Yeremiya 15 - Emakhuwa Bible

Khoongwereya osemba nttaruxo

¹ Vano Yave aakeerela: “Naari Moisesi ni Samuweli yaakhanle ohoolowaka evekelelaka muloko ola, hata hiiho nkaamorela ikharari muloko. Moomole ohoolowaka. Muloko owo opwaheke!

² Vano, awosa yookohani: ‘Niroweke woowi?’ Vano mwaaleele: ‘Yave oneera ha: Yaawosa alakeleliwe wiiviwa, animwiiviwa; yaawosa alakeleliwe ekatana, anookakatthiwa; yaawosa alakeleliwe etala, anoohaawa etala ni yaawosa alakeleliwe wootthukiwani, anooronghiwa wootthukiwani.’

³ Kinimwaarumihela nyoota mixexe sa anamaphwata,” onghima Yave, “ekatana weera ewiive, alapwa weera yaapurule ni ipalame sa wiirimu ni axinama a ntuphini weera yaalume ni yaaphwate.

⁴ Miyo kinimwaapaka yaawo etthu yoowoopiha wa omwene wootheene wa mweelaponi, niwoko na yeeyo Manaxe, mwaana mulopwana a Hizekiya, mwene a oYuda, opankaawe oYerusaleemu.

⁵ Taani anoomoreleni ikharari oYerusaleemu? Taani anoolalamikeleni? Taani aneemele akohaka muri salaama?

⁶ Nyuwo mookihiya,” onghima Yave, “nyuwo mumpwaherera okhala oohapuweene. Tivawo kineeraaka kootaveeni koophwatakani; nkingweratho woomorelani ikharari.

⁷ Miyo kinimwaaveerela musidade sa elapweene yeela ntoko makamba. Kinooruuhela mulokwaaka olalamika ni ophwatiwa, niwoko awosa khaanceendya iphirosaya.

⁸ Kinoopakiha weera asinaamukhwelaaya yaattaxe opwaha ihaava sa mphareiya. Othana eriyari kinimwaaruuhela asimaayi a amiravowaaya asilopwana namaphwata; wootutuxereya kinimwaaruuhela woova ni otteenguwa.

⁹ Maayi a anamwane athanneeli onookomoka, akhweeke. Wa yoowo onoomwiilela nsuwa nreene vamuru. Owo onimuulihiheya muru ni onooyeviheya. Yaawo eniihalahale kinoowinnyerera ophwatiwa ni ekatana ohoolo wa amwiittanaaya,” onghima Yave.

Ottaandawula ni olipihiwa wa Yeremiya

¹⁰ Ii! Wa nyuwo, maayi, mukiyanre, niwoko koothanyiwa ni kooramusiwa ni atthu ootheene a elapo yootheene. Miyo nkinoolihihe naari nkinoolihe, hata hiiho ootheene anookilapha.

¹¹ Yave aaheera: “Vekhaikhai, Miyo kinimoolipiherani mpuha, Yeremiya ni kinimookhaviherani. Vekhaikhai mweehuhuni ya erisa ni ya makacamiho kinoopakiha weera amwiittanaanyu yoodyoontteleleni.

¹² Ookhala ongwera wiintaka eyuuma – eyuuma enrweela mpatta wa ottuttuwani – hoye hoye ebronze*?

¹³ Muleele muloko ola: Kinoovaha mmahalani sooreelasanyu ni mihakhusanyu ntoko soohuhuliwa niwoko na sootthekasanyu sootheene mweelaponimwanyu yootheene.

¹⁴ Kinimootatuxani ipottha sa amwiittanaanyu mulaponi muhisuwenlaanyu, niwoko isarasaka sinimoopattelasani.”

¹⁵ Nyuwo Yave mookisuwela; mukuupuwelele ni mukikosoope. Mukiinlelele ikukuttula anamattharattharaaka. Nyuwo muri a murima woopixa – muhikivenxe. Muhittiwale weera kinghaawa oramusiwa niwoko na Nsinananyu.

¹⁶ Maswaanyu yaarwiiyaaya, miyo kaahooca yaawo; awo ti ohakalalawaka ni otteeliwawaka murima, niwoko miyo kohiitthaniwa mwa Nsinananyu, Yave, Muluku a ikuru sootheene.

¹⁷ Nkinakilaathi vamoha ni atakhali hata nkipankeru ifestasaya. Kikilaathiye meekhaaka niwoko ntatananyu naari osuluwaka ni mookisariha ohiphwanela.

¹⁸ Heeni ohimmalaaya ovoreiwawaka ni nikhwattanaka nintepelani nihivolaka? Mukitatuxerenleni ntoko nxaapwa noowelela ahinkhwalalaayawo anaattuuttu?

¹⁹ Tivawo Yave oneeraawe ha: “Mwarukunxa murimaanyu, Miyo kinimoorehererani moota wooweera mukirumeeletho. Nyuwo mwahima masu a ekhaikhai, ehikhalaka oohiphwanela, munookhala namutthengaaka. Muloko ola ohokoleeleke wa nyuwo, mene nyuwo muhirowe wa yoowo.

²⁰ Kinimoopakani exiri wa muloko ola, exiri ya ebronze*; awosa animoowananani, mene kheerwa yoowinaani, niwoko Miyo kiri ni Nyuwo weera kiwoopoleni ni koovuluxeni,” onghima Yave.

²¹ “Kinimoovuluxani mmatatani mwa atakhali ni kinoowoopolani mwa mmankharuni mwa anamapuhera.”