Okhuma 9 - Emakhuwa Bible

Nihooxo nanaathanu: Okhwa wa mihuwo

¹ Vano Yave aamweerela Moisesi: “Murowe wa Farawu* ni mwamuleele: ‘Yave, Muluku a aHeberi eenre ha: ‘Muhiye mulokwaaka orowaka weera wakilape.

² Nyuwo mwapwaherera ohiiha orowa ni wooceeliha,

³ vano musuwele weera moono wa Yave onooruuhela nihooxo noowoopiha mihuwo sa Farawu* siri mmamattani: Ikavalu*, abuuru, ikamelu*, imombe ni ikhondoolo ni ipuri.

⁴ Yavetho onoohiyanyiha mihuwo sa aYixrayeli ni sa awExipitu. Hata mwaamunama mmoha a aYixrayeli kharwa akhwa.’”

⁵ Yave aavaha ehuhu: “Omaalo Yave onoopakela elapweene yeela yeeyo ororomelinghaawe.”

⁶ Vano waaxawaya Yave aapaka yeeyo: Mihuwo sootheene sa awExipitu saahookhwa, vaheera wa aYixrayeli hata muhuwo mmoha khawaakhwiiye.

⁷ Farawu* aarumiha owehawehiwa ni aahoonelela weera mihuwo sootheene sa aYixrayeli saari ni okumi. Hata hiiho, murimaawe waapwaherera wuuma ni khaatthunihera orowa muloko.

Nihooxo nanaathannamosa: Ithuku sootathareya

⁸ Vano Yave aamweerela Moisesi ni Aharoni: “Munyoottole ettuura vaniikhoni ni Moisesi amwaramwaxele musulu ohoolo wa Farawu*.

⁹ Eyo enoothatuwa ntoko ntthupi nootteettheya mweelaponi yootheene ya wExipitu ni ithuku sootathareya sinookhumelela mwaatthuni ni mwaaxinamani a wExipitu.”

¹⁰ Vano yaanyottolasa ettuura ya muniikhoni, enarowano wa Farawu*. Moisesi aamwaramwaxela osulu ni ithuku sootathareya saapacera waakhumelela atthu ni axinama.

¹¹ Khaawo a anamacitta aawera ophwanyaneya aaraawewo Moisesi, niwoko yaasareya makhwatta ntoko awExipitu ancipale akina.

¹² Mene Yave aahuumiha murima wa Farawu* ni owo aakhootta omwaakhulela Moisesi ni Aharoni, ntoko Yave aamuleenlaawe Moisesi.

Nihooxo nanaathannameeli: Maralala

¹³ Vano Yave aamweerela Moisesi: “Mpeherere ovenya, murowe wa Farawu* ni mwamuleele: ‘Yave, Muluku a aHeberi eenre ha: ‘Muhiye mulokwaaka orowaka weera wakilape!

¹⁴ Mwaaheera hiiho, emaara ela, kinimoorumihelani mahooxowaaka ootheene ni anamalakaanyu ni mulokwaanyu weera nyuwo musuwele weera khawowo mukina ntoko Miyo mweelaponi ya vathi yootheene.

¹⁵ Miyo kaangwera wookola moono koovulalihakani nyuwo ni mulokwaanyu ni mahooxo yeera ewiiveeni mulaponi.

¹⁶ Mene Miyo koowuurelani mpaka vaanaanova keerelaka owooniherani ikurusaka ni weera Nsinanaka nilaleiwe mweelaponi yootheene.

¹⁷ Wa soothesene, nyuwo nlelo munnyeserera wooceeliha mulokwaaka muhitthuniheraka orowa.

¹⁸ Omaalo, ehuhuweene yeela, kinoorumiha epula ya maralala matokotoko ahitonko omorela mwExipitu, okhuma epaceriwaaya mpaka olelo.

¹⁹ Vano, mulamulele okukhuleliwa mihuwosanyu ni sootheene murinaanyu mmatta weera siroihiwe mmwiikitthoni. Yaamoraka maralala, eniyaamorele atthu ni axinama ootheene eneera ehikhale mpuwa ni eniikhwe.”

²⁰ Anamalaka a Farawu* yoova nsu na Yave, yaahaakuveya okukhulela mpuwa ipotthasaya ni mihuwosaya.

²¹ Vaheera yaale yahaapwatthenle nsu na Yave, yaahiya ipotthasaya ni mihuwosaya mmatta.

²² Vano Yave aamweerela Moisesi: “Mweemexere moonowaanyu osulu weera emorele maralala mweelaponi yootheene ya wExipitu – mwaatthuni, mwaaxinamani ni mmapoondani ootheene a wExipitu.

²³ Moisesi eemexerakaru ekopwaawe osulu, Yave aahoopiha itari ni maralala, ni waakhala overinya. Hiiho Yave aamoroxela maralala mwExipitu.

²⁴ Yaamora maralala ni yannaaleleya erimu ni overinya mipatta sootheene. Kheenakhale ettheku ya maralala ntoko yeele wExipitu wootheene okhuma ethatuwakaru elapo.

²⁵ wExipitu wootheene maralala yaamorela sootheene sahaakhanle mpuwa, okhuma atthu mpaka axinama. Yaaphwata mapoonda ootheene ohiya ophwatiwa wa nyiri sootheene.

²⁶ Elapo ya oGoxeni paahi, yaaraayawo aYixrayeli, yahaamorenlaayawo maralala.

²⁷ Vano Farawu* aarumiha wiitthaniwa Moisesi ni Aharoni aweerelaka: “Emaara ela koottheka. Yave ti oororomeleya ni miyo ni mulokwaaka nookhalano nthowa.

²⁸ Mumvekele Yave, niwoko itari ni maralala a Muluku aatepa. Kinimoohiyani murowaka – khoontthuneyatho okhala mu.”

²⁹ Moisesi aamweerela: “Vaava kimvenyaaka, musidade, kinimweemexa matata kimvekaka Yave. Itari nsimaale ni kheemoratho maralala. Hiiho mmusuwele weera elapo ya vathi ti ya Yave.

³⁰ Koosuwelatho nnenesene weera nyuwo ni anamalakaanyu khamummoova Yave.”

³¹ Vano eliinyu* ni esevada* yaaphwatiwa, niwoko esevada* yaathapuruwa ni eliinyu* yaamuttuva.

³² Wa soothesene, etrigu ni esenteyo* khayaaphwatiwe, niwoko ti soopisa wiitthwa.

³³ Hiiho Moisesi aavenya wa Farawu*, anakhuma musidade. Aamweemexera matata Yave. Itari ni maralala yaamala ni epula yaamaaxa.

³⁴ Farawu*, oonaka weera epula, maralala ni itari yaamala, aatthekatho. Owo vamoha ni anamalakaawe yaahuumiha mirimasaya.

³⁵ Murimaawe Farawu* waapwaherera wuumihiwa ni owo khaatthunihera orowa aYixrayeli, ntoko Yave eenraawe mwa Moisesi.