Yeremiya 27 - Emakhuwa Bible

Eneneero ya olemeliwa wa emombe

¹ Ompacereroni wa olamula wa Zedekiya, mwaana mulopwana a Yosiya, mwene a oYuda, yaamurweela masu ala Yeremiya wa mpatta wa Yave:

² Yave okilamulenle ha: “Mwiipakele nivatta nitthukiweene ni mikhoyi ni etthaabwa ni ngware muxiko.

³ Vahoolowaya mwaarumihele mutthenga mamwene a awEdomi, oMowabe, wAmoni, oTiro ni oSidoni, mwa anamitthengaaya arwiiye oYerusaleemu weera emoone Zedekiya, mwene a oYuda.

⁴ Mutthenga muneeraanyu mwaarumiheleke asipwiiyaanyu ti ola: ‘Yave a ikuru sootheene, Muluku a oYixrayeli oneera ha:

⁵ “Miyo koopattuxa elapo, atthu ni axinama arimo, ni owerawaka otokotoko ni moonowaaka wowookoweene, ni Miyo kinimvaha kinimutthunaaka.

⁶ Vano ti Miyo muneenaaka kininnyerera miloko sootheene iya mmatatani mwa murumeiyaaka Nebukadenezari, mwene a oBabiloniya; koomukhaliha mutokweene mpaka wa axinama a mutuphini.

⁷ Miloko sootheene nsilamuliweke ni yoowo, mwaniye ni osuulwaawe; mpaka ophiyera mahuku eneeraaya enyaatuliwe elapwaaya ni miloko sincipale ni mamwene ooweraxa.

⁸ Wa soothesene, muloko hoye hoye omwene oneera ohimwiiwelele Nebukadenezari, mwene a oBabiloniya, naari ohiware nivatta noolemela muxikomwawe, Miyo kinoottaruxa muloko owo ni ekhotto, etala ni nihooxo, oneera Yave, ni mwa yoowo kinoophwata woomalela.

⁹ Muhiwiiwelele maprofeetaanyu, anahakwaanyu, anamataphulelaanyu, anamadyiinaanyu ni akhwiraanyu, mwa yaawo angweerelani weera muhimwiiwelele mwene a oBabiloniya.

¹⁰ Vano yeeyo awosa anthalihaaya ti yoowootha ni animooronghani ottai wa elapwaanyu. Miyo kinoowoomolani ni munooriheya.

¹¹ Vaheera, wakhala muloko onuuhele nivatta noolemela muxikomwaya ni onuumurumeele mwene a oBabiloniya, vano muloko owo kinoohiya opwahereraka mulaponimwaya weera okhale ni olimemo, oneera Yave.”’”

¹² Mutthengeene yoowo koomwinnyerera Zedekiya, mwene a oYuda, kimweerelaka: “Ngware muxikomwanyu nivatta noolemela mwene a oBabiloniya ni mulokwaawe, ni nyuwosa munookhala ni okumi.

¹³ Mmwikhweleni nyuwo vamoha ni mulokwaanyu mwaha wa ekhotto, etala, ni nihooxo, mwa seiyo Yave onoopopiheraaweno ottaruxela muloko oneera ohimwiiwelele mwene a oBabiloniya?

¹⁴ Muhiiwelele masu a maprofeeti angweerelani weera muhimwiiwelele mwene a oBabiloniya; anthalihera soowootha.

¹⁵ Miyo nkaaruminghe! Oneera Yave. Awosa anthalihera soowootha mwa Nsinanaka. Tivawo, Miyo kinoowoomolani, ni nyuwosa munooriheya vamoha ni maprofeeti anoothaliherani masweene yaawo.”

¹⁶ Vano kaaweerela asaserdoti* ni muloko wootheene ola: “Yave oneera ha: Muhiwiiwelele maprofeetaanyu aneera weera woohipiseya ikaruma sa Mpaani mwa Yave sinoohokoloxiwa oBabiloniya woowaakuveya. Awosa anoothaliherani soowootha.

¹⁷ Muhiwiiwelele. Mwiixinnyerere wa mwene a oBabiloniya, ni nyuwosa munookhala ni okumi. Eheleeleke heeni nthala esidade ela?

¹⁸ Awosa yaareene maprofeeti ookhalano masu a Yave, emudyoonttelele Yave a ikuru sootheene, evekelaka weera ikaruma sihanle Mpaani mwa Yave, vaate wa emwene ya oYuda ni oYerusaleemu sihironghiwe oBabiloniya.

¹⁹ VanoYave a ikuru sootheene oneera ha mwaha wa amarimbu, a nttankhi, na ilipihero ni sa ikaruma sikina sihiiwale esidadeene yeela,

²⁰ mwa seiyo Nebukadenezari, mwene a oBabiloniya, ahaakuxalaawe oYerusaleemu arowaka oBabiloniya, aamutthukalaawe Yehoyakini, mwaana mulopwana a Yehoyakimi, mwene a oYuda vamoha ni maneethaawe ootheene a oYuda ni a oYerusaleemu.

²¹ Aani Yave a ikuru sootheene, Muluku a oYixrayeli, oneera ha mwaha wa ikaruma sihanle Mpaani mwa Yave, vaate wa mwene a oYuda ni oYerusaleemu:

²² ‘Sinooronghiwa oBabiloniya ni iwo sinookhalawo mpaka nihuku kineeraaka kitthune okuxawo,’ oneera Yave. ‘Vano kinoohokoloxa kitekiheke mapuroweene yaala.’ ”