Okhuma 6 - Emakhuwa Bible

¹ Yave aamweerela Moisesi: “Nyuwo mmoone yeeyo kineeraaka kimpakele Farawu*. Mwa Ntatanaka nooweraxa owo onootthunihera muloko orowa. Mwa Ntatanaka nooweraxa owo onimoomola muloko elapwaawe.”

² Muluku aamweerelatho Moisesi: “Miyo Yave.

³ Kaahiixoonihera wa Abrahaamu, Isaki ni Yakobe ntoko Muluku a ikuru sootheene, mene mwa Nsinanaka, Yave, nkiixoonihenre wa yaawosa.

⁴ Vahoolowaya kookhaliha wiiraanyihawaka ni yaawo weera kaavahe elapo ya oKanaani, mwa weiwe yaamankaaya ntoko anamarwa.

⁵ Vano, kohiiwa wiikhupanyera wa aYixrayeli mwa yaawo awExipitu anaapakaaya ipottha ni kohuupuwelela wiiraanyihawaka.

⁶ Tivawo: Mwaaleele aYixrayeli: ‘Miyo ti Yave. Kinimootapuxani mwa miteko sooviha sa awExipitu. Miyo kinimootapuxani mpotthani ni kinoowoopolani ni moono woolipa ni miteko sitokotoko sa nthoriho.

⁷ Miyo kinimookhalihani mulokwaaka ni kinookhala Mulukwaanyusa. Vano nyuwosa mmwisuwele weera Miyo ti Yave Mulukwaanyu mwa Yoowo onootapuxani mmutekoni mumvarihiwaanyu ni awExipitu.

⁸ Miyo kinimooronghani mulaponi kaalipenlaaka keemexaka ntata weera kaarwa omvaha Abrahaamu, Isaki ni Yakobe. Kinimoovahani ntoko elapwaanyu. Miyo ti Yave!’”

⁹ Moisesi aahaathalihera yeeyo aYixrayeli, mene awosa khayaamwiiwelenle niwoko na othanana ni mitekosaya soovihaxa.

¹⁰ Vano Yave aamulamulela Moisesi:

¹¹ “Murowe mwamuleele Farawu*, mwene a wExipitu, weera aahiye aYixrayeli ekhume mulaponi.”

¹² Wa soothesene, Moisesitho aamweerela Yave: “aYixrayeli ehikiiwaka miyo – anaakiiwe hai Farawu*? Wootepaxa miyo nkinlokolola nnene.”

¹³ Vaheera Yave aamulamulela Moisesi ni Aharoni weera yaaleele aYixrayeli ni Farawu*, mwene a wExipitu, weera Muluku oolamulela waakhumiha aYixrayeli mwExipitu.

Ikhapira sa Moisesi ni Aharoni

¹⁴ Asitokweene a emusi ya aYixrayeli yaari ti ala: anamwane a Rubeni, ntthaara na Yixrayeli: Hanokhi, Palu, Hezironi ni Karemi. Ala yaari mahimo a Rubeni.

¹⁵ Anamwane a Simeyoni yaari Yemuweli, Yamini, Ohadi, Yakini, Zowari ni Xawuli, mwaana a muthiyana muKanaani. Ala yaari mahimo a Simeyoni.

¹⁶ Ala yaari masina a anamwane a Leevi ottharihiwaka oyariwawaya: Gerxomo, Kohathi ni Merari. Leevi aarino iyaakha ncira ni miloko miraru niithannapiili.

¹⁷ Anamwane a Gerxomo ettharihiwaka maimwaaya: Libeni ni Ximei.

¹⁸ Anamwane a Kohathi yaari Amerama, Yizehara, Heberoni ni Uziyeli. Kohathi aarino iyaakha ncira ni miloko miraru ni tthaaru.

¹⁹ Anamwane a Merari yaari Makheli ni Muxi. Ala yaari mahimo a Leevi ottharihiwaka oyariwawaya.

²⁰ Amerama aamuthela napaapaawe iitthaniwa Yokhebedi, ni owo aamuyara Aharoni ni Moisesi. Amerama aarino iyaakha ncira ni miloko miraru niithannapiili.

²¹ Anamwane a Yizehara yaari Kora, Nefege ni Zikeri.

²² Anamwane a Uziyeli yaari Mixayeli, Elezafana ni Siteri.

²³ Aharoni aamuthela Elixeba, mwaana a Aminadabi ni murokoriye Nakhexoni. Owo aamuyarano Nadabi, Abihu, Eleyazara ni Itamara.

²⁴ Anamwane a Kora yaari Asiri, Elekana ni Abiyasafa. Awo yaari mahimo a aKora.

²⁵ Eleyazara, mwaana a Aharoni, aamuthela mwaana mmoha a Putiyeli, mwa yoowo aamuyarannaawe Pinehasa. Ala yaari asitokweene a emusi ya aLeevi ettharihiwaka mahimwaaya.

²⁶ Vano aari Aharoneene yoowo ni Moiseseene yoowo Yave aaweerelansaawe: “Mwaakhumihe aYixrayeli mwExipitu mwaarehereraka muttharihaka okawanyeyawaya.”

²⁷ Aari Moisesi ni Aharoni yuulumme ni Farawu*, mwene a wExipitu, eerelaka waakhumiha aYixrayeli mwExipitu.

Aharoni ntoko eyano ya Moisesi

²⁸ Vano Yave uulummaawe ni Moisesi wExipitu,

²⁹ aamweerela: “Miyo ti Yave. Mwamuleele Farawu*, mwene a wExiptu, sootheene kineeraaka kooleeleni.”

³⁰ Moisesitho aamukoha Yave: “Anaakiiwe hai Farawu* kihuulumaka nnene?”