Yeremiya 22 - Emakhuwa Bible

Nthorihelo na mamwene oonanara murima

¹ Yave oneera ha: “Murowe wa empa ya mwene ya oYuda ni mwalaleiyewo mutthenga ola:

² ‘Ii! Mwene a oYuda munkilaathi vahiceni ya Davide, mwiiwe masu a Yave – nyuwo, asitokwenaanyu ni ootheene amvira milakosene seiya.

³ Yave oneera ha: Mpake yeeyo eri ya ekhaikhai ni yoororomeleya. Mmoopole mmatatani mwa namahasula yoole ohuhuliwe. Muhimupakeleru yoonanara hata nihasu namarwa, akhwaasuni naari asinaamukhweli ni muhimwiiveleru oohinthowa vanipuroni nna.

⁴ Nyuwosa mwiipasoopa wookwanihera soolamula seiya sootheene, vano mwene onkilaathi vahiceni ya Davide onoovolowa vamilakoni seiya, eettihaka ikavalu* ni ikaaro sa ikavalu* vamoha ni asitokweenaawe ni mulokwaawe.

⁵ Vaheera nyuwo mwaahiiwelela soolamula seiya’ onghima Yave, ‘Miyo kinlipela mwa Nsinanaka muneenaaka weera empa ela ya emwene enoothatuwa milepe.’”

⁶ Vano yeeyo Yave ohimmaawe mwaha wa empa ya emwene ya oYuda ti ela: “Murookikhalelaru ntoko oGileyade, ntoko ethoka ya oLebaboni, vekhaikhai kinimoopakelani ntoko nikare, ntoko mittetthe soohimakiwaru.

⁷ Kinimoorumihelani anamaphwata, khula mutthu a yaawo ni ikapwitthisawe ni awosa animuuha nyirisanyu sa esidari* sooreerela, evonyereke vayikho.

⁸ Atthu a miloko sincipale anoovira esidade ela, ekohanaka: ‘Yave opakenleni hiiha esidade etokweene ela?’

⁹ Ni yoowaakhula eniikhale: ‘Niwoko awosa aahiya wiiraana wa Yave Mulukwaaya ni aalapa miluku sikina, erumeelaka seiyo.’”

¹⁰ Muhimwiinlele mwene okhwiiye, hata muhimulalamikele; ohiyanawaya, mmwiinlelaxe yoole onroihiwa wootthukiwani niwoko khahokolowatho naari khoonatho elapo oyareliwaawe.

Mutthenga wa anamwane asilopwana a Yosiya

¹¹ Vano yeeyo Yave onghimaawe mwaha wa Xalumi, mwaana mulopwana a Yosiya, mwa yoowo aarandenle atithawe ntoko mwene a oYuda ni aavennye nipuro nna, ti ela: “Owo khanghokolowatho.

¹² Owo onookhwela vanipuroni oronghiwaawe wootthukiwani; owo khoonatho elapo ela.”

¹³ “Ii! Wa yoole onteka empaawe ya emwene moota woohiroromeleya; ikwartusaya sa osulu ahipwatthaka ekhaikhai, aanyesererihaka asikhwaawe ovara muteko woohaaliva ontthuneyaaya.

¹⁴ Owo oneera: ‘Miyo kinimwiitekela empa ya emwene etokotoko ni isaala sa osulu sitokotoko.’ Owo ompaka ixanela sitokotoko ni itthaabwa sa esidari* attikitthelakano yooxeera.

¹⁵ Apaale munuupuwela weera waattano itthaabwa sa esidari* onimookhalihani mwene? Atithinyu yaakhalano sooca ni soowura, ni awo yaapaka yeeyo eri ya ekhaikhai, tivawo sootheene saaweettelaaya nnene.

¹⁶ Awo yaahaakiha nthowa na oohaawa ni ootthoiwa, tivawo sootheene saaweettelaaya nnene. Eyo ti eneero ya okisuwela Miyo,” onghima Yave.

¹⁷ “Mene nyuwo munghaawela makhwankwa paahi, mutthunaka owiiva oohinthowa, mwaasaka ohasula ni ewinelo yoohiroromeleya.”

¹⁸ Tivawo, Yave oneeraawe ha mwaha wa Yehoyakimi, mwaana mulopwana a Yosiya, mwene a oYuda: “Awosa kheemulalamikela ekhuwelaka: ‘Ii! Munnaka!,’ hoye hoye ‘Ii! Murokoraka!’ hata khayiilalamikela ekhuwelaka: ‘Ii! Pwiiyaaka!’ hoye hoye: ‘Ii! Atokweene!’

¹⁹ Owo onoovithiwa ntoko buuru mwaaxaana. Onoopuruleliwa, avonyeriwaka okerekhere wa milako sa oYerusaleemu.”

²⁰ “Ii! oYerusaleemu, murowe oLebanoni ni mwakhuwelewo; nsunanyu nniiwanyeye oBaxani; mukhuwele wAbarimi, niwoko ilapo sootheene mwiiraanaanyuno soophwatiwa.

²¹ Kannawoopererani nyuwo mwiixoonaanyu okhala oolipeene, mene khamwaatthunne okiiwa. Owo waari mweettelowaanyu wa mahuku ootheene, niwoko okhuma emiravowaanyu; khamwaakiiwelela.

²² Epheyo enimwaavavihera ottaiwene akukhulaanyu ottheene, ni ootheene mwiiraannaanyuno a ilapo sikina anooroihiwa wootthukiwani. Vano munooyevihiwa ni munimuulihiheya muru niwoko na sootakhalasanyu sootheene.

²³ Nyuwo munkhala oLebanoni, oolipeene mpaani mwa esidari* – moota muneeraanyu mwiipulele woorweelakani ovoreya wa oyara ntoko wa muthiyana onghaleela oyara!”

Nthorihelo na Yehoyakini

²⁴ “Kinlipela mwa Nsinanaka,” onghima Yave, “naari nyuwo Yehoyakini, mwaana mulopwana a Yehoyakimi, mwene a oYuda, mwaari munela woottittano vantataniwaka noolopwana, kaamoorulani.

²⁵ Kinoowinnyererani mmatatani mwa yaale anaasa okumaanyu, yaawosa mungwoovaanyu – Nebukadenezari, mwene a oBabiloniya ni aBabiloniya.

²⁶ Kinoowoomolelani nyuwo ni amayinyu mwa yaawo yooyanreni mweelaponi ekina, muhiyareliwaanyuwo ni weiwo ooweeli nyuwo munookhwelawo.

²⁷ Nyuwo khamuhokoleelatho mweelaponi munghaawelaanyu ohokoleela.”

²⁸ Mulopwana ola, Yehoyakini, ti ooramusiwa, mwaapu woophweeya, ekaruma ehintthuniwaru. Heeni owo ni anamwanaawe eneeraaya yoomoleliwe mweelaponi ahisuwenlaaya?

²⁹ Ii! Elapo, elapo, elapo, mwiiwe masu a Yave!

³⁰ Yave oneera ha: “Mmwaalikelele mulopwana ola ntoko oohikhalano anamwane. Owo khasimweettela nnene mookuminimwawe wootheene; khaawoworu a ekhapiraawe sineera simweettele nnene, ni khaawo anaakilaathele vahiceni ya Davide, hata anaalamule oYuda.”