Titu 1 - Emakhuwa Bible

Isalaama sookisera

¹ Ya Pawulo, murumeiyi a Muluku ni murummwa a Yeesu Kristu, weera aweettihe oothanliwa wa Muluku munroromeloni ni mwesuweloni mwa ekhaikhai, engweettihera murima wa omuluku.

² Nroromelo ni esuwelo ela yoolipiheriwa munroromeloni ya okumi woohimala, mwa yoowo Muluku oohootha aaroromelihalaawe ehinaaye ehuhu.

³ Vano, ehuhu yootthuneya Owo aasuweliha maswaawe mwaha wa olaleiya kaalamuleliwaaka ni Muluku Mvuluxaahu.

⁴ Wa Titu, mwanaka a ekhaikhai munroromelonimwahu: Mahala ni murettele wa Muluku Atiithi ni wa Kristu Yeesu Mvuluxaahu.

Miteko sa Titu oKreta

⁵ Miyo koohiyaleni oKreta weera mureherere seiyo sihanle ni mwaakhalihe asitokweene mukerexani ya esidade ti esidade ntoko koolamulenlaakani.

⁶ Ontthuneya weera mutokweene a ekerexa akhale oohikhalano nthowa, mulopwana a mwaara mmoha, ni akhaleno anamwane oororomela, oohootheriwa ni olavilavi, naari oohiiwelela.

⁷ Ontthuneya weera mutokweene onkosoopa* a Muluku akhale oohikhalano nthowa: oohiixoona, oohaakuva onyoonyiwa, oohihapaliwa, oohikhalano oruttu, hata oohiinlela mihakhu soohiloka.

⁸ Akhale oowaakhela aletto, ootthuna yooreera, a miruku, a ekhaihai, ootteelihiwa, oowiisuumaaliha,

⁹ avaraka nnenesene mutthenga woororomeleya, ntoko moota owo oxuttihiwaawe weera awere waalipiha akina mirima ni mahusiho ooreera, ni awere waavaanya yaawo amvirikanya.

¹⁰ Vekhaikhai, variyari wa atthu oowiineliwa aakhala ancipale oosesera, anaasa wuuluma paahi ni anamalokottha.

¹¹ Vano, ontthuneya weera awo emaalihiwe, niwoko annanariha imusi sikina, exuttihaka itthu soohitthuneya niwoko na wiinlela mihakhu.

¹² Mmoha a mprofeetaaya asineenaaya aaheera: “Mahuku ootheene aKreta ti anamootha, inama soonanara, anamaca ooreesi.”

¹³ Onamoona ola ti wa ekhaikhai. Tivawo, mwaahiihe yaawo nnenesene weera ekhale ni nroromelo nooreera,

¹⁴ ni weera ehiwiiweke andiisi a aYuda ni malamulo a atthu ankhootta ekhaikhai.

¹⁵ Wa ootteela, sootheene siri sootteela, mene wa oohitteela ni oohiroromela kheewo eri yootteela. Mwa yeeyo, soowuupuwela nitho mirimasaya siri soonanarihiwa.

¹⁶ Awo aneera weera aamusuwela Muluku, mene ni mitekosaya anoomukhootta. Ari oothanyeya, oohiiwelela, ni oohiwera opaka hata etthu emoha yooreera.