Yeremiya 17 - Emakhuwa Bible

Yoottheka ya oYuda ni ottaruxiwawaya

¹ “Yoottheka ya oYuda yoolempwa ni ikaruma sa eyuuma; yoolempwa ni elaapixi yoolipaxa vatthaabwani sa mirimasaya ni mmanyakani mwa altaaraaya*.

² Mpakatho anamwanaaya angwuupuwelela altaaraaya* ni nyirisaya soothipeleliwa sa Axera mukerekhere nyiri soopombaxa, mmattumuxani oorakamela,

³ ni mmanyaakoni sa ntuphini. Kinimwaavaha akina mihakhusanyu ni sooreerelasanyu sootheene vamoha ni mapurowaanyu ootteela vasulu wa mattumuxa ntoko soohuhuliwa. Eyo enookhala nlivo na sootthekasanyu mwaaltaarini* a miluku sikina mweelaponimwanyu yootheene.

⁴ Nyuwo munooyeleela okhalano yoohiyeriwaanyu koovanghaakani niwoko na nthowananyu xaxaxa. Kinimoopakani ipottha sa amwiittanaanyu mweelaponi muhisuwenlaanyu, niwoko soopatta isarasaka ni seiyo sinoohisa wa mahuku ootheene.”

⁵ Yave oneera ha: “Oolaphiwa ti yoole onimuroromela mutthu, uupuwelaka weera omutthu ti ikurusawe, mene murimaawe omurakamenleene Yave.

⁶ Owo onookhala ntoko niphuwa na munikareni; khoonaru waarwaaka mpuha. Owo onookhala mmapuroni oowuumelela a munikareni, mweelaponi mwa maakha mwa weiwo ohimmakiwaru.

⁷ Vaheera ooreelihiwa yoole onimuroromela Yave, aani onimuroromela Yoowo.

⁸ Owo onookhala ntoko mwiri ophwatteiwale mukerekhere mooloko ni mikwankhwaarisaya sinkhuruwela mmaahini. Mwiri owo khoonoova waarwaaka ovihaxa; makukhwaaya ankhala oorimbeleleene. Khoonghaawela maahi yaahitthula hata khoonghiya wiima.”

⁹ Murima ti woolokotthaxa opwaha itthu sootheene ni erettaaya ti yoohilameya. Khaawo anaawere wiiwexexa.

¹⁰ “Miyo, ti Yave kinoota murima ni kinoona nnenesene soowuupuwelasaya weera khula mutthu kimutthuvele, kittharihaka mweettelowaawe, aani mwa soopakasawe.”

¹¹ Yoole onkhalano mihakhu moota woohiroromeleya onlikana ni ekhwali empuramela mooce ehirenlaaya. Waaviraka eriyari ya okumaawe mutthu owo, mihakhusawe sinoomuhiya ni ommaleloni onimwiixoonihera weera ti mulolo.

¹² Ehice ya emwene yoovuwaxa, evuwihiwe okhuma ompacereroni ti Nipuronahu Nootteela*.

¹³ Ii! Yave, Oweherera wa oYixrayeli – ootheene anoohiyani Nyuwo anoohaawa wuulihiheya muru. Yaale anoohuluwani, vano masinaaya anoolempwa muntthupini, niwoko na omuhiya Yave, Naattuuttu a maahi a okumi.

Yeremiya oniinlela ikuhu

¹⁴ Ii! Yave, mukilamihe ni miyo kinoolama! Mukivuluxe ni kinoovuluwa, niwoko Nyuwo ti Yoole kinimuttottopelaaka.

¹⁵ Aakhala akina ankeerela mahuku ootheene: “Masu a Yave ari woowi? Awo ekhwanihereye!”

¹⁶ Miyo nkinkhootta okhala mukukhulaanyu. Munsuwela weera miyo nkaahaawenle nihuku na ohiweherera. Yeeyo kinuulumaaka yoosuwanyeya wa Nyuwo.

¹⁷ Muhikhale moopopiherowaaka; Nyuwo ti Wootthawelawaka vanihukuni na erisa.

¹⁸ Yaale ankisoonda eyeviheyeke, mene kihikhale miyo; awosa yoopopiheye, mene kihikhale miyo. Mwaaruuhele nihuku na erisa, mwaaphwate woomalelaxa.

Mutteelihe eSaabadu

¹⁹ Vano Yave aakeerela ha: “Murowe ni mweemele vamulako wa Muloko, mwa weiwo mamwene a oYuda amvoleelaaya ni ankhumelaaya; mweemeletho mmilakoni sootheene sikina sa oYerusaleemu.

²⁰ Mwaaleele: ‘Ii! Mamwene a oYuda ni atthu ootheene a oYuda nitho amaki ootheene a oYerusaleemu amvira mmilakoni iya, mwiiwe masu a Yave.

²¹ Yave oneera ha: Mwiipasoope weera muhiteexeru yoolemela vanihukuni na eSaabadu naari muhivoleihe yeeyo mmilakoni sa oYerusaleemu.

²² Muhikuxeru yoolemela mukhumiheraka vaate, naari muhivareru muteko muSaabaduni, mene mutteelihe eSaabadu, ntoko kaalamulenlaaka makholowaanyu.

²³ Wa soothesene awosa khayaakiiwale hata khayaakipwantthe. Yaattiyamaaru ni khayaatthunne wiiwa ehaakhulelaka olakiwa.

²⁴ Vano nyuwo mwiipasoopa weera mukiiwelele,’ onghima Yave, ‘ni mwaahiviriharu yoolemela mmilakoni sa esidade ela vanihukuni na eSaabadu, mene mwatteeliha eSaabadu muhivarakaru wakhalaru muteko,

²⁵ vano mamwene ankilaathi vahiceni ya Davide anoovolowa mmilakoni sa esidade ela vamoha ni anamalakaaya. Awosa ni anamalakaaya animoowa mukaaroni yeettihiwaka ni ikavalu*, ehooliweene ni asilopwana a oYuda ni yaale amanke oYerusaleemu, ni esidade ela enoomakiwa wa mahuku ootheene.

²⁶ Atthu animoowa erweelaka mmittettheni sa oYuda ni sirukureenre oYerusaleemu, mweelaponi ya oBenyamini, ilapo sa vathi wa nyaako, elapo ya oNegeba, eruuhaka Mpaani mwa Yave sooveleela soohisa ni sooveleela sa etrigu, erubani* ni sootthapela.

²⁷ Vaheera mwaahikiiwa muhitteelihaka eSaabadu, mvirihaka yoolemela mmilakoni sa oYerusaleemu vanihukuni na eSaabadu, vano kinoopattiha mooro woohimala mmilakonimwaya oneera ohise moolipamwaya oYerusaleemu.’ ”