeyo kinoonelaaka okhala yoonanara; vekhaikhai muloko wa oYixrayeli khoopankeru ekina ohikhanle otannya isarasaka, onghima Yave.

³¹ Okhuma nihuku etekiwaaya mpaka olelo, esidade ela entannyera onyoonyiwawaka moota wooweera ontthuneya ovenxa ohoolowaka.

³² Muloko wa oYixrayeli ni wa oYuda onnatannya isarasaka mwa soonanara sootheene ompakaaya – awosa, mamwenaaya ni ahoolelaaya, asaserdotaaya ni maprofeetaaya, atthu a oYuda ni amaki a oYerusaleemu.

³³ Aakirera ettuli ehikiwehaka; kaamwaaxuttiharu imaara imaarasene, khayaatthuna okiiwa hata khayaakhulenle wookoleliwa.

³⁴ Aahiiriha Empa enkuxa Nsinanaka, ehelakamo icaambulo sa milukusaya sa mwiikho.

³⁵ Yaamutekela Bahali* mapuro ootteela oorakama mureyareyani na oBeni-Hinomi, weera emveleelele Moloki anamwanaaya asilopwana ni asithiyana. Vano eyo ti etthu kihitonkwaaka olamulela, epakelo yoohiira kihinuupuwelelaaka weera epake; ni hiiho, aamutthekiha Yuda.

³⁶ Vanonto Yave oneerela ha esidade ela, mwa yeeyo nyuwosa muneerelaanyu weera enimwinnyereriwa mmatatani mwa aBabiloniya mwa ekhotto, etala ni mwa nihooxo:

³⁷ Vekhaikhai Miyo kinimwaathukumanyiha mulaponi moothemwene kaamwaraxenlaaka musaranimwaka soopatta ni moonyoonyiwanimwaka otokotoko; Miyo kinimwaahokoloxera nipuro nna ni kinootthunihera weera ekhale oolipeene.

³⁸ Awosa anookhala mulokwaaka, ni Miyo kinookhala Mulukwaaya.

³⁹ Kinimwaavaha muupuwelo ni mweettelo mmoha, weera ekoove mookuminimwaya wootheene, wa okhalawaya nnene awosa ni anamwanaaya ni ikhapirasaya.

⁴⁰ Kinimwaakhalihera wiiraana woohimala: Nkirwa kihiya waapakela nnene, ni kinoopakiha weera ekoove ni murima, weera ehikihuluwetho.

⁴¹ Kinoohakalalela waapakelawaka nnene, ni kinimwaakhaliha oolipeene mulaponimu ni murimaaka wootheene ni okumaaka wootheene.

⁴² Yave oneera ha: Mooteene yoowo kiruuhenlaaka irisa sitokotoko sootheene muloko ola, kinimwaavahatho yawayeene kaaroromelinghaaka.

⁴³ Anoothummwatho mapuro oomaka mulaponimu, mwa yeela nyuwosa mweerenlaanyu: ‘Ti elapo yooheleya nthala, yoohikhala atthu naari axinama, niwoko yohinnyereriwa mmatatani mwa aBabiloniya.’

⁴⁴ Imatta sinoothummwa ni eparatha*, ni soolempwa sinoottittiwa silipihiwaka ohoolo wa anamoona mulaponi mwa Benyamini, mmittettheni sirukureenre oYerusaleemu, mmasidadeni sa oYuda, ni sa mmanyaakoni, sa vathi wa mmanyaakoni ni oNegeba, niwoko Miyo kinooreherera oreereliwawaya, onghima Yave.”