Okhuma 8 - Emakhuwa Bible

Nihooxo nanaaveeli: Anaphulu

¹ Vano Yave aamweerela Moisesi: “Muroweke wa Farawu* ni mwamuleeleke: ‘Yave eenre ha: ‘Muhiyeke mulokwaaka orowaka weera wakilape.

² Mwaahitthunihera orowa, kinoolamula weera elapwaanyu yootheene ekhuneeliwe ni anaphulu.

³ Nilu anaasareye anaphulu; awo eniiwele evolowaka mpaanimwanyu, okwartuniwanyu mpakatho vakaamaniwanyu. Eniivolowetho mmampaani mwa anamalakaanyu ni mwa mulokwaanyu, mpuwa mwa maikhwaanyu ni mooweetheelamwene.

⁴ Vano anaphulu animootuphelani nyuwo, anamalakaanyu ni mulokwaanyu.’”

⁵ Vano Yave aamweerelatho Moisesi: “Munlamulele Aharoni: ‘Mookoleleke moonowaanyu ni ekopwaanyu mmanyoolokoni, mmipopeni ni mmarattani ni mwemmo mwaawelihe anaphulu mweelaponi ya wExipitu.

⁶ Hiiho Aharoni aahookolela moonowaawe maahi a wExipitu ni anaphulu yaawela, enasareya elapo ya wExipitu.

⁷ Anamacittatho yaapaka etthweene yeeyo ni olowawaya woowiipithiheya; yaahaaweliha anaphulu mweelaponi ya wExipitu.

⁸ Farawu* aarumiha wiitthaniwa Moisesi ni Aharoni aweerelaka: “Mumvekele Yave weera akivenxere anaphulu ni wa mulokwaakatho; ni vahoolowaya kinoohiya muloko orowaka weera wampakele sooveleela Yave.”

⁹ Vano Moisesi aamweerela Farawu*: “Nyuwo murino nttittimiho na olakela: Yaakhani muntthunaanyu weera miyo koovekeleleni nyuwo, anamalakaanyu ni mulokwaanyu weera anaphulu evenxiwe wa nyuwo ni mmawannyinyu weera ehale a mmoolokoni Nilu paahi?”

¹⁰ Farawu* aamwaakhula: “Omaalo.” Vano Moisesi aamwaakhula: “Enimweereya ntoko mweenraanyu. Hiiho munoosuwela weera Yave, Mulukwaahu ti oohilikanxereya.

¹¹ Anaphulu animoohiyani, mmawannyinyu, anamalakaanyu, ni mulokwaanyu; eniihale a mmoolokoni paahi.”

¹² Moisesi ni Aharoni evenyakaru wa Farawu*, Moisesi aamudyoonttelela Yave niwoko na anaphulu aamurumihenlaawe Farawu*.

¹³ Yave aahaakhulela yooveka ya Moisesi: Yaahookhwa anaphulu yaari mmampaani, mmavaate ni mmamattani.

¹⁴ Yaathukumanyihiwa mapuro mapuro ni tivawo elapo yuunkhalaaya woovirula.

¹⁵ Farawu*, oonnaawe weera omumula waakhala, aahuumiha murimaawe ahimwiiwelelaka Moisesi ni Aharoni, ntoko Yave eenraawe.

Nihooxo nanaararu: anlukuveeve

¹⁶ Vano Yave aamweerela Moisesi: “Munlamulele Aharoni: ‘Mookole ekopwaanyu ni mukhuruleno ntthupi vatthayani. Vano nno nnoothatuwa anlukuveeve mweelaponi yootheene ya wExipitu.’”

¹⁷ Yaapaka hiiho ni Aharoni ookolakaru moono ni ekopwaawe aakhurula ntthupi na etthaya enaakhumelela anlukuveeve atthu ni axinama. Ntthupi nootheene na elapo ya wExipitu naathatuwa anlukuveeve.

¹⁸ Anamacittatho yeereraka waakhuumeleliha anlukuveeve ni olowawaya woowiipithiheya, khayaawenre. Vano anlukuveeve yannaaluma atthu ni axinama.

¹⁹ Yaamweerela Farawu*: “Ela ti ekatha ya Muluku.” Wa soothesene, murima wa Farawu* waapwaherera wuumihiwa ni owo khaatthuna owiiwa, ntoko Yave eenraawe.

Nihooxo nanaaxexe: amukaanga

²⁰ Vano Yave aamweerela Moisesi: “Omaalo, oxeexelo, mvenye ni murowe wa Farawu*, owo arowaka oluusi. Mwamuleele: ‘Yave eenre ha: ‘Muhiyeke mulokwaaka orowaka weera wakilape.

²¹ Nyuwo mwaahitthunihera mulokwaaka orowa, kinimoorumihelani nasope a amunkaanga, anamalakaanyu, mulokwaanyu ni impasanyu. Impa sa awExipitu ni annyikalaayamo anoosareyamo amukaanga.

²² Mene nihuku nno kinoovirikanyiha elapo ya oGoxeni, onkhalaayawo mulokwaaka. Kharwa akhala naari nasope mmoha a amunkaanga weera nyuwo musuwele weera Miyo, Yave, kiri elapweene yeele.

²³ Kinoohiyanyiha mulokwaaka ni mulokwaanyu. Eneneero eyo yootikhiniha enookhumelela omaalo.’”

²⁴ Vano Yave aapaka hiiho. Anasope atokotoko a amukaanga yaasareya vaate wa Farawu* ni mmavaate wa anamalakaawe ni wExipitu wootheene waahononeya mwaha wa amukaanga.

²⁵ Farawu* aarumiha wiitthaniwa Moisesi ni Aharoni aweerelaka: “Murowe, mwampakele sooveleela Mulukwaanyu, mene muhithaame mulaponimu.”

²⁶ Moisesitho aamwaakhula: “Eyo kheelonke. Sooveleela hiyo nnimpakelaahu Yave Mulukwaahu ti sa mwiikho wa awExipitu. Hiyo napaka sooveleela sinkhala ntoko mwiikhwaaya, awo anoonivonya maluku.

²⁷ Ontthuneya weera hiyo neette mukwaha wa mahuku mararu munikareni weera nampakele sooveleela Yave, Mulukwaahu, ntoko onilamulenlaawe.”

²⁸ Farawu* aamweerela: “Kinimootthuniherani orowa munikareni ompakela sooveleela Yave, Mulukwaanyu. Mene muhirakamelaxe ni mwakivekeleletho miyo.”

²⁹ Moisesi aamwaakhula: “Miyo vaava kimvenyaaka vamaithoniwanyu, kinoomvekela Yave. Omaalo, nasope a amukaanga anaamuhiye Farawu*, anamalakaanyu ni mulokwaanyu. Nave weera Farawu* ahihokoleele wuupuwelela ethiru, ooceelihaka muloko orowa ompakela sooveleela Yave.”

³⁰ Vano Moisesi aapwaha vamaithoni wa Farawu* ni aamvekela Yave.

³¹ Yave aahaakhulela yoovekaawe: Amukaanga yaamuhiya Farawu*, anamalakaawe ni mulokwaawe; khaakhanleru hata mukaanga mmoha aahanle.

³² Mene emaareene yeeletho Farawu* aahuumiha murimaawe ahitthuniheraka opwaha muloko.