Okhuma 40 - Emakhuwa Bible

Otekiwa wa etabernaakulu* ni ikarumasaya

¹ Vano Yave aamweerela Moisesi:

² “Mweemexe etabernaakulu*, Eheema ya Muthukumano*, vanihukuni noopacera na mweeri woopacera.

³ Ngwiikaathimo Arka* a Namoona ni mwaakuttelele ni elutto.

⁴ Muruuhe meesa ni mwiikaathiwo sa vaavaawo. Vahoolowaya muruuheke onyaari ni mpattihe soomwaleelasaya.

⁵ Ngwiikaathi altaari* a eyuuma yoorikaxa a erubani* ohoolo wa Arka* a Namoona ni mutthukelele eluttu vamulako wa etabernaakulu*.

⁶ Ngwiikaathi altaari* a sooveleela soohisa ohoolo wa mulako wa etabernaakulu*, Eheema ya Muthukumano*.

⁷ Mwiikaathi ebasiya eriyari ya Eheema ya Muthukumano* ni altaari* ni musarihemo maahi.

⁸ Mweemexere nipuwa ninrukureera Eheema ya Muthukumano* ntoko ekintaali ni mutthukelele eluttu vamulako wa nipuwa.

⁹ Mukuxe makhura oottikitthelano ni muttikitthele etabernaakulu* ni sootheene sirimo, mutteelihe eyo ni ikarumasaya sootheene ni vano eniitteelihiwe.

¹⁰ Vahoolowaya mwaattikitthele altaari* a sooveleela soohisa ni ikarumasaya sootheene; mwaatteelihe altaari* ni awo eniitteelaxe.

¹¹ Muttikittheletho ebasiya ni mwettwaaya ni mutteelihe.

¹² Munruuhele Aharoni ni anamwanaawe asilopwana vamulako wa Eheema ya Muthukumano* ni mwaalamulele wiivulula.

¹³ Vahoolowaya mungwarihe Aharoni soowara sootteela; munttikitthele ni muntteelihe weera akirumeele ntoko musaserdoti*.

¹⁴ Mwaaruuheke anamwanaawe asilopwana ni mwaawarihe mikaandyo.

¹⁵ Mwaattikitthele ntoko mwaattikitthenlaanyu atithaya weera ekirumeele ntoko asaserdoti*. Ottikittheliwawaya onookhaliha osaserdoti* woohimala wa ikhapira sootheene sinrwa.”

¹⁶ Moisesi aapaka sootheene ntoko Yave aamulamulenlaawe.

¹⁷ Hiiho etabernaakulu* yaaheemexiwa vanihukuni noopacera na mweeri woopacera wa eyaakha yanaaveeli.

¹⁸ Eemexaka Moisesi etabernaakulu*, aahiikaathi nyetto mmapuronimwaya, aaweemexa acikhi, aaweliha mikoomba ni aaweemexa amarimbu.

¹⁹ Vahoolowaya aakunga eheema vatabernaakuluni, anakhuneela ni yookhuneelano ntoko Yave aamulamulenlaawe.

²⁰ Aahiikaathitho itthaabwa sa Namoona mwaarkani*, aatthukelelamo ikopo ni aahiikaathera vasuluwaya yookhuneelano ya wiiraana.

²¹ Vano aahaavolongha Arka* mutabernaakuluni, anatthukelela eluttu yookuttelelano aakuttelelaka Arka* a Namoona, ntoko Yave aamulamulenlaawe.

²² Moisesi aahiikaathi meesa Muheemani mwa Muthukumano, mpatta wa ottuttuwani wa etabernaakulu*, mpatta wa omokoni wa eluttu.

²³ Aahiikaathiwo epaawu ya Okhala*, ntoko Yave aamulamulenlaawe.

²⁴ Aahiikaathi onyaari Muheemani mwa Muthukumano ohoolo wa meesa, mpatta wa ohitto wa etabernaakulu*,

²⁵ anapattiha soomwaleela ohoolo wa Yave, ntoko Owo aamulamulenlaawe.

²⁶ Moisesi aawiikaathitho altaari* a eyuuma yoorikaxa Muheemani mwa Muthukumano ohoolo wa eluttu,

²⁷ anahisamo erubani* yoowunkhelaxa, ntoko Yave aamulamulenlaawe.

²⁸ Vahoolowaya aatthukelela eluttu vamulako wa etabernaakulu*.

²⁹ Aawiikaathi altaari* a sooveleela soohisa vakhiviru wa mulako wa etabernaakulu*, Eheema ya Muthukumano*, anapakawo sooveleela soohisa ni sa etrigu, ntoko Yave aamulamulenlaawe.

³⁰ Aahiikaathi ebasiya eriyari ya Eheema ya Muthukumano* ni altaari*, anasariha maahi.

³¹ Moisesi, Aharoni ni anamwanaawe asilopwana yaavarela muteko maahi awo weera yiivulule.

³² Imaara sootheene yaavolowasaaya Muheemani mwa Muthukumano hoye hoye yaawaattamelaaya altaari* yanniivulula, ntoko Yave aamulamulenlaawe Moisesi.

³³ Woomalihera Moisesi aaheemexa nipuwa ninrukureera etabernaakulu* ni altaari* ntoko ekintaali, anatthukelela eluttu vamulako wa nipuwa. Hiiho Moisesi aamaliha miteko.

Ovuwa wa Yave

³⁴ Vano nihutte naakhuneela Eheema ya Muthukumano* ni ovuwa wa Yave waasareya mutabernaakuluni.

³⁵ Moisesi khaawera ovolowa Muheemani mwa Muthukumano, niwoko nihutte naari mwemmo ni ovuwa wa Yave waasareya muTabernaakuluni*.

³⁶ Imaara sootheene nihutte naawelaaya vaTabernaakuluni*, aYixrayeli ti yeettaaya ni mukwahaaya.

³⁷ Vaheera nihutte naahiwela, awo khayaapwaha, mpaka nihuku nihutte naawelaaya.

³⁸ Vano khula othana nihutte na Yave naakhuneela etabernaakulu* ni khula ohiyu waakhala mooro munihutteni, muloko wootheene wa aYixrayeli woonaka mmikwahanimwaya moothemwene.