Yakobe 5 - Emakhuwa Bible

Woopereriwa wa anamapuha oohasula

¹ Vano, mwiiwe, nyuwo anamapuha. Mwiinle ni mulalamike niwoko na soohaawasanyu sinookhuruwelani.

² Mihakhusanyu sohuntta, ni atthumpwiha aakhuura ikuwosanyu.

³ Iyuumasanyu soorikaxa soociwa murawa, ni murawaaya onuuwoothereni ni onuukhuure erutthwaanyu ntoko mooro. Nyuwo mohaattano mihakhu mahuku ookisera ala.

⁴ Moone, nlivo na anamiteko ahemphe mmattamwanyu nyuwo muhaalimvaanyu ninniitthanaxa. Olalamika wa anamahepha wohiiwiwa ni Apwiya a ikuru sootheene.

⁵ Nyuwo mookhala moopuhani ni soohaawelasanyu mweelaponi ya vathi, ni moovona yooca vanihukuni na wiiviwa.

⁶ Nyuwo mohaathoriha ni mowiiva atthu oohikhalano nthowa, hata yaawo ehikhalaka amwiittanaanyu.

Opixa murima moohaawani

⁷ Tivawo, axunna, ngweherere ni ovilela mpaka orwa wa Apwiya. Moone moota namalima ongwehereraawe weera emattaawe eruwere soohepha sootthuneyaxa, ni moota ongwehereraawe ni ovilela mpaka otthula ni omala wa epula.

⁸ Mukhaletho oopixa murima, ni mulipihere mirimasanyu, niwoko orwa wa Apwiya wookhuveela.

⁹ Axunna, muhaapaneke mukina ni mukhwaawe weera muhithorihiwe. Mphuki ori vamulako!

¹⁰ Axunna, ngwuupuwelele maprofeeti yuulumale mwa Apwiya ntoko ethoonyero ya opixa murima moohaawani.

¹¹ Ntoko nyuwo musuwenlaanyu, hiyo ningwiitthana ooreelihiwa yaale yaavilenle. Nyuwo mohiiwa sa opixa murima wa Yobe, ni mohoona ommaleloni Apwiya yaamurehererenlaaya. Apwiya oosareya murima wooreera ni omorela ikharari.

¹² Vano, axunna, muhilipele, hata ni wiirimu, hata ni vathi, naari ni yakhalaru etthu ekina. Mweera: “aani,” ekhaleke “aani” ni mweera: “hoye,” ekhaleke “hoye,” weera muhithorihiwe.

Nivekelo na nroromelo

¹³ Ookhala mukina variyariwanyu onghaawa? Avekele. Ookhala mukina onghakalala? Iipe icipo sa ottottopela.

¹⁴ Ookhala mukina a nyuwo oovoreiwa? Owo awiitthane asitokweene a ekerexa weera awo emvekelele ni emuttikitthele makhura mwa Nsina na Apwiya.

¹⁵ Vano, nivekelo nipakiwe munroromeloni nnimulamihe muretta owo. Apwiya eniimvenxe, ni aatthenke, anaaleveleliwe.

¹⁶ Tivawo mulapelane sootthekasanyu mukina ni mukhwaawe, ni muvekelelane mukina ni mukhwaawe weera mukhale oolamihiwa. Nivekelo na mutthu oororomeleya ti na ikuruxa ni noowereya.

¹⁷ Eliya aari mutthu ntoko hiyo. Owo aavekela ni nthiti weera ehirupe epula, ni khayaarupale wa iyaakha tthaaru ni eriyari ya eyaakha.

¹⁸ Aavekelatho, ni erimu yaarumiha epula ni etthaya yaaruwera soowiimasaya.

¹⁹ Axunnaka, akhala mukina onghapuwa ephiro ya ekhaikhai ni mukinatho amuhokoloxera,

²⁰ muupuwelele yeeyo: Yoowo onimurukunxiha murima namattheka weera ahiye ephirowaawe ya yoottheka, anaavuluxe okumi wa mutthu owo, ni anaawere elevelelo ya soottheka sincipale.