Yeremiya 23 - Emakhuwa Bible

Orehereriwa vahoolo wa wootthukiwani ottaiwene

¹ “Ii! Wa akukhuli amphwata ni ammwaraxa ikhondoolo sa nikhoolanaka!” onghima Yave.

² Tivawo Yave Muluku a oYixrayeli ongweerelaawe ha akukhuli ankosoopa mulokwaaka: “Mweenre mmwaraxa ni moomola muhuwaaka muhikosoopaka, kinimooruuhelani nttaruxo niwoko na soonanara mpankaanyu,” onghima Yave.

³ Miyo muneenaaka kinimwaathukumanyiha yaawo ahalahanle a muhuwaaka mweelaponi sootheene kiwoomolenlaakawo ni kinimwaahokoloxera yaacaayamo. Wu animunnuwa erelaneke.

⁴ “Kinimwaakhalihera akukhuli eneera yaakosoope ni awosa khayoovatho naari kheetteenguwa ni khaawo anaahaleele,” onghima Yave.

⁵ “Anoophiyera mahuku,” onghima Yave, “Miyo kineeraaka kimurehererele Davide Ephuwela ya Ekhaikhai, mwene anaalamule ni miruku ni anaapake yeeyo eri yoororomeleya ni ya ekhaikhai mweelaponi.

⁶ Mmahukunimwawe oYuda onoovuluxiwa ni oYixrayeli onookhala woolipeene. Ni nsina aneeraawe iitthaneliwe ti nna: ave ti Ekhaikhaiyaahu.

⁷ Vano, anoophiyera mahuku,” onghima Yave, “atthu eneeraaya eheeretho: ‘Kinlipela mwa Nsina na Yave, mwa Yoowo aakhumihale aYixrayeli wExipitu,’

⁸ mene eniyeere: ‘Kinlipela mwa Nsina na Yave mwa yoowo aakhumihale ekhapira ya aYixrayeli mweelaponi mwa ottuttuwani ni mweelaponi sootheene mwa weiwo owoomolenlaawewo.’ Ni awosa anookhala mweelaponimwaya.”

Maprofeeti oowootha

⁹ Mwaha wa maprofeeti: Murima wookiriipa; makhuvaaka anthukumela. Miyo kiri ntoko namuhapaliwa, ntoko mulopwana omucorweenle owura niwoko na Yave ni maswaawe ootteela.

¹⁰ Elapo yoosareya anamararuwa; niwoko na nlapho elapo eri yoowuumelela ni moocihamo mwa munikareni woonyaala. Maprofeeti antthara ephiro yoonanara evarelaka muteko ikurusaya moota woohiroromeleya.

¹¹ “Okhuma maprofeeti mpaka asaserdoti* ti anamahiiriha; mpakatho Mpaanimwaka kimphwanya sootakhalasaya,” onghima Yave.

¹² “Tivawo ephirowaaya eneeraaya ethatuwe yootherera ni animoomoleliwa mpiphini, ni iwo anoomorelawo. Miyo kinimwaaruuhela erisa vayaakhani ya ottaruxiwawaya,” onghima Yave.

¹³ “Variyari wa maprofeeti a oSamaria kohoona etthu ela ya mwiikho: Aathalihera otthuna wa Bahali* ehapuxaka mulokwaaka, aYixrayeli.

¹⁴ Ni variyari wa maprofeeti a oYerusaleemu kohoonatho etthu ya mwiikho ela: Awosa anraruwa, okhalawaya ti woowootha. Awosa anaalipihera yaawo ampaka soonanara weera ahikhaleru a yaawo anaarukunxe murima mwa sootakhalasawe. Wa Miyo, ootheene yaawo anlikana oSodoma; amaki a oYerusaleemu anlikana oGomora.”

¹⁵ Tivawo yeeyo Yave a ikuru sootheene onghimaawe mwaha wa maprofeeti ti ela: “Miyo kinoopakiha weera ece yooca yoowaawa ni ewure maahi ooheliwa yoohapala, niwoko okhuma maprofeeti a oYerusaleemu otakhala woomwareela mweelaponi yootheene ela.”

¹⁶ Yave a ikuru sootheene oneera ha: “Muhiiwe yeeyo maprofeeti anoothaliheraayani; awosa anoosarihani ni oweherera woowootha. Anuuluma nyoonelo apakelenlaaya, ohikhanle vayanoni ya Yave.

¹⁷ Awosa annaweerela yaawosa ankiramusa: ‘Yave oneera: Nyuwo munookhalano murettele.’ Ni wa ootheene antthara ettiyamaaru ya mirimasaya angweerela: ‘Khayoophwanyaniru yoonanara.’

