Yeremiya 30 - Emakhuwa Bible

Orehereriwa wa oYixrayeli ni oYuda

¹ Mutthenga waamurweenle Yeremiya wa mpatta wa Yave ti ola:

² “Yave, Muluku a oYixrayeli, oneera ha: ‘Mulepe mulivuruni masu ootheene kooleenlaakani.

³ Vekhaikhai anoophiyera mahuku,’ onghima Yave, ‘kineeraaka kiceendye oreereliwa wa mulokwaaka, aYixrayeli ni aYuda, ni kinimwaahokoloxera elapo kaavanghaaka makholowaaya, weera ekuxe,’ oneera Yave.”

⁴ Masu Yave uulummaawe mwaha wa oYixrayeli ni oYuda ti ala:

⁵ “Yave oneera ha: ‘Oniiwanyeya okhuweliwa wa orukureeriheya nyuru – otteenguwa ohikhanle wa murettele.

⁶ Mukohe ni moone: Mulopwana onoowera oyara ntoko muthiyana? Heeni kingwoonaaka asilopwana ootheene evarenleene vamirimani ntoko muthiyana ayaraka? Owuumenleni owanoni?

⁷ Moota nneeraaya noopihe nihuku nno! Noohilikanxereya! Eniikhale ehuhu ya othanana wa Yakobe; mene owo onoovuluxiwa.

⁸ Nihuku nno,’ onghima Yave a ikuru sootheene, kinoophwata nivatta noolemela nri muxikomwaya ni kinoopasa onyoorowaaya; kheepakiwatho ipottha ni anamarwa.

⁹ Anoomurumeela Yave, Mulukwaaya, ni Davide, mwenaaya, kineeraaka kaavahe.

¹⁰ ‘Tivawo, ohoove, murumeiyaaka, Yakobe! Ii! Yixrayeli! Muhituthuwe,’ onghima Yave. ‘Miyo kinoowoopolani nipuro noorakamela, ni ekhapiraanyu, elapo mutthukeliwaanyuwo. Yakobe onoohokolowa ni onookhala mmuretteleni ni oolipeene; khaawo anooramaramihe.

¹¹ Vano Miyo kiri ni nyuwo ni kinimoovuluxani,’ onghima Yave. ‘Kinoophwata woomalela miloko sootheene mwa seiyo Miyo koomwaraxenlaakani; vaheera wa nyuwo, nkoophwatani woomalela. Miyo kinimoolakani, ntoko mumphwanelaanyu. Nkoohiyani woohoottaruxani.’

¹² Yave oneera ha: ‘Ovulalawanyu wootepaxa, nikhwattananyu, noohilameya.

¹³ Khawowo anaakihe nthowananyu; khoowowo murette wa nikhwattananyu, khoowowo olamihiwa wa nyuwo.

¹⁴ Oosiveleyaanyu ootheene ahoottiwalani; awosa khaanoopwatthani. Miyo kohoowananani ntoko ompakaawe mwiittana; kohoovahani nttaruxo nootepaxa niwoko otakhalawanyu ti otokotoko ni sootthekasanyu khasinaalikeleya.

¹⁵ Munkhuwelela heeni mwaha wa ovulalawanyu, wa nikhwattananyu noohivola? Koopakenleni itthusene seiya niwoko sootakhalasanyu ti sitokotoko ni sootthekasanyu khasinaalikeleya.

¹⁶ Vaheera ootheene anoonyaanyani anoonyaanyiwa; amwiittanaanyu ootheene anooronghiwa wootthukiwani. Ootheene anohuhulani, anoohuhuliwa; ni kinimwaahooxa ootheene anoohooxani.

¹⁷ Kinoohela mapharima ovulalawanyu ni kinoovoliha makhwattaanyu,’ onghima Yave, ‘niwoko nyuwo, Siyoni, angwiitthanani ookhoottiwa, mwa yoole ohimpwatthiwaru.’

¹⁸ Yave oneera ha: ‘Kinooceendya oreereliwa wa iheema sa Yakobe ni kinoomorela ikharari mookhalamwawe. Esidade enooraseliwa mmathalanimwaya ni empa ya emwene vanipuroniwaya.

¹⁹ Mwa yaawosa sinimoorwa icipo sootthapela ni oruma wa ohakalala. Miyo kinoowaattiha ni awosa kheevukuwa; Miyo kinimwaattittimiherela ni awosa kheenyoosiwa.

²⁰ Anamwanaaya eniikhale ntoko yaaraaya mmahukuni a khalayi, ni mulokwaaya onoolipihiwa ohoolowaka; kinimwaattaruxa ootheene anaahasula.

²¹ Muhoolelaaya anaakhale mmoha a eriyaraaya; namalamula anaakhumelele eriyaraaya. Miyo kinoomuruuha vakhiviru ni owo onookaattamela; vano taani eera iileve akaattamelaka Miyo?’ onkoha Yave.

²² ‘Tivawo, nyuwosa munookhala mulokwaaka, ni Miyo kinookhala Mulukwaanyu.’ ”

²³ Moone, ettheku ya Yave! Onyoonyiwawawe wookurukuttuwa! Eyuupuru emmorela mmuru mwa atakhali.

²⁴ Isara sa Yave khasisusa mpaka Owo aneeraawe akwanihere yoolakelaawe. Mmahukuni a muhoolo nyuwosa munimwiiwexexa yeeyo.