Okhuma 4 - Emakhuwa Bible

Ineneero aavahiwe Moisesi

¹ Moisesi aamwaakhula: “Ankha awosa yaahikaakhulelasa hata yaahitthuna okiiwa ni yeera: ‘Yave khookhumelenleni?’”

² Vano Yave aamukoha: “Eri mmatatanimwanyu mmo eheeni?” Owo aamwaakhula: “Ekopo ela.”

³ Yave aamweerela: “Mmoroxele vathi ekopwaanyu.” Vano Moisesi aamoroxa, enathatuwa eyo enowa, anatthawa Moisesi.

⁴ Yave aamweerela: “Mookole moonowaanyu ni mvareke waamwiila.” Moisesi aahookola moonowaawe anavara enowa ni yaathatuwa ekopo mmatatanimwawe.

⁵ Yave aamweerela: “Eyo keerenle weera awo yaakhulele weera Muluku a atithaya, Muluku a Abrahaamu, a Isaki ni a Yakobe ohookhumelelani nyuwo.”

⁶ Yave aamweerelatho: “Mwiikaathi ntatananyu vakakasani.” Moisesi aahiiwelela ni avenxakaru, nno naakhalihiwa maleepela naari noosareyaxa. Naari nootteela ntoko etthabwe.

⁷ Vahoolowaya aamulamulela: “Muhokoloxeretho ntatananyu vakakasani.” Aapaka yeeyo ni avenxakaru, nno naahokoleela ntoko neerenlaaya!

⁸ Yave aapwaherera eeraka: “Awosa yaahiwaakhulelani ehipwatthelaka eneneero yoopacera, eniyaakhulele yanaaveeli.

⁹ Ni nlelo awosa yaahaakhulela ineneero piili iyo hata yaahipwatthela, mwarike maahi vakhaani a muNilu ni mwiitthele vatthayani yoowuuma. Mwiitthela maahi awo vatthayani yoowuuma, eniithatuwe ephome.”

¹⁰ Moisesi aamweerela Yave: “Ii! Adonai, wuulumawaka onkhala woohaawano, hata khalayeene, naari vaanaano vaava Nyuwo munuulumaanyu ni murumeiyaanyu. Nkingwera wuuluma nnenesene.”

¹¹ Yave aamwaakhula: “Taani omvanghe eyano mutthu? Taani onkhalinghe oohiiwa naari oohuuluma? Taani onimvaha woona hoye hoye ohoona? Ti Yoomi, Yave!

¹² Vanonto muroweke. Miyo nkikhale ni nyuwo kooxuttihakani yeeyo muneeraanyu mweereke.”

¹³ Mene Moisesi aamwaakhula: “Ii! Apwiya, kinoovekelani weera munrumihe mutthu mukina.”

¹⁴ Vano Yave aamunyoonyeriwa Moisesi, anamweerela: “Nyuwo khamunono munninyu Aharoni, muLeevi? Koosuwela weera owo onuuluma nnenesene. Owo aneera arwaaka weera oociceereni ni anaahakalale woowoonani.

¹⁵ Nyuwo mmuulume ni yoowo munleelaka yeeyo aneeraawe ahimeke. Miyo kinookhala ni nyuwosa muulumaka ni kinimooleelani yooweera.

¹⁶ Owo anuulume ni muloko wa mpattaanyu. Onuukhale ntoko ereene eyanowaanyu ni nyuwo mureene Mulukwaawe.

¹⁷ Mukuxe mmatatanimwanyu ekopo ela weera mwapake sootikhiniha ni yeela.”

Ohokoleela wa Moisesi wExipitu

¹⁸ Vano Moisesi aahokoleela wa Yethero, atatawe oowaathelela, anaweerela: “Kintthuna ohokoleela wExipitu weera kasuwele amusaaka yaakhanle.” Vano Yethero aamwaakhula: “Muroweke mmuretteleni.”

¹⁹ Moisesi nlelo areene oMidiyani, Yave aamweerela: “Muhokoleele wExipitu, niwoko ootheene yaale yaasaasa owiivani ahookhwa.”

²⁰ Vano Moisesi aahaakuxa amwaariye ni anamwanaawe, anaawelihasa vabuuruni, anahokoleela wExipitu. Aakuxatho ekopo ya Muluku mmatatanimwawe.

²¹ Yave aamweerela Moisesi: “Mwaahokoleelaka wExipitu, mwiipasoope woopaka ohoolo wa Farawu* sootikhiniha sootheene koovanghaakani owera opaka. Vaheera Miyo kinimuumiha murimaawe moota wooweera kharwa atthunihera muloko okhuma.

²² Vahoolowaya mwamuleele Farawu*: ‘Yave eenre ha: ‘Yixrayeli ti ntthaaranaka

²³ ni Miyo koomuleela: ‘Omuhiyeke mwanaka arowaka okilapa. Mene weyo khoomuhingye arowaka. Tivawo kineeraaka kiive ntthaaranawo.’”

²⁴ Waakoneliwa ephiro eriyari, Yave aarowa okumana ni Moisesi atthunaka omwiiva.

²⁵ Vano, Zipora aakuxa nluku noowiitha, anamwiinela mwanawe, anavonyera aathikinlaawe mmettoni mwa Moisesi amweerelaka: ‘Vano nyuwo ti aiyaka a ephome.

²⁶ Owo aaheera: ‘Aiyaka a ephome,’ athoonyeraka wiineliwa. Vanonto ehuhuweene yeele Yave aamuhiya Moisesi.

²⁷ Yave aamweerela Aharoni: “Murowe onikareni weera munciceerewo Moisesi.” Hiiho owo aarowa, anakumana ni Moisesi vamwaakoni wa Muluku, anamuulumiha ni ebeecu.

²⁸ Vano Moisesi aamuthalihera Aharoni sootheene Yave aatthunaawe weera amuleele Farawu* nitho sa sootikhiniha sootheene Muluku aamulamulenlaawe opaka.

²⁹ Hiiho Moisesi ni Aharoni yaarowasa ni yaahaathukumanyiha asitokweene ootheene a aYixrayeli.

³⁰ Aharoni aahaathalihera sootheene Yave aamuleenlaawe Moisesi. Woottharelana Moisesitho aapaka sootikhiniha sootheene vamaithoniwaya ni

³¹ awo yaaroromela. Muloko osuwelakaru weera Yave oonitthukuruwela ni ohoona ohasuliwawahu, waahuurama omulapaka Muluku.