¹⁸ Vaheera taani a yaawo aakhanle munthukumanoni wa Yave weera oone hoye hoye iiwe maswaawe? Taani iiwelenle ni eettenle maswaaka?

¹⁹ Moone ettheku ya Yave! Onyoonyiwawawe wootaphuwa! Eyuupuru enlukama mmuru wa atakhali.

²⁰ Isara sa Yave khasisusa mpaka Owo aneeraawe akwanihere soolakelasawe. Mmahukuni a muhoolo nyuwo munimwiiwexexa.

²¹ Nkaaruminghe maprofeeti awo, mene awosa aarowa etthimakaka okuxa mutthengaaya; kihuulumme ni yaawo, mene awosa aathalihera otthuna wa Muluku.

²² Vaheera awosa yaarwiiye omuthukumanoniwaka, yaamulaleera maswaaka mulokwaaka ni yaampakiha weera orukunxe murima mmweettelonimwaya ni soopakasaya soonanara.

²³ “Ti Miyo paahi Muluku a vakhiviru,” onkoha ti Yave, “nkihiyonotho Muluku a ottai?

²⁴ Mukina onoowera wiipitha Miyo woohimoona?” onkoha ti Yave. Nkihiyono Miyo kinsariha erimu ni vathi?” onkoha ti Yave.

²⁵ “Kohiiwa anuulumaaya maprofeeti, anthalihera soowootha mwa Nsinanaka, yeeraka: ‘Kooloha! Kooloha!’

²⁶ Mpaka yaakhani maprofeeti epwahereraka othalihera soowootha ni ohima sa mmurumwaya?

²⁷ Awosa anuupuwela weera sooloha anthaliheranaaya mukina ni mukhwaawe anoottiwaliha muloko Nsinanaka, hiiho ntoko makholowaaya yaattiwanlaaya Nsinanaka mwaha wa omulapa Bahali*.

²⁸ Mprofeeti olonghe, athalihe yooloha, ni yoowo orino maswaaka alaleiye moota woororomeleya. Vano malaxi ancelana hai ni etrigu?” onghima Yave.

²⁹ “Maswaaka ari ntoko mooro,” onghima Yave, “ni ntoko enyutto enimpwexa mwala.

³⁰ Vanonto,” oneera Yave, “nkiniiwananano maprofeeti anootherela maswaaka.

³¹ Aani,” oneera Yave, “nkiniiwananano maprofeeti anttapahera ni malumaaya sootthoma.

³² Vekhaikhai nkiniiwananano yaawo anthalihera sooloha soowootha,” oneera Yave. “Awo anghima ni anghapuxa mulokwaaka ni soowoothasaya soohimuteko. Miyo nkaaruminghe naari nkaalamulenle. Awosa khaanruuhelaru mureerelo muloko ola,” oneera Yave.

³³ “Muloko ola, hoye hoye mapofeeti naari musaserdoti* ookohakani: ‘Mutthenga heeni woolemela mwa yoowo Yave owinnyerenraaweni?’ Mwaaleele: ‘Nyuwo ti yoolemela! Ni Miyo kinimoovenyerani, oneera Yave.’

³⁴ Mprofeeti hoye hoye musaserdoti* naari mukina a muloko ahima: ‘Ola ti mutthenga mwa yoowo okinnyerenraawe Yave,’ Miyo kinoomuttaruxa mulopwana owo ni emusaawe.

³⁵ Ti yeeyo khula mutthu a nyuwo ongweerelaawe asinthamwenaawe hoye hoye amusi: “Yave aakhunleni? Yave uulummeni?

³⁶ Muhiromoletho eyuulumelo: ‘Ola ti mutthenga mwa yoowo Yave okinnyerenraawe,’ weera masu ala ehithatuwe yoolemela wa yoowo anuulume. Niwoko nyuwosa mumpiritula masu a Muluku mukumi, Yave a ikuru sootheene, Mulukwaahu.

³⁷ Ti ha muneeraanyu mmweereleke mprofeeti: ‘Yoowaakhula heeni mwaakhenlaanyu wa Yave? Hoye hoye uulumme eheeni Yave?’

³⁸ Mene nyuwosa mweera: ‘Ola ti mutthenga okinnyerenraawe Yave,’ vano Yave oneera ha: Nyuwosa muneera: ‘Ola ti mutthenga mwa yoowo Yave okinnyerenraawe,’ Miyo kaawooperenreeneni weera muheere hiiho.

³⁹ Tivawo kineeraaka koottiwalaseni ni koovonyeraseni ottaiwaka, vamoha ni esidade koovanghaakani nyuwo ni makholowaanyu.

⁴⁰ Kinimooruuhelasani oyeviheya woohimala, wuulihiheya muru woopwaherera, oneera ohittiwaliwe.”