Yeremiya 2 - Emakhuwa Bible

Ohiroromeleya wa oYixrayeli

¹ Yave aahuuluma ni miyo akeerelaka:

² “Murowe mwalaleere maaru a oYerusaleemu: Miyo kinuupuwelela ororomeleyawanyu mwaaraanyu mmiravo: ‘Ntoko ootthomeriwa nyuwo mwannakisivela, mukittharaka munikareni, mulaponi yoohaaleya.

³ Mulokwaaka aYixrayeli, waari wootteeliheriwa Yave, soowiima soopacera sa ohephawawe; ootheene yaanyaanya muloko owo yooneliwa okhala ananthowa, ni erisa yaahaaphwanya,’ ” onghima Yave.

⁴ Ii! Muloko wa Yakobe, mwiiwe masu a Yave, mahimo ootheene a muloko wa aYixrayeli.

⁵ Yave oneera ha: “Yoohiyanyiha heeni makholowaanyu yaaphwannyaaya wa Miyo weera ekihiye, ekirakamelaka Miyo? Awosa yaatthara miluku soohimuteko, yiitatuxaka asineenaaya oohimuteko.

⁶ Awosa khayaakonghe: Ori woowi Yave, onikhumihale wExipitu ananeettiha munikareni, mulaponi moowuumelela ni moothipeyasa, elapo yoothowa maahi ni ya epiphi, mwa yeeyo ehimviriwaru ni ehinkhaliwaru?

⁷ Miyo kohooruuhasani mulaponi mooruwereya, weera muce soowiimasaya ni sooreerelasaya. Vaheera nyuwosa moovaliha elapwaaka; mootatuxa yoohiyeraaka okhala yoohiira.

⁸ Asaserdoti* khayaamukoherera Yave; anamataphulela a nlamulo khayaakisuwela, ni ahooleli a muloko yaakivaanya. Maprofeti yaathalihera otthuna wa Muluku mwa nsina na Bahali*, ettharaka miluku soohimuteko.

⁹ Tivawo Miyo kinooniheraaka yeeyo ehinkisiveliha wa nyuwo,” onghima Yave, “nitho wa ikhapirasanyu.

¹⁰ Mulapuwe ephareiya mpaka okhopela oKitimi ni moone; mwaarumihele oKedari anamawehaweha ni mwaawehexexe mukhuveenleene; moone yaatonkweene okhumelela etthu ntoko ela:

¹¹ Wookhala muloko oceendyiye milukusaya? Ni iyo hata vakhaani khasihiyono miluku! Vaheera mulokwaaka wohaakakhanyiha ovuwawa wa Mulukwaaya ni miluku soohimuteko.

¹² Ii! Irimu, mututhuwe ohoolowaya! Moopopiheye ni muthukumele,” onghima Yave.

¹³ Mulokwaaka woopaka itthu sootakhala piili: owo wookihiya Miyo kiri naattuuttu a maahi a okumi, ni woothipa ihimesaya, aani ihime soowaaleleya sihingwera okhalano maahi.

¹⁴ Weeraka mulokwaaka aYixrayeli ti epottha okhuma oyariwawaya? Othatuwenleni yoohuhuliwa?

¹⁵ Amwatto anootturumela ekongelaka ohoolowaya; elapwaaya yaahiiwa ttewu; isidadesaya sooheleya nthala, soothaamiwa woomalela.

¹⁶ Mpaka atthu a oMemfesi ni oTafanyesi aamettha mmurumwanyu.

¹⁷ Nyuwo muneenaanyu ti nanthowa mwa yeeyo yookhumelenleni, woomuhiya Yave, Mulukwaanyu, Owo oweettihaleni mphironimwawe.

¹⁸ Vano, murowenleni wExipitu ongwura Nilu? Ni munrowelani wa Asiriya ongwura Efratesi?

¹⁹ Yootakhalaanyu enimoottaruxani ni ovaanyawanyu onimoohiihani. Mwiiwexexe ni moone moota onnanaraaya ni ongwaawihaaya omuhiya Yave, Mulukwaanyu, muhikoovaka Miyo,” onghima Yave, a ikuru sootheene.

²⁰ Khalayi Miyo kaaphwata yoolemelaanyu, kinapasa onyooro wootthukani. Vaheera nyuwosa mweenre: Miyo nkoorumeelani! Ohiyanawaya, mwaako wootheene woorakamela ni vathi wa nyiri sootheene soopomba, nyuwo mwiixaatalela ntoko puuta.

²¹ Miyo koophatteiyeni ntoko ewuuva yooreerela, yoothanleya. Mene moone yookhumelenleni! Mohiitatuxa ewuuva yoovaliheya ya ntuphini.

²² Naari nyuwo mwiirapihaka ni muthiikila ni sabawu mwincipale, malepa a yootakhalaanyu anoopwaherera ohoolowaka,” onghima Yave onlamula soothesene.

²³ Mungwera hai weera khamwiivalinghe ni weera khamwaalampe aBahali*? Muupuwelele mweettelowaanyu mureyareyani ni moonelemo yeeyo mpankaanyu. Nyuwo muri ntoko ekamelu* eniileva, etthimakelaka mapuro ootheene;

²⁴ ntoko buuru a mutuphini okhovelenle munikareni onimulamula moohaawelanimwawe. Taani anaawere omuhiiha areene ookwaneleene okumana ni ilopwana? ’Abuuru anapunci ammwaasa khoontthuneya wiikhulumula, niwoko anoomphwanya areene ookwaneleene omukumanano.”

²⁵ Muhitthimake mpaka inaawosanyu ottukuttuwa, hata ohiwuumeni wammilo! Mene nyuwo muneera: ‘Khoongwereya! Kookhovelela miluku sikina, ni kintthuna otthara seiyo.’

²⁶ Hiiho ntoko namwiiya onuulihiheyaawe muru aaphwanyeriwaka iiyaka, muloko wa aYixrayelitho onimuulihiheya muru: mamwenaaya ni asitokweenaaya, asaserdotaaya ni maprofeetaaya.

²⁷ Vano, aneerela mwiri: ‘Nyuwo tiithaaka,’ ni wa nluku:‘Ti nyuwo mukiyanre.’ Aakirera ettuli ni khaakiwenghe, vaheera mmakacamihoni aneera: ‘Murwe munivuluxe!’

²⁸ Siri woowi miluku mwiipakenlaanyu? Iyo sirwe sawera soovuluxeni mmakacamihoni! Vano milukusanyu khasireere ntokotho isidadesanyu, oYuda!

²⁹ Munkootherelani? Ootheene nyuwo mookivaanya,” onghima Yave.

³⁰ “Khoovareleiye muteko ottaruxa mulokwaanyu, awosa khayaakhulenle olakiwa. Ekatanaaya yohaaphwata maprofeetaanyu ntoko mwatto oonyaanyaxa.

³¹ Nyuwosa a ekhapira ela, muupuwele masu a Yave: Kaatoko okhala nikare wa aYixrayeli? Apaale kaari elapo yoosareya epiphi? Heeni mulokwaaka onkeerelaaya: ‘Hiyo nnimwiiwehaweha! Kaninrwatho wa Nyuwo’?

³² Weeraka mwaamwali onimwaattiwala axiveevaawe hoye hoye, ootthomeriwa soowarelasawe? Wa soothesene, mulokwaaka wookittiwala mahuku ootheene.

³³ Moota wa mapakelo mancipale munaasaaseraanyu osivela! Mpaka asithiyana a mapakelo oonanaraxa anooxuttera ni mweettelowaanyu.

³⁴ Soowarasanyu soophwanyaniwa ephome ya atthu oohaawa oohinthowa, ahiphwanyeriwe enanarihaka impa. Wa soothesene, orookhalaru hiiho,

³⁵ nyuwo muneera: ‘Nkinthowa; Owo khakinyoonyeringwe.’ Mene Miyo kinimoolakelelani yoothorihaaka, niwoko nyuwo muneera weera khamutthenke.

³⁶ Munghapuwelaxani muceendyaka imaara sincipale ephirowaanyu? Nyuwo munoopwaneya wExipitu, ntoko mwaapwaneyaanyu wAsiriya.

³⁷ Myuwo munoohiyatho nipuro nno mwiivarenleene vamuru, niwoko Yave ohaakhootta yaale munaaroromelaanyu; nyuwo khamukhaviheriwatho ni yaawosa.”