Yeremiya 26 - Emakhuwa Bible

Yeremiya onoopopiheriwa okhwa

¹ Ompacereroni wa olamula wa Yehoyakimi, mwaana mulopwana a Yosiya, mwene a oYuda, masu yaarwiiye wa Yave ti ala:

² “Yave oneera ha: Mweemele vanipuwani na Empa ya Yave, ni mwaleele muloko wootheene wa isidade sa oYuda onrwa olapa Mpaani mwa Yave; mwaleele sootheene Miyo kineeraaka koolamuleleni; muhiipithiheru nsu.

³ Apaale awosa eniyiiwe ni khula mutthu anaahiye mweettelowaawe woonanara. Vano Miyo kinoohiya waaruuhela erisa kaavaanelenlaaka niwoko na yoonanara ampakaaya.

⁴ Mwaaleele: ‘Yave oneera ha: Nyuwosa mwaahikiiwa, hata mwaahitthara malamulowaaka koovanghakani,

⁵ ni mwaahiiwa masu a arumeiyaaka, maprofeeti, mwa yaawo kinoorumihelaakani imaara imaarasene, munoohiwiiwelelaru.

⁶ Vano Empa ya Muluku ela kinoopakela yeeyo kipakenlaaka Nipuro Nootteela* na oSilo ni esidade ela kinoopakelatho etthu ya nlapho eriyari ya miloko sootheene sa mulaponi.’ ”

⁷ Masaserdoti*, maprofeeti ni muloko wootheene waamwiiwa Yeremiya uulumaka masu awo Mpaani mwa Yave.

⁸ Vanonto, Yeremiya amalihaleene oleela muloko wootheene aalamuleliwaawe ni Yave, asaserdoti*, maprofeeti ni muloko wootheene waamvara, oneera: “Vekhaikhai nyuwo munimookhwa.

⁹ Heeni nyuwo muthalihenraanyu otthuna wa Muluku mwa Nsina na Yave muhimaka weera Empa ya Muluku ela enookhala ntoko oSilo ni weera esidade ela enoophwatiwa ehiiweke?” Ni muloko wootheene waamurica Yeremiya Mpaani mwa Yave.

¹⁰ Ahooleli a oYuda esuwelakaru yeeyo, yaarowa vaate wa emwene mpaka Mpaani mwa Yave, enakilaathela wuuluma milattu, vamulako munyowani wa Empa ya Yave.

¹¹ Asaserdoti* ni maprofeeti yaaweerela ahooleli ni muloko wootheene: “Mulopwana ola athoriheliweke okhwa niwoko oothalihera otthuna wa Muluku moota woonanara esidade ela. Nyuwosa moomwiiwa ni maaruwaanyu!”

¹² Vano Yeremiya aaweerela ahooleli ni muloko wootheene: “Yave ookirumiha weera kithalihere otthuna wa Muluku Empa ya Yave ni wa esidade ela sootheene mwiiwalaanyu.

¹³ Vano, muhiye mweettelowaanyu ni ipakelosanyu soonanara ni mmwiiwelele Yave, Mulukwaanyu. Hiiho Yave onoohiya woopakelani erisa oolakelenlaaweni.

¹⁴ Wa miyo – kiri mmatatanimwanyu; mukipake enooreerelani.

¹⁵ Vanonto musuwele weera, mwakiivasa, esidade ela ni amakaaya anookhalano nthowa na oyeeheya wa ephome yoohinthowa, niwoko vekhaikhai, Yave okirumihale wa nyuwo weera kooleeleni masu ala.”

¹⁶ Vano ahooleli ni muloko wootheene yaaweerela asaserdoti* ni maprofeeti: “Mulopwana ola ahithoriheliwe okhwa! Owo onileenle mwa Nsina na Yave, Mulukwaahu.”

¹⁷ Akina a ahooleli a elapo yaaheemela, eneerela muthukumano wootheene wa muloko:

¹⁸ “Mika a oMorexeti aathalihera otthuna wa Muluku mmahukuni a Hizekiya, mwene a oYuda, aneerela muloko wootheene wa aYuda: ‘Yave a ikuru sootheene oneera ha: Siyoni onoottipuriwa ntoko mmatta. Yerusaleemu onoothatuwa ettuxo, Empa ya Muluku nttumuxa, mwaako woophipa.’

¹⁹ Weeraka Hizekiya, mwene a oYuda, hoye hoye mukina a muloko wa oYuda woomwiiva? Hizekiya khamoomve Yave ni khamuroromenle Yoowo? Ni Yave khahingye waapakela erisa aalakelenlaawe? Nihanle vakhaani wiiruuhela erisa!”

²⁰ Mulopwana mukina aathalihenre otthuna wa Muluku mwa Nsina na Yave aari Uriya, mwaana mulopwana a Xemayeya, a oKireyati-Yeharimi. Owo aathalihera otthuna wa Muluku esidade ela ni elapo ela itthusene seiya sihimmwale ni Yeremiya.

²¹ Mwene Yehoyakimi, anakhottwaawe ootheene ni asitokweenaawe yiiwakaru yeeyo, mwene aahaasaasera omwiiva. Vano, Uriya iiwakaru yeeyo, aatthawela wExipitu.

²² Vaheera mwene Yehoyakimi aamurumihela wExipitu Elinatani, mwaana mulopwana a Akibori vamoha ni asilopwana akina,

²³ mwa yaawo yaamurwanne Uriya wExipitu, enamurongha wa mwene Yehoyakimi, aalamulenle wiiviwa ni ekatana. Vahoolowaya yaamurihela mulittini yaariheliwaayawo yakhalaru atthu.

²⁴ Vaheera Ahikami, mwaana mulopwana a Xafani aamukhapelela Yeremiya, ooceelihaka winnyereriwa wa muloko weera iiviwe.