Ruuti 1 - Emakhuwa Bible

Elimeleki ni emusawe onrowa oMowabe

¹ Mweehuhuni ya ahooleli yaakhala etala mweelaponi ni mulopwana mmoha a oBeteleheemu, oYuda, vamoha ni mwaarawe ni anamwanaawe asilopwana eeli yaarowa okhala ehuhu ekina mweelaponi ya oMowabe.

² Nsina na mulopwana naari Elimeleki, nsina na mwaarawe Nawomi ni masina a anamwanaawe asilopwana eeli yaari Maheloni ni Kileyoni. Awosa yaari awEferati a oBeteleheemu, oYuda. Yaarowa oMowabe, enakilaathiwo.

³ Vano, Elimeleki, aiyawe Nawomi, aahookhwa ni owo aahanle meekhaawe vamoha ni anamwanaawe asilopwana eeli.

⁴ Anamwane ale yaahaathelasa aMowabe, mmoha iitthaniwa Orpa ni mukina Ruuti. Emalihaka okhalawo wookwanaka iyaakha muloko,

⁵ Maheloni ni Kileyoni yaahookhwatho. Nawomi aahala meekhaawe woohikhalano iyawe hata anamwanaawe asilopwana eeli.

Nawomi ni Ruuti onghokolela oBeteleheemu

⁶ Areene oMowabe Nawomi aahiiwa weera Yave aakhavihera mulokwaawe avahaka sooca, tivawo iireherenraawe ovenya oMowabe vamoha ni asipwiyamwaanaawe eeli.

⁷ Aavenya nipuro aakhalaawe vamoha ni Orpa ni Ruuti, anarowa mmuseweni onkela mweelaponi ya oYuda.

⁸ Vanonto Nawomi aaweerela asipwiyamwaanaawe eeli: “Murowase! Muhokoleele waanamannyu. Yave ooreereliweni ntoko nyuwosa mwareereliwaanyu mureene ni asilipa oorimeela ni wa miyotho.

⁹ Yave oovahaseni mahala weera mwaphwanyase wiitthuuwa vantthokoni ni asiiyinyu akina.” Aahaavaha ebeecu yoowaaraxela, vaheera awosa yaakhuwela yiinlaka,

¹⁰ enamweerelasa: “Hoye! Hiyo nimmoottharani omulokoniwanyu.”

¹¹ Wa soothesene, Nawomi aaweerela: “Muhokoleelase owaani, anamwanaaka. Munkittharelani? Miyo nkingwera wooyarelani anamwane asilopwana akina weera yoothelaseni.

¹² Muhokolowase anamwanaaka. Murowase! Miyo koopwaha misingu sa otheliwa ni mulopwana mukina. Naari miyo kuupuwela weera kinootheliwa ohiyuweene yoola, kinaayara anamwane asilopwana eeli,

¹³ mwaamwaawehererasa mpaka wunnuwa? Khamwaatheliwa mwaawehereraka yaawosa? Hoye, anamwanaaka. Oothananaxa ti miyo woopwahani nyuwosa, niwoko ninkihooxa ntata na Yave.”

¹⁴ Yiiwaka masu ale yaahiinlatho ekhuwelasaka. Vano Orpa aahaabeeca apwiyamwaanaawe anaaraxela, mene Ruuti aahaavarexexa.

¹⁵ Nawomi aamweerela: “Omoone, munnaakaawo onghokoleela omulokononiwawe ni wa milukusawe. Ohokoloweno.”

¹⁶ Wa soothesene, Ruuti aamwaakhula: “Muhikinyesererihe woohiyani ni weera kihootthareni. Munrowaanyuwo, kinoorowatho; muneeraanyu mwakhalewo, nkakhalewotho. Mulokwaanyu ti mulokwaaka ni Mulukwaanyu ti Mulukwaaka.

¹⁷ Muneeraanyu mwakhwelewo, nkakhwelewotho ni nkavithiwewo. Yave akittaruxe miyo koohiyani ohikhanle niwoko na okhwa.”

¹⁸ Nawomi oonakaru weera vekhaikhai Ruuti oolipihera omutthara, khaamunyesereringhetho.

¹⁹ Hiiho asithiyana ooweeli ale yaarowa, enaphiya oBeteleheemu. Ephiyakawo, esidade yootheene yaari enyuungunyuungu emoha mwaha wa yaawosa ni asithiyana a esidade yaakohana: “Weeraka Nawomi?”

²⁰ Owo aawaakhula: “Muhikiitthanele Nawomi; fataari okiitthanela Mara, niwoko Muluku a ikuru sootheene ookiwaawihera okumaaka.

²¹ Kaarongwe ni itthu, mene Yave okihokolonxe matataru. Muhikiitthanele Nawomi, niwoko Yave ookihooxa; Muluku a ikuru sootheene ookiruuhela olatta.”

²² Ti hiiho Nawomi eenraawe woohokolowa elapo ya oMowabe vamoha ni pwiyamwaanaawe mMowabe Ruuti. Awosa yaaphiyanse oBeteleheemu epaceriwaka ohephiwa esevada*